Azərbaycan diasporu Nyu-Yorkda Ermənistanın BMT yanında daimi nümayəndəliyi qarşısında etiraz aksiyası keçirmişdir

Xocalı soyqırımının 17-ci ildönümü ilə əlaqədar ABŞ-ın Nyu-York şəhərində silsilə tədbirlər keçirilmişdir.

Azərbaycan diasporunun təşkilatçılığı ilə fevralın 26-da Ermənistanın BMT yanında daimi nümayəndəliyi qarşısında keçirilən etiraz nümayişi zamanı Xocalı soyqırımına dair məlumatlar və şəkillər Nyu-York sakinlərinə paylanılmışdır. Nümayişin sonunda Ermənistanın işğalçı siyasətini pisləyən bəyanat qəbul edilmiş və Ermənistan nümayəndəliyinə təqdim edilmişdir.

Həmin gün bu tarixi faciə ilə əlaqədar, Azərbaycan Respublikasının BMT yanında daimi nümayəndəliyi tərəfindən BMT-nin Baş katibinə, BMT Katibliyinin əsas idarələrinə və BMT-yə üzv dövlətlərin daimi nümayəndəliklərinə Xocalı soyqırımına dair mətbuat məlumatı göndərilmişdir.

Nyu-York şəhərində yerləşən "Türk Mərkəzi"ndə Xocalı soyqırımı qurbanlarının xatirəsinə həsr edilmiş görüş keçirilmişdir.

Tədbirdə 1992-ci il fevralın 25-dən 26-na keçən gecə Azərbaycanın Xocalı şəhərində erməni və rus hərbi birləşmələri tərəfindən günahsız əhaliyə qarşı törədilmiş soyqırımı aktında həlak olanların xatirəsi bir dəqiqəlik sükutla yad edilmişdir.

Görüşdə Azərbaycanın Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, Milli Məclisin deputatları Qənirə Paşayeva və Həvva Məmmədova, ABŞ-da yaşayan Azərbaycan, türk, yəhudi diasporlarının rəhbərləri və üzvləri, Azərbaycan Respublikasının BMT yanında daimi nümayəndəliyinin əməkdaşları iştirak etmişlər.

İştirakçılara Heydər Əliyev Fondunun nəşr etdirdiyi kitablar və bukletlər paylanılmış, Xocalı soyqırımına həsr olunmuş sənədli film göstərilmişdir.

AzərTAc

Azərbaycan.-2009.-4 mart.-S.5.