İslahatların əsas məqsədi əhalinin həyat səviyyəsinin daha da yüksəldilməsidir

 

Siyasi analitiklər və müşahidəçilər 2008-ci ili ölkə tarixində yadda qalacaq bir sıra məqamlarla xarakterizə edirlər. Ötən il Azərbaycanda prezident seçkiləri keçirildi, ölkə iqtisadiyyatının bütün sahələrində bir sıra uğurlar qazanıldı. Dövlət başçısının imzaladığı sərəncamlar, kompleks inkişafa xidmət edən dövlət proqramları əhalinin sosial problemlərinin yüksək səviyyədə həllinə əhəmiyyətli dərəcədə kömək etdi. Son illərin iqtisadi uğurları kontekstində Yasamal rayonunda qazanılan nailiyyətlər də diqqəti çəkir. Bütün bunlar barədə rayonun 2008-ci ildə sosial-iqtisadi inkişafının yekunlarına və qarşıda duran vəzifələrə həsr olunmuş hesabat yığıncağında ətraflı bəhs edildi.

Yasamal rayon icra hakimiyyətinin başçısı İbrahim Mehdiyev hesabat məruzəsində bildirdi ki, ötən beş ildə və xüsusən 2008-ci ildə dövlət başçısı İlham Əliyevin təsdiq etdiyi "Azərbaycan Respublikası regionlarının sosial-iqtisadi inkişafı Dövlət Proqramı"nın (2004-2008-ci illər) reallaşdırılması nəticəsində ölkə iqtisadiyyatında müşahidə olunan davamlı inkişaf tempi Bakının Yasamal rayonunda da aydın hiss olunmaqdadır. Hesabat dövründə rayonun sənaye müəssisələrində 871 milyon 663 min manatlıq və ya 2007-ci illə müqayisədə 1,4 faiz çox məhsul istehsal edilmişdir. Rayonun iqtisadi və sosial sahələrinin inkişafı üçün əsas kapitala əvvəlki illə müqayisədə iki dəfə çox investisiya yönəldilmişdir. Ötən il rayonda 2794 yeni iş yeri açılmışdır. Bunlardan 389-u təzə yaradılmış müəssisələrin payına düşür.

Əhalinin enerji, təbii qaz və içməli su ilə təchizatının yaxşılaşdırılması sahəsində mühüm işlər görülmüş, geniş miqyasda tikinti-abadlıq, quruculuq işləri aparılmış, yeni yollar, rabitə xətləri çəkilmiş və bərpa olunmuşdur. İcra başçısı bunların reallaşdırılmasında əməyi olan hər kəsə, sənaye, tikinti, nəqliyyat müəssisələrinin kollektivlərinə rayon rəhbərliyinin minnətdarlığını çatdırdı. Bildirdi ki, ötən il rayonda bir sıra yaşayış binaları inşa edilmiş, 35 ünvanda abadlıq işləri aparılmış, yeni park və istirahət guşələri salınmış, 60-a yaxın binanın fasadı əsaslı təmir olunmuşdur. Təhsil, səhiyyə, mədəni-maarif müəssisələrinin maddi-texniki bazasının möhkəmləndirilməsi, məktəblərin informasiya-kommunikasiya texnologiyaları, tədris ləvazimatı ilə təmin edilməsi, əhaliyə göstərilən səhiyyə xidmətinin səviyyəsinin daha da yüksəldilməsi istiqamətində müəyyən işlər görülmüşdür. Yeniyetmə və gənclərin sosial problemlərinin həlli, kütləvi bədən tərbiyəsi və fiziki sağlamlıqlarının qorunması, istedadlı və xüsusi bacarığa malik gənclərin aşkara çıxarılması, onların asudə vaxtlarının səmərəli təşkili, gənclər arasında hərbi vətənpərvərlik tərbiyəsinin gücləndirilməsi sahəsində uğurlu nəticələr qazanılmışdır.

Məruzəçi daxili imkanlar hesabına tamamilə yeniləşdirilmiş və paytaxtımıza xüsusi yaraşıq verən yeni istirahət parkının, Heydər Əliyev Məktəb-Muzeyinin və icra hakimiyyətinin yeni inzibati binasının istifadəyə verilməsini quruculuq işlərinin mühüm mərhələsi kimi dəyərləndirdi. Bildirdi ki, vaxtilə Nazim Hikmət küçəsi və Mətbuat prospektinin kəsişməsində salınmış və uzun müddət baxımsız qalmış 1,7 hektar sahəsi olan park xüsusi layihə əsasında bir il ərzində müasir səviyyədə tamamilə yenidən qurulmuşdur. Yeni park dövlət başçısının Bakı şəhərində parkların və xiyabanların əsaslı təmiri və yenidən qurulması ilə bağlı tapşırıqlarına əsasən abadlaşdırılan guşələrdəndir. Burada yaradılan fəvvarələr və şəlalələr kompleksi, ən hündür yerdə ucaldılan Azərbaycanın dövlət bayrağı parkın yaraşığını qat-qat artırır. İndi rayon sakinləri tez-tez bu guşəyə gəlir, öz istirahətlərini burada keçirirlər. Ətraf binalarda da əsaslı təmir və abadlıq işləri görülmüşdür. Ötən il dekabrın 20-də Azərbaycan Prezidenti İlham Əliyevin parkın açılış mərasimində iştirak etməsi, yeni istifadəyə verilmiş Heydər Əliyev Məktəb-Muzeyi ilə tanış olması, Yasamal Rayon İcra Hakimiyyəti üçün tikilmiş yeni binada yaradılan şəraitlə maraqlanması rayon sakinlərinin ürəyindən olmuşdur.

2008-ci ildə Yasamal rayonu ərazisində aparılan abadlıq işlərinin miqyası olduqca genişdir. Ötən müddətdə onlarca məhəllədə yaşıllaşdırma işləri aparılmış, uşaq idman və əyləncə meydançaları yaradılmışdır. Küçələr və məhəllədaxili yollar təmir edilmiş, binaların giriş qapıları dəyişilmiş, köhnəlmiş dam örtükləri təzələnmişdir. BDU-nun yeni tədris korpusunun istifadəyə verilməsi, Bakı Metropoliteni İdarəsinin inzibati binasının, "Beşmərtəbə" adlanan yaşayış evinin və digər inzibati binaların təzə görkəm alması ötən ilin yaddaqalan yenilikləri hesab olunmalıdır.

Rayonun küçə və meydanlarının abadlaşdırılması, yaşıllıqların artırılması ilə yanaşı, qanunsuz tikinti işlərinin qarşısının alınması istiqamətində də əməli tədbirlər davam etdirilmişdir. Rabitə Kolleci yataqxanasının ərazisində sanitar-gigiyenik qaydalara cavab verməyən, epidemioloji cəhətdən təhlükə mənbəyinə çevrilmiş ərazi təmizlənmiş, ətrafda səliqə-sahman yaradılmışdır.

Metronun "20 Yanvar" və "İnşaatçılar" stansiyalarının çıxışlarında uzun illər qanunsuz ticarətin baş alıb getməsi sərnişinlərlə bərabər sakinlərin də narahatlığına və narazılığına səbəb olurdu. Mövcud vəziyyət ərazinin sanitar-gigiyenik tələblər səviyyəsində saxlanmasına imkan vermirdi. Bu yaxınlarda əhalini narahat edən bu problem də aradan qaldırılmışdır.

Hesabat ilində xidmət strukturlarının işi də diqqət mərkəzində saxlanılmış, payız-qış mövsümünə hazırlıq, əhalinin fasiləsiz olaraq su, qaz, elektrik enerjisi ilə təmin edilməsi, eləcə də əhali və hüquqi şəxslər tərəfindən xidmətlərə görə ödəmələrin vəziyyəti ön plana çəkilmişdir. Əhalinin yoxsulluq şəraitində yaşayan hissəsinin sosial müdafiəsinin gücləndirilməsi rayon icra hakimiyyəti aparatının əsas vəzifələrindən birinə çevrilmişdir. Ötən il sosial müdafiəyə ehtiyacı olan şəhid ailələrinə, əlillərə, valideyn himayəsindən məhrum olmuş azyaşlılara, tənha ahıllara, qaçqın və məcburi köçkünlərə və digər aztəminatlı ailələrə əlamətdar bayram günləri ilə əlaqədar daxili imkanlar hesabına 160 min manatdan çox maddi yardım göstərilmişdir. "Ünvanlı dövlət sosial yardımı haqqında" qanunun tətbiq edilməsi ilə əlaqədar Yasamal Rayon Əhalinin Sosial Müdafiəsi Mərkəzi tərəfindən 2008-ci ildə 3619 ailəyə sosial yardım təyin edilmişdir.

Ölkədə milli təhsil konsepsiyasının reallaşdırılmasına yönəlmiş dövlət proqramlarının icrası ilə əlaqədar ümumtəhsil məktəblərinin, məktəbəqədər uşaq müəssisələrinin maddi-texniki bazasının daha da möhkəmləndirilməsi istiqamətində xeyli iş görülmüşdür. Çoxnövbəliliyin, şagird sıxlığının aradan qaldırılması, təhsilin keyfiyyətinin yüksəldilməsi məqsədilə akademik Zərifə Əliyeva adına məktəbin tikintisi başa çatdırılmış, 60 nömrəli məktəbin binası yenidən tikilmiş, 53 nömrəli məktəbdə 300 şagird yerlik yeni korpus istifadəyə verilmişdir. Bir sıra məktəblərdə və uşaq bağçalarında əsaslı təmir və yenidənqurma işləri aparılmışdır.

Rayon ərazisində cinayətkarlığa qarşı mübarizə, ictimai asayişin qorunması, bu sahədə profilaktik tədbirlərin vaxtında və peşəkarlıqla həyata keçirilməsi cinayət xarakterli hadisələrin azalmasına imkan vermişdir. Rayonun hüquq-mühafizə orqanları narkotik maddələrin qanunsuz dövriyyəsi, soyğunçuluq, quldurluq, xuliqanlıq və s. kimi hallara qarşı təsirli tədbirlər həyata keçirmişlər. 2008-ci ildə rayon bələdiyyəsi imkanlarını səfərbər edərək "Bir bələdiyyə - azı bir layihə" təşəbbüsü və "Abad məhəllə" layihəsi çərçivəsində bir sıra tədbirlər həyata keçirmişdir.

Hazırda rayonda martın 18-də keçiriləcək referenduma ciddi hazırlıq işləri görülür. Yasamal rayon ictimaiyyəti, icra strukturları, əmək kollektivləri, təhsil və səhiyyə ocaqları əldə olunmuş nailiyyətləri daha da möhkəmləndirmək, sosial-iqtisadi inkişafın sürətləndirilməsinə yeni-yeni töhfələr vermək niyyətindədir. Digər çıxışlarda və qəbul edilmiş qərarda bütün bunlar özünün geniş əksini tapdı.

Azərbaycan Respublikası Prezidentinin İcra Aparatının məsul işçisi Tağı Tağıyev yığıncaqda çıxış edərək qarşıda duran mühüm vəzifələrdən danışdı.

 

 

Akif Cabbarlı

 

Azərbaycan.-2009.-28 fevral.-S.6.