Almaniya Azərbaycan ilə miqrasiya sahəsində əlaqələrin genişləndirilməsində maraqlıdır

Dövlət Miqrasiya Xidmətinin (DMX) rəisi Arzu Rəhimov Azərbaycanda səfərdə olan Almaniya Federativ Respublikasının daxili işlər nazirinin müavini Auqust Hanninqin başçılıq etdiyi nümayəndə heyəti ilə görüşmüşdür.

Ölkələrimiz arasındakı mövcud münasibətlərdən danışan Auqust Hanninq bildirmişdir ki, son illər Azərbaycan böyük inkişafa nail olmuşdur. Bakının inkişafına da toxunan Auqust Hanninq burada gedən abadlıq və quruculuq işlərini xüsusi vurğulamışdır.

Qonaq münasibətləri dərinləşdirmək üçün səmərəli danışıqlar apardıqlarını, miqrasiya sahəsində əlaqələrin genişləndirilməsində maraqlı olduqlarını qeyd etmiş, əməkdaşlığın bundan sonra da uğurla davam edəcəyinə əminliyini bildirmişdir.

A.Rəhimov bildirmişdir ki, miqrasiya proseslərinin tənzimlənməsi, miqrasiya siyasətinin formalaşdırılması, ümumiyyətlə, miqrasiya proseslərinə nəzarətin təmin edilməsi məqsədilə Azərbaycan Prezidentinin 2007-ci il 19 mart tarixli Fərmanı ilə Dövlət Miqrasiya Xidməti yaradılmış və qarşıya ciddi vəzifələr qoyulmuşdur. Xidmətdə əcnəbilərin və vətəndaşlığı olmayan şəxslərin ölkədə müvəqqəti olma müddətlərinin artırılması, qaçqın statusunun müəyyən edilməsi ilə bağlı qərarlar qəbul edilir, onların müvəqqəti və ya daimi yaşamasına icazə verilməsi və vətəndaşlıq məsələlərinə baxılır.

Xidmətdə "bir pəncərə" prinsipinin tətbiqi ilə bağlı ətraflı məlumat verən DMX-nin rəisi diqqətə çatdırmışdır ki, Prezident İlham Əliyevin miqrasiya proseslərinin idarə olunmasında "bir pəncərə" prinsipinin tətbiqi haqqında Fərmanı Azərbaycana gələn əcnəbilərin və vətəndaşlığı olmayan şəxslərin ölkə ərazisində qanuni əsaslarla yaşaması və əmək fəaliyyəti ilə məşğul olması üçün müvafiq icazələrin verilməsi, onların yaşayış yeri üzrə qeydiyyata alınması prosedurlarının sadələşdirilməsinə, uyğun dövlət qurumlarının işində şəffaflığın təmin olunmasına xidmət edəcəkdir.

Görüşdə miqrasiya sahəsində birgə əməkdaşlığın daha da genişləndirilməsi və digər məsələlər barədə ətraflı müzakirələr aparılmışdır.

AzərTAc

Azərbaycan.- 2009.- 28 iyun.- S. 6.