Regionların su təchizatı və kanalizasiya sistemi yaxşılaşdırılacaq

İyunun 25-də Milli Məclisin Təbii ehtiyatlar, energetika və ekologiya komitəsinin iclası olmuşdur. Komitə sədrinin müavini Elton Məmmədov "Yaponiya Beynəlxalq Əməkdaşlıq Agentliyi və Azərbaycan Respublikası Hökuməti arasında "Kiçik şəhərlərdə su təchizatı və kanalizasiya layihəsi"nə dair Kredit Sazişinin təsdiq edilməsi haqqında" Azərbaycan Respublikası Qanununun layihəsi barədə məlumat vermişdir. O bildirmişdir ki, regionlarda su təchizatının və kanalizasiya sisteminin yaxşılaşdırılması, mövcud infrastrukturun yenilənməsi əsas məsələlərdəndir. Regionların inkişafına dair birinci dövlət proqramında olduğu kimi, ikinci dövlət proqramının icrası müddətində də bu sahədə xeyli iş görüləcək.

"Kiçik şəhərlərdə su təchizatı və kanalizasiya layihəsi" də bu məqsədə xidmət edir. Layihənin ümumi dəyəri 452 milyon dollardır. Bu məbləğin 108 milyon dollarını Azərbaycan hökuməti öz üzərinə götürüb. Layihə çərçivəsində 61 şəhər və rayon mərkəzində su təchizatı və kanalizasiya sisteminin yaxşılaşdırılması üçün tədbirlər həyata keçiriləcək. Yaponiya Beynəlxalq Əməkdaşlıq Agentliyi ilə imzalanmış Kredit sazişinə əsasən ayrılacaq vəsaitlə Şirvan, Salyan, Neftçala, Xaçmaz, Bərdə, Yevlax, Xızı, Qusar, Qobustan və Naftalanda su təchizatı və kanalizasiya qurğularının tikintisi, su borularının satınalınması və quraşdırılması işləri həyata keçirləcək. Kredit sazişi 2009-cu il mayın 29-da Bakıda imzalanmışdır.

Komitə üzvləri layihə çərçivəsində görüləcək işlərin regionların sosial-iqtisadi inkişafına töhfələr verəcəyini qeyd etdilər.

İclasda iştirak edən "Azərsu" Səhmdar Cəmiyyətinin "Sukanal" Elmi-Tədqiqat Layihə İnstitutunun direktor müavini Əhməd Məmmədov layihə barədə fikirlərini bildirdi.

Sonda Kredit sazişi ratifikasiya olunmaq üçün Milli Məclisin plenar iclasına çıxarılması tövsiyə edildi.

Azərbaycan.- 2009.- 26 iyun.- S. 6.