Zəmilər bol məhsulu ilə üzə gülür

Rafiq kişi bu mənzərədən, səhər havasının təmizliyindən zövq alaraq, sanki qarşıdakı iş günü üçün kifayət qədər qüvvə toplamaq istəyirdi. Taxıl biçini başlayandan onun hər iş günü gərgin keçir. Düzdür, başçılıq etdiyi "Aqrolizinq"in rayondakı filiallarında kifayət qədər texnika var. Amma işi düzgün qurmaq, kombaynları daha çox ehtiyac olan yerlərə göndərmək, həm də bu zaman heç kimin qəlbinə toxunmamaq elə də asan məsələ deyil.

Bunları düşünə-düşünə Rafiq kişi yaşadığı Təzəkənd kəndindəki taxıl zəmisinin kənarına gəldi. Sünbülün birini əlinə götürüb nəmliyini yoxladı. Əsl vaxtıdır, biçilməlidir. Dünən onlara müraciət edənləri bir-bir fikrindən keçirdi. Əlbəttə, üstünlüyü düşmənlə təmas xəttində yerləşən cəbhəyanı kəndlərə vermək lazımdır. Qoy onların taxılı vaxtında biçilsin.

Rafiq kişi başını qaldırıb əzəmətlə uyuyan Murova baxdı. Bu ilin mart-aprel aylarında Murovun ətəklərində yerləşən Qızıloba, Həsənqaya, Şıxarx və Çaylı kəndlərində baş verən hadisələri xatırladı. Rayonda keçirilən müşavirələrin birində deyildiyi kimi, əgər Tərtər Rayon Bitki Mühafizə Mərkəzi vaxtında operativ tədbirlər görməsəydi, Mərakeş çəyirtkəsi bu ərazilərdə məhsulu tamamilə məhv edəcəkdi. Amma indi hər bir kənddə taxıl zəmiləri bol məhsulu ilə göz oxşayır.

Bu il Tərtər rayonunda 21342 hektarda taxıl yetişdirilmişdir. Bunun 19130 hektarı buğda, 2180 hektarı arpa, 32 hektarı isə xəsil üçün nəzərdə tutulmuş arpadır. Rayonun iki kəndində - Tərtər çayının sağ sahilində yerləşən Qaraqoyunluda və sol sahilindəki Bəyimsarov kəndlərində "Aqrolizinq" ASC-nin filialları fəaliyyət göstərir. Bu filialların müdiri Rafiq Abbasovdur.

- Ötən il müəssisəmizdə 7 kombayn vardı. Onların gücü ilə 2 min hektara yaxın sahənin məhsulunu biçib yığdıq. Son illər ilk dəfə olaraq rayon üzrə yüksək göstəricilərə nail olundu, hər hektardan 29,3 sentner buğda və 29,8 sentner arpa götürüldü, bütövlükdə rayonda 48828,8 ton taxıl istehsal olundu.

Bu il "Aqrolizinq" ASC-nin Tərtər filialının fəaliyyəti genişlənmişdir. Müəssisə daha 5 xarici taxılbiçən kombayn almışdır ki, bu da hazırda taxıl zəmilərində məhsulun sürətlə biçilməsini təmin edir. Həmçinin Bəyimsarov kənd filialında tikilmiş tutumu 2500 ton olan anbar əhalinin müxtəlif gübrə və əkinçilikdə istifadə olununan digər preparatlarla təmin edir. Eyni zamanda, texnikanın təmiri üçün müxtəlif sexlər vardır. Bütövlükdə isə filiallarda 12 kombayn, 3 ot kipi bağlayan, 2 qoşqulu traktor, 10 özüyeriyən otbiçən, 4 dırmıq, 4 mala və digər kənd təsərrüfatı texnikası cəmləşib.

Hazırda "Aqrolizinq" ASC-nin Tərtər filiallarında 41 nəfər çalışır. Onların əksəriyyəti öz işini yaxşı bilən təcrübəli mexanizatorlardır.

Tərtərdə taxıl biçininə ruh yüksəkliyilə başlanmışdır. Bunun başlıca səbəblərindən biri fermerlərə dövlət tərəfindən göstərilən yardımlardır. Təkcə 2008-ci ildə rayonumuzda torpaq istifadəçilərinə 1 milyon 27 min, buğda əkənlərə isə 744 min manat kompensasiya ödənilmişdir, - deyə R.Abbasov bildirdi.

Svetlana BAĞIROVA

Azərbaycan.- 2009.- 24 iyun.- S. 6.