"Lider"
telekanalının hər bazar günü saat 13.30-da
tamaşaçılara təqdim etdiyi "İncilər" ədəbi
proqramı mövzu baxımından aktualdır. Maraqla izlənilir,
böyük təəssüratlar
yaradır.
Bu proqramın müəllifi
və aparıcısı xalq artisti, tarzən Zamiq Əliyevdir.
İndi televiziya kanallarında səviyyəsiz, şit
verilişlərin, bayağı şouların baş alıb
getdiyi bir zamanda sanballı, necə deyərlər, ağır
çəkili verilişlərin sayı o qədər də
çox deyil. Vaxtilə televiziyaların az olduğu zaman kəsiyində
muğam həvəskarları hər bazar günü saat
14.00-da radioda muğam konsertinin səslənməsini səbirsizliklə
gözləyərdilər. Maraqlıdır ki, indi
"İncilər"in də öz
tamaşaçıları var.
Adından göründüyü
kimi, verilişdə məhz Azərbaycan mədəniyyətində,
musiqisində, incəsənətində seçilən, həqiqi
mənada inci qiymətində olan şəxsiyyətlər
proqramda çıxış edir, öz arzu və istəklərini
bildirir, sənətlərini nümayiş etdirirlər. Burada
kimləri görmüşük!.. Xalq artistlərindən Arif
Babayevi, Habil Əliyevi, Mələkxanım Əyyubovanı, Səkinə
İsmayılovanı, Mənsum İbrahimovu, Ramiz Quliyevi... Təkcə
ustadlar deyil, gənc istedadlar da Zamiq Əliyevin qonağı
olurlar.
Əlbəttə,
"İncilər" sadəcə konsert proqramı deyil. Burada
maarifçiliklə bağlı, mədəniyyət tarixi ilə
əlaqədar maraqlı söhbətlər gedir. Yəni bu
verilişə baxan hər kəs nəsə əxz edir,
öyrənir və yüksək zövq alır.
Heydər Əliyev
Fondunun prezidenti, YUNESKO və İSESKO-nun xoşməramlı
səfiri, Milli Məclisin deputatı Mehriban xanım Əliyevanın
milli musiqiyə, xalq mahnılarına, xüsusilə də Azərbaycan
muğamlarına göstərdiyi diqqət və
qayğının nəticəsi olaraq indi bu sahədə
böyük çağlayış və inkişaf
duyulmaqdadır. Dünya Azərbaycan muğamlarına heyrət
edir, onun cazibəsinə düşərək öz xoş
duyğularını dilə gətirir. Bu gün
muğamlarımız Azərbaycan mənəviyyatının
pasportuna çevrilib. Məhz bu xoş təəssüratların,
ənənələrin əks-sədasını ekrana gətirən,
tamaşaçıya çatdıran "İncilər"
həqiqətən alqışa layiqdir.
Bəhruz NİFTƏLİYEV
Azərbaycan.- 2009.- 28 iyun.- S. 7.