Məktəb kitabxanalarının işindəki problemlər

"Azərbaycan" qəzeti məktəb kitabxanalarının uğurları və qarşıda duran problemlərlə bağlı Səbail Rayon İcra Hakimiyyəti ilə birlikdə "dəyirmi masa" keçirmişdir. Qəzetin 21 may 2009-cu il tarixli nömrəsində dərc edilmiş "Kitaba həsrət oxucu, yoxsa oxucuya həsrət kitabxanalar" sərlövhəli "dəyirmi masa"da kitabxana işinin canlandırılması, onların təchizatının yaxşılaşdırılması, gənclərdə kitaba marağın artırılması ilə bağlı bir sıra maraqlı mülahizə və təkliflər irəli sürülmüşdür. Eyni zamanda, məktəb kitabxanalarının işində mövcud problemlərin həlli və çatışmazlığın aradan qaldırılması ilə əlaqədar tədbirlərin görülməsi də qeyd olunmuşdur.

Yazı tədbir görülmək üçün Təhsil Nazirliyinə göndərilmişdir. Nazir müavini İradə Hüseynova tərəfindən redaksiyamıza daxil olan cavab məktubunda problemin ciddi araşdırıldığı bildirilmiş və kitabxana fondunun qorunub saxlanılması, zənginləşdirilməsi istiqamətində mühüm addımlar atıldığı, bu sahəyə dövlət tərəfindən böyük diqqət və qayğının göstərildiyi xüsusi vurğulanmışdır. Cavab məktubunda deyilir:

Son dövrlərdə dövlət başçısı cənab İlham Əliyev tərəfindən kitab və kitabxana işinə dair imzalanmış "Azərbaycanda kitabxana işinin yaxşılaşdırılması haqqında" sərəncam və "Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı" strateji əhəmiyyətli sənədlərdir. Burada kitabxana işi, onun cəmiyyətdə tutduğu mövqeyi, müasir informasiya cəmiyyəti şəraitində kitabxanaların vəzifələri, gələcək inkişaf istiqamətləri və perspektivləri müəyyənləşdirilmişdir. Bu sənədlər kitabxana işinin yaxın gələcək üçün inkişaf proqramıdır.

Həyata keçirilən tədbirlər nəticəsində ümumtəhsil məktəblərinin kitabxanalarının infrastrukturu xeyli yeniləşmiş, yeni nəsil dərsliklər və elmi, pedaqoji, bədii ədəbiyyatların hesabına kitab fondu zənginləşdirilmişdir. Bu gün yeni tikilən və ya təmir edilən bütün məktəblərin kitabxanaları müasir tələblərə cavab verir. Heydər Əliyev Fondu tərəfindən kitabxanalarımız çoxlu sayda əyani vəsaitlərlə təmin olunmuşlar. Bu iş hazırda davam etməkdədir. Dövlət və qeyri-dövlət təşkilatlarının xətti ilə pilot-layihələr çərçivəsində cari ildə seçmə yolu ilə dayaq kitabxanalar müəyyənləşdirilmiş, onların maddi-texniki bazasının yaxşılaşdırılması nəzərdə tutulmuşdur.

Respublika Prezidentinin 6 oktyabr 2008-ci il tarixli sərəncamı ilə təsdiq edilmiş "Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı"nın, həmçinin Nazirlər Kabinetinin 22 dekabr 2008-ci il tarixli sərəncamı ilə təsdiq edilmiş "Məktəb kitabxanalarının maddi-texniki bazasının möhkəmləndirilməsi və müasir informasiya texnologiyaları ilə təchizatına dair Tədbirlər Planı"nın icrasını təmin etmək məqsədilə Təhsil Nazirliyində müxtəlif tədbirlərin həyata keçirilməsi planlaşdırılmış və artıq onun icrasına başlanılmışdır. Bura kitabxanaların ensiklopedik və sorğu-məlumat xarakterli ədəbiyyatlarla təminatı, kitabxanalarda ədəbiyyatların saxlanılmasının təhlükəsizliyi üçün müvafiq otaqların ayrılması, məktəb kitabxanaları ilə bağlı normativ sənədlərin hazırlanması, məktəb kitab fondlarının kataloqunun yaradılması, kitabxanaların əsaslı təmiri, modernləşdirilməsi və avadanlıqlarla təchiz olunması daxildir. Eyni zamanda, qeyri-ixtisas təhsilli kitabxanaçıların ixtisasartırma kurslarına cəlb edilməsi, məktəblilərin kitabxanaya, mütaliəyə cəlb olunması işini daha da yaxşılaşdırmaq məqsədilə disput və sərgilərin keçirilməsi, kitab müzakirəsi, poeziya gecələri kimi tədbirlərin genişləndirilməsi, işğal olunmuş rayonların məktəb kitabxanalarının bərpasının təşkili və s. kimi məsələlər də nəzərdə tutulmuşdur.

Təhsil Nazirliyi məktəb kitabxanalarının işindəki problemlərin həlli və çatışmazlıqların aradan qaldırılması istiqamətində fəaliyyətini davam etdirməkdədir.

İ.HÜSEYNOVA,

nazir müavini

Azərbaycan.- 2009.- 25 iyun.- S.8.