Səhiyyə xidmətinin səviyyəsi yüksəlir

Ölkəmizin gündən-günə artan iqtisadi qüdrəti fonunda Sabirabad rayonunda rahat yolların çəkilməsi, yaraşıqlı park və xiyabanların salınması, çoxsaylı yeni obyektlərin tikilməsi dövlətin yeritdiyi siyasətdə sosial yönümün üstünlüyünü təsdiq edir.

Son illər regionların sosial-iqtisadi inkişafında səhiyyənin maddi-texniki bazasının əsaslı şəkildə möhkəmləndirilməsi buna əyani sübutdur. Əhaliyə göstərilən səhiyyə xidmətinin müqayisəolunmaz dərəcədə yaxşılaşdırılması hamı tərəfindən böyük razılıqla qarşılanır. Dövlət büdcəsindən səhiyyəyə ayrılan vəsaitin ildən - ilə artırılması bu sahədə iri həcmli layihələrin həyata keçirilməsinə geniş imkanlar açır. Keçən ilin fevralından Səhiyyə Nazirliyinin tabeliyində olan bütün müalicə - profilaktika müəssisələrində pullu tibbi xidmətin ləğv olunması Prezident İlham Əliyevin sosialyönümlü siyasətinin bariz nümunəsi kimi hər bir ölkə vətəndaşının qəlbində hədsiz razılıq doğurmuşdur.

Biz də Sabirabad əhalisinə nümunəvi səhiyyə xidməti göstərmək sahəsində müəyyən uğurlar qazanmışıq. Mərkəzi rayon xəstəxanasının ayrı-ayrı şöbələri əsaslı təmir edilmişdir. Xəstələrin ərzaq və zəruri dərman preparatları ilə təminatı yaxşılaşdırılmışdır. 1500 nəfərdən çox şəkərli diabet xəstəsinin zəruri dərmanlarla təminatındakı problemlər aradan qaldırılmışdır. Yeni aldığımız Yaponiyanın "Toşiba" firmasının istehsalı olan müayinə aparatı xidmətin səmərəsini xeyli artırıb.

Hazırda mərkəzi rayon xəstəxanasının dam örtüyü dəyişdirilir, həyətində abadlıq işləri davam etdirilir. Yaxın günlərdə Nizami kənd xəstəxanasının əsaslı təmirinə başlanacaqdır.

Həyata keçirilən məqsədyönlü tədbirlər nəticəsində tibb işçilərinin iş şəraiti xeyli yaxşılaşıb, xəstələrə nümunəvi xidmət göstərmək üçün geniş imkanlar yaranıb. Dövlət başçısının sərəncamı ilə son 3 ildə tibb işçilərinin məvaciblərinin 5 dəfə artırılması sosial vəziyyətimizin yaxşılaşdırılmasına əsaslı təsir göstərməklə yanaşı, məsuliyyətimizi də artırır, üzərimizə yeni vəzifələr qoyur.

Ümumdünya Səhiyyə Assambleyasının 60-cı sessiyasında Heydər Əliyev Fondunun prezidenti, Milli Məclisin deputatı, YUNESKO-nun və İSESKO-nun xoşməramlı səfiri Mehriban xanım Əliyevanın Ümumdünya Səhiyyə Təşkilatı tərəfindən "Ana, uşaq və ailə sağlamlığının qorunmasında və möhkəmləndirilməsində müstəsna xidmətlərinə görə" mükafatı ilə təltif edilməsi onu göstərir ki, ölkə rəhbərliyinin Azərbaycan səhiyyəsinə diqqəti və qayğısı artıq beynəlxalq səviyyədə də təsdiq olunur. Bütün bunlar isə bizi daha səmərəli işləməyə ruhlandırır. Xəstələrə təcili və təxirəsalınmaz tibbi xidmətin səviyyəsini də xeyli yüksəltmişik.

Təcili yardım stansiyasının əvvəlki acınacaqlı vəziyyətindən əsər-əlamət qalmayıb. Stansiya əsaslı təmir edilmiş, müasir avadanlıqlarla təchiz olunmuşdur. Yeni aldığımız iki təcili yardım maşını çağırışlara operativ çatmağa imkan verir. Rayonun Ulacalı, Qaratəpə kənd sahə xəstəxanaları, Yolçubəyli, Həşimxanlı həkim ambulatoriyaları, Axtaçı və Xəlfəli feldşer-mama məntəqələri təmir olunmuşdur. Humanitar təşkilatlar tərəfindən Mürsəlli və Osmanlı kəndlərində feldşer-mama məntəqələri tikilib əhalinin istifadəsinə verilmişdir. Bununla belə hələ görüləcək işlərimiz də çoxdur. Müasir diaqnostik cihazlara, rentgen, laborator və fizioterapevtik avadanlıqlara böyük ehtiyac vardır.

Əlifağa NADİROV,

Sabirabad Rayon Mərkəzi

Xəstəxanasının baş həkimi

Azərbaycan.- 2009.- 26 iyun.- S. 7.