Yəhudi icmalarının üzvləri ilə görüş

Ölkəmizə rəsmi səfəri çərçivəsində İsrail Prezidenti Şimon Peres iyunun 29-da Bakıdakı "Aşkenaz" sinaqoqunu ziyarət etmiş, Azərbaycandakı yəhudi icmalarının üzvləri ilə görüşmüşdür.

Prezident Şimon Peres əvvəlcə sinaqoqun birinci mərtəbəsindəki ibadət otağında Bakıda fəaliyyət göstərən yəhudi "Xabat Oravnı" tədris məktəbinin şagirdlərinin ifasında "İsrail torpağı" mahnısını dinləmiş, onların ifasında yəhudi milli rəqslərinə tamaşa etmiş, xatirə şəkli çəkdirmişdir.

İsrail Prezidenti sinaqoqda toplaşan yəhudi gəncləri ilə görüşərək onlarla söhbət etmişdir. Bakıya səfərindən razılıq edən Prezident Şimon Peres Azərbaycanda belə bir sinaqoqun və yəhudi tədris məktəbinin olmasından məmnun qaldığını vurğulamışdır.

Sinaqoqun ikinci mərtəbəsində yerləşən ibadət otağında İsrail Prezidenti Şimon Peres ölkəmizdə fəaliyyət göstərən yəhudi icmalarının nümayəndələri, ibadətə gələn yəhudilər ilə görüşmüşdür. Azərbaycanın və İsrailin dövlət himnləri oxunmuşdur.

İsrail Prezidentinin ölkəmizə səfərini mühüm tarixi hadisə hesab edən Dağ Yəhudiləri İcmasının sədri Semyon İxiilov yəhudilərin Azərbaycanda 2700 il əvvəl məskunlaşdığını və bu günədək daim sülh və əmin-amanlıq şəraitində yaşadıqlarını bildirmiş, Azərbaycanda heç bir zaman antisemitizm əhval-ruhiyyəsinin olmadığını qeyd etmişdir.

Azərbaycan Avropa Yəhudiləri İcmasının sədri Gennadi Zelmanoviç bir icma kimi üç əsrə yaxın dövrdə Azərbaycanda yaşadıqlarını və respublikamızın tolerantlıq baxımından bir çox ölkələrə örnək olduğunu vurğulamışdır. Azərbaycanı öz vətənləri hesab etdiklərini deyən icma rəhbəri dövlətimizin onlara daim diqqət və qayğı göstərdiyini bildirmişdir.

Quba rayonunda "Qırmızı qəsəbə" dağ yəhudiləri icmasının sədri Boris Simanduev vətənləri olan Azərbaycanda hər bir qayğı ilə əhatə olunduqlarını qeyd etmişdir. O, ulu öndər Heydər Əliyev kimi, Prezident İlham Əliyevin də onları daim diqqətdə saxladığını bildirmişdir.

Sonra Azərbaycan və İsrail xalqlarının dostluğunun əbədi olması üçün dualar oxunmuşdur.

İsrail Prezidenti Şimon Peres Azərbaycana səfərindən danışaraq ona göstərilən diqqət və qayğıya görə Prezident İlham Əliyevə təşəkkürünü bildirmişdir. Keçirdiyi bir sıra görüşlərdən məmnun qaldığını deyən İsrail Prezidenti Azərbaycanda müxtəlif dinlərdən olan insanların sülh və əmin-amanlıq şəraitində yaşamalarını mühüm hadisə adlandırmışdır. Torpaqlarının 20 faizinin işğal olunmasına, qaçqın və məcburi köçkün problemi ilə üzləşməsinə baxmayaraq, Azərbaycanın bu gün sürətlə inkişaf etdiyini bildirən Prezident Şimon Peres ölkəmizin əsl dost və etibarlı tərəfdaş olduğunu qeyd etmişdir. Ölkəmizə səfərindən sonra Azərbaycan-İsrail dostluğunun daha da inkişaf edəcəyini deyən Şimon Peres Prezident İlham Əliyevi və Azərbaycanın birinci xanımı Mehriban Əliyevanı İsrailə dəvət etdiyini vurğulamışdır.

Prezident Şimon Peres ölkəmizdə fəaliyyət göstərən dini icmaların rəhbərlərinə hədiyyələr təqdim etmişdir.

İsrail Prezidentinə tablo hədiyyə olunmuşdur.

AzərTAc

Azərbaycan.- 2009.- 30 iyun.- S. 5.