Uşaq xəstəxanasının açılışı

Azərbaycan Prezidenti İlham Əliyev martın 2-də Yevlax şəhərində uşaq xəstəxanasının açılışında iştirak etmişdir.

Xəstəxananın kollektivi dövlətimizin başçısını və xanımı Mehriban Əliyevanı hərarətlə qarşıladı.

Prezident İlham Əliyev açılışı bildirən lenti kəsdi və xəstəxana ilə tanış oldu.

Səhiyyə naziri Oqtay Şirəliyev məlumat verdi ki, smeta dəyəri 4 milyon manata yaxın olan xəstəxana kompleksi dövlət vəsaiti hesabına tikilmişdir. Kompleks üçmərtəbəli əsas korpusdan, yoluxucu xəstəliklər korpusundan və yardımçı binalardan ibarətdir.

Əsas korpusun sahəsi 2976 kavdratmetrdir. Burada 86 otaq vardır. 760 kvadratmetr sahəsi olan yoluxucu xəstəliklər korpusunda isə 33 otaq yerləşir.

Xəstəxananın mərkəzləşdirilmiş istilik sistemi var.

Uşaq xəstəxanası poliklinika, qəbul, reanimasiya, somatik və laboratoriya şöbələrindən ibarətdir.

Burada ən müasir rentgen, ultrasəs müayinə aparatları quraşdırılmış, göz və burun-boğaz xəstəlikləri, cərrahiyyə, stomatoloji kabinetlər yaradılmışdır.

Dövlətimizin başçısı və xanımı peyvənd otağı, ultrasəs müayinəsi, rentgen, kardioloji kabinetlərə, oyun zalına, palatalara baxdılar.

Prezident İlham Əliyev tibb işçilərinə xəstəxanada uğurlu fəaliyyət arzulayaraq dedi ki, gözəl xəstəxanadır, həm uşaqların müalicəsi üçün çox gözəl şərait yaradılıb, həm də həkimlər üçün iş şəraiti çox yaxşıdır. Sizi təbrik edirəm və arzulayıram ki, burada siz uşaqlara yaxşı baxasınız, onları yaxşı müalicə edəsiniz.

Həkim Kəmalə MƏMMƏDOVA kollektiv adından minnətdarlıq edərək dedi: - Möhtərəm cənab Prezident, respublikamızın bütün bölgələrində olduğu kimi, Yevlaxda da insanlar Sizin gəlişinizi çox böyük səbirsizliklə, çox böyük sevinclə gözləyirlər. Yevlaxa hər dəfə səfəriniz zamanı şəhərimizə yeni həyat gətirirsiniz.

Cənab Prezident, burada ucalan möhtəşəm, əzəmətli binanın yerində 1934-cü ildə inşa olunmuş köhnə, tam təmirsiz bir bina var idi. Burada şəhərimizin 53 min balaca sakininə xidmət göstərmək üçün, eyni zamanda, qan xəstəliklərinin, infeksion xəstəliklərin müalicəsi üçün lazım olan tibbi şərait yox idi. Elə bu səbəbdən də valideynlər öz xəstə uşaqlarını müalicə etdirmək üçün Bakıya, digər şəhərlərə üz tutmaq məcburiyyətində qalırdılar. İndi isə Sizin diqqət və qayğınız sayəsində ucaldılan möhtəşəm sağlamlıq ocağı bu və ya digər xəstəliklərin müalicəsinə ən böyük töhfəsini verəcəkdir.

Bizim xəstəxananın məhz "Uşaq ili" elan olunan 2009-cu ildə istifadəyə verilməsi körpələr üçün, balacalar üçün ən böyük töhfədir. 2008-ci ildə doğulan uşaqların sayı 2089 nəfər olmuşdur. Bu, 2003-cü illə müqayisədə iki dəfə artıqdır. Şəhərimizin azyaşlı sakinləri ən müasir avadanlıqla təchiz olunmuş bu xəstəxanada ən yüksək tibbi xidmət ala biləcəklər. Bu isə Sizin müasir Azərbaycanın xoşbəxt, sağlam gələcəyi naminə gördüyünüz işlərin bariz nümunəsidir. Möhtərəm Prezidentimiz, bu diqqət və qayğıya görə Sizə dərin minnətdarlığımızı bildiririk.

Azərbaycanın birinci xanımı, Heydər Əliyev Fondunun prezidenti, Milli Məclisin deputatı, əzizimiz, sevimlimiz Mehriban xanım Əliyevanın burada iştirakından istifadə edərək, ölkəmizdə ana və uşaqların sağlamlığına göstərdiyi qayğıya, himayədarlığa görə ona dərin minnətdarlığımızı, ən xoş arzularımızı çatdırırıq.

Möhtərəm Prezident, 2007-ci ilin oktyabr ayında Yevlaxa səfəriniz zamanı şəhərimiz haqqında dediyiniz sözlər heç vaxt yaddaşımızdan silinməyəcəkdir. Siz Yevlaxın Azərbaycanın ən inkişaf etmiş şəhərləri sırasında olduğunu demişdiniz. Həqiqətən də, Sizin sayənizdə şəhərimiz günü-gündən gözəlləşir, simasını dəyişir. Bizim şəraitimiz də günü-gündən yaxşılaşır. Buna görə, belə gözəl, abad, yaraşıqlı şəhərimizə görə Sizə dərin minnətdarlığımızı bildiririk.

Çox sağ olun.

İlham ƏLİYEV: Mən hər dəfə Yevlaxda olanda, burada yenilikləri görəndə çox sevinirəm. Müxtəlif vaxtlarda Yevlaxda dəfələrlə olmuşam. Son beş il ərzində bu, mənim Yevlaxa üçüncü səfərimdir. 2007-ci ildə son dəfə burada olmuşam və o vaxt dediyim sözlər bu gün də qüvvədədir. Yevlax getdikcə daha da gözəlləşir, daha da müasirləşir, çox gözəl binalar tikilir, çox gözəl abadlıq işləri aparılır. Bax, bu meydan, Heydər Əliyev prospektinin abadlaşdırılması, binaların təmiri - bütün bunlar yəqin ki, sizi də sevindirir, məni də sevindirir. Yevlaxa gələn hər bir vətəndaş bunu görür. Mən çox şadam ki, son illər ərzində Yevlaxda nəinki gördüyümüz bu dəyişikliklər baş verib, eyni zamanda, rayonun iqtisadi potensialı möhkəmlənibdir. Deyə bilərəm ki, son beş il ərzində Yevlax iqtisadi inkişaf baxımından Azərbaycanda ən sürətlə inkişaf edən rayonlardan biridir. Yevlaxda son beş ildə ümumi daxili məhsul bir neçə dəfə, 3-4 dəfə artıbdır. Bu, onu göstərir ki, burada görülən işlər, aparılan islahatlar, quruculuq çox yüksək səviyyədədir. Azərbaycanın hərtərəfli inkişafı üçün iqtisadiyyatın bütün sahələri inkişaf etməlidir. Azərbaycanın iqtisadi inkişafı dünyada ən sürətlidir. Son beş ildə bizimlə bu sahədə rəqabət aparmaq qabiliyyətində olan başqa ölkə yoxdur. Bəzi hallarda məsələni dərindən bilməyən, yaxud da ki, Azərbaycana qısqanclıqla yanaşan qurumlar bizim iqtisadi inkişafımızı ancaq neft amili ilə bağlayırlar. Guya neftin hasilatı hesabına Azərbaycanda iqtisadiyyat 2,6 dəfə artıbdır. Amma Yevlaxın timsalında, digər rayonların timsalında biz görürük ki, qeyri-neft sektorunun əsasında iqtisadiyyat necə sürətlə inkişaf edir. Yevlax rayonunun iqtisadi artımı 3-4 dəfə olubdur, digər rayonlarda da buna bənzər mənzərə müşahidə edilir. Yəni bu, onu göstərir ki, ilk növbədə, aparılan islahatlar, qoyulan vəsaitlər, yerli sahibkarlığın inkişafı, yerli icra orqanlarının səmərəli fəaliyyəti bütün bu uğurlara səbəb olubdur.

Siz də Yevlaxda yaşayırsınız, yevlaxlısınız və şəhərin sürətli inkişaf dinamikasını sizdən yaxşı bilən yoxdur. Siz də bunu görürsünüz, mən də görürəm. Mən çox şadam ki, bu gün Yevlax Azərbaycanın ən qabaqcıl rayonlarından biridir və burada gedən işləri çox yüksək qiymətləndirirəm. Yerli icra orqanlarının fəaliyyətini, xüsusilə icra hakimiyyəti başçısının fəaliyyətini çox yüksək qiymətləndirirəm. Bunu da hamı bilməlidir. İş yaxşı gedəndə, bunu hamı deməlidir, pis gedəndə, əlbəttə ki, tənqid olunmalıdır.

Belə gözəl tibbi müəssisənin yaradılması da bugünkü Azərbaycanın reallığıdır. Azərbaycan dövləti, ilk növbədə, sosial məsələlərin həllinə çalışır. Baxmayaraq ki, dünyada indi çox böyük iqtisadi və maliyyə böhranı hökm sürür, Azərbaycanda bunu yəqin ki, çox adam hiss etmir. Vətəndaşlar, büdcə təşkilatlarında işləyən insanlar, əminəm ki, bunu hiss etmirlər. Əksinə, bəzi hallarda qiymətlərin düşməsi hesabına yaşayış səviyyəsi daha da yaxşılaşır. Biz növbəti illərdə də sosial məsələlərin həlli, insanların yaxşı yaşaması, tibbi xidmətin daha da yüksək səviyyəyə qaldırılması üçün səylərimizi əsirgəməyəcəyik, Azərbaycanda bütün bölgələrdə çox güclü tibbi xidmət göstərilməlidir. Bu gün günorta Bərdə şəhərində müasir diaqnostika-müalicə mərkəzinin açılışında iştirak edirdim, indi isə burada uşaq xəstəxanasının açılışındayam. Bir müddətdən sonra biz Yevlaxda böyük xəstəxananın açılışında iştirak edəcəyik, onun da tikilməsi haqqında göstərişlər verilibdir.

Yəni, bir sözlə, biz öz sosial siyasətimizi bundan sonra da davam etdirəcəyik və Yevlaxın timsalında biz bu gözəl nailiyyətləri görürük. Mən ümid edirəm ki, növbəti dəfə Yevlaxa gələndə burada daha yeni gözəl işləri görəcəyəm. Sizə, bütün yevlaxlılara bu işlərdə yeni uğurlar arzulayıram. Bir daha sizi təbrik edirəm.

* * *

Azərbaycan Prezidenti xəstəxananın kollektivi ilə xatirə şəkli çəkdirdi.

AzərTAc

Azərbaycan.-2009.-3 mart.-S. 3-4.