Onun
uşaqlığı müharibə illərinə təsadüf
edib. Atası İkinci dünya müharibəsinin ilk günlərindən
od-alovun içinə atılıb, geri dönməyib. Körpə
Arif anasının himayəsində qalıb.
Yamən ana bütün
çətinliklərə baxmayaraq, oğluna təhsil vermək
üçün əlindən gələni əsirgəməyib.
Birinci sinfə gedən oğlunun musiqiyə
marağını nəzərə alaraq 1 nömrəli musiqi
məktəbinin tar sinfinə aparıb. İlk ixtisas müəllimi,
istedadlı tarzən Abbasəli Vəliyev, muğam müəllimi
Həsən Babayev gənc Arifin tara, musiqiyə sonsuz məhəbbətini
hiss edib, onunla ciddi məşğul olublar.
1955-ci ildə Gəncə
Musiqi Texnikumuna qəbul olunan Arif daha ciddi əsərlər
çalmağa, sənətin tarixini daha mükəmməl
öyrənməyə başladı. İxtisas müəllimi
olan əməkdar artist, istedadlı tarzən Əli Niftəliyevin
dəyərli məsləhətləri Arifi daha gərgin
işləməyə ruhlandırdı. Aylar, illər
keçdikcə Azərbaycan milli ruhunun cövhəri
sayılan muğamların sirlərinə bələd oldu. İndi
o, çox incə improvizə edən yaradıcı tarzəndir.
Xalq arasında çoxdan mövcud olan havalar onun ifasında təzə
rənglərlə zənginləşir və ona görə
də daha təravətli səslənir.
A.Hüseynov 1959-cu ildə
texnikumu uğurla başa vurub Şəmkir musiqi məktəbinə
təyinat alır. Elə burada işləyə-işləyə
Ü.Hacıbəyov adına Azərbaycan Dövlət
Konservatoriyasının (qiyabi) xalq musiqisi şöbəsinə
qəbul olunur. Gəncəli tarzən 1966-cı ildə xalq
çalğı alətləri orkestri üzrə dirijor və
tar müəllimi ixtisasına yiyələnir. Artıq
yarım əsrdir ki, gənc tarzənlərin yetişməsində
öz sözünü deyir.
Əməyi dəfələrlə
mötəbər təşkilatların fəxri fərmanlarına,
diplomlarına layiq görülən, "Əməkdə fərqlənməyə
görə" və "Əmək veteranı"
medalları ilə təltif edilən Arif Hüseynov bir dirijor
kimi neçə-neçə xalq kollektivinin yaranmasında gərgin
əmək sərf etmişdir.
Bir zaman Azərbaycan Kənd
Təsərrüfatı Akademiyasında fəaliyyət
göstərmiş xalq çalğı alətləri
ansamblının nailiyyətləri çoxlarına bəllidir.
Ansamblın üzvləri keçmiş SSRİ-nin bir
çox şəhərlərində - Moskvada, Sankt-Peterburqda,
Ulyanovskda, Tbilisidə, Kişinyovda və neçə-neçə
başqa yerdə Azərbaycan milli musiqisini tərənnüm
və təbliğ ediblər. Ansambl "Oxu, tar" respublika
müsabiqələrinin diplomunu, Ümumittifaq
festivalının laureatı kimi qızıl medalını
almışdı. Yüksək ifaçılıq tərzinə
görə "Xalq kollektivi" adına layiq
görülmüşdür. A.Hüseynovun əməyi ilə
Gəncə Dövlət Universitetində, alüminium zavodunun
"Metallurq" mədəniyyət sarayında və
başqa yerlərdə fəaliyyət göstərmiş
ansambllar da hər yanda tanınırdı.
Təcrübəli
müəllim, istedadlı tarzən və dirijor, səmimi
insan olan Arif Hüseynov sənətinə həmişə
yaradıcı münasibət bəsləyir,
tapşırılan işlərin öhdəsindən layiqincə
gəlməyə səy göstərir. Musiqi texnikumunun ictimai
həyatında fəallıq göstərir. İyirmi ildir texnikum
həmkarlar təşkilatına rəhbərlik edir.
Yarım əsr bundan əvvəl
sarı simin ovsununa düşən Arif müəllim bu
gün də Azərbaycan musiqisinin ecazkar aləmində
yaşayır və indi o, doğma kollektivin 80 illik yubileyinə
hazırlaşır.
Füzuli RÜZİGAR,
Gəncə
Azərbaycan.- 2009.- 28 iyun.- S. 7.