Heydər Əliyev Fondu bizə misilsiz ailə sevinci bəxş etdi

Ucar rayonunun Yuxarı Şilyan kəndində doğulmuşam. Həyat yoldaşım Vahid də həmin kənddəndir. Ailə qurandan sonra övladımızın olmasını səbirsizliklə gözləyirdik. Ancaq aylar illərə döndü, evimiz körpə qığıltısına həsrət qaldı. Yeddi il çox tibb ocaqlarına, həkimlərə üz tutduq. Xeyri olmadı. Axırda Moskva şəhərinə getdik. İlk günlərdə Heydər Əliyev Fondunun Rusiya Federasiyası nümayəndəliyinin rəhbəri Leyla xanım Əliyevanın hərtərəfli qayğısı ilə əhatə olunub müalicə aldım və birdən-birə dörd körpəm dünyaya gəldi. Xəstəxanada qaldığım müddətdə hər an Leyla xanımın qayğısını, diqqətini hiss etdim.

Hazırda Ucar şəhərində yaşayırıq. Körpələrimiz - Məhəmməd, Zəhra, Musa və İsmayıl artıq yarı yaşı ötüblər. Moskvadan qayıdanda Ucar Rayon İcra Hakimiyyətinin nümayəndələri bizi Bakı Hava Limanında qarşıladılar. Hər cür qayğı göstərdilər. Əmək və Əhalinin Sosial Müdafiəsi Nazirliyinin və rayon icra hakimiyyətinin qayğısı ilə Ucar şəhərindəki evimiz əsaslı təmir olundu. Əlavə mətbəx tikildi. Nazirlik mənzilimizə mətbəx mebeli, yataq dəsti, icra hakimiyyəti isə soyuducu, televizor, xalça və digər məişət ləvazimatları bağışladılar.

Mayın 15-də - Ailə Günündə böyük təntənələ ilə bizi əsaslı təmirdən sonra evimizə köçürdülər. Leyla xanım Əliyeva bizə paltaryuyan maşın və körpələrimizə gəzinti arabası göndərmişdi.

Yaşadığımız mənzildə qaz, işıq, su - hər şey var. Rayon icra hakimiyyətinin rəhbərliyi, rayon mərkəzi xəstəxanasının həkimləri körpələrimizin sağlam böyüməsi üçün qayğı və diqqətlərini əsirgəmirlər. Rayon icra hakimiyyəti başçısının xeyriyyə fondundan, rayon sosial müdafiə mərkəzindən ayrılmış yardım və müavinətləri vaxtlı-vaxtında alırıq. Bir sözlə, dövlətimizin hər cür qayğısı ilə əhatə olunmuşuq.

Bizə bu sevincin bəxş olunmasında misilsiz qayğı göstərmş Heydər Əliyev Fondunun Rusiya Federasiyası nümayəndəliyinin rəhbəri Leyla xanım Əliyevaya dərin minnətdarlığımızı bildirirəm. Bizdən diqqətini əsirgəməyən digər insanlara da təşəkkür edirəm. Arzum odur ki, oğlanlarım Məhəmməd, Musa və İsmayıl böyüyəndə hərbi xidmətlərini Şuşada keçsinlər. İnanıram ki, bu arzuma da qovuşacam.

Dürdanə XƏLİLOVA,

Ucar şəhəri

Azərbaycan.- 2009.- 28 iyun.- S. 5.