Laçınlılar öz doğma yurdlarının tərəqqisi naminə işləmək arzusundadır

2008-ci ilin yekunları və 2009-cu ildə qarşıda duran vəzifələrin müzakirəsinə həsr olunmuş yığıncaqda hesabat məruzəsi ilə çıxış edən Laçın Rayon İcra Hakimiyyətinin başçısı Ramiz Cəbrayılov dövlətin məcburi köçkünlərə qayğı və diqqətindən ətraflı danışdı. Qeyd etdi ki, bu qayğının konkret ifadəsidir ki, hesabat ilində Taxta Körpü ərazisində və laçınlı məcburi köçkünlərin sıx məskunlaşdıqları digər ərazilərdə 3,7 milyon manatlıq tikinti - quraşdırma və abadlıq işləri görülmüşdür.

Hesabat məruzəsində minnətdarlıqla qeyd edildi ki, Prezidentin sərəncamı ilə təsdiq edilmiş "Qaçqınların və məcburi köçkünlərin sosial-iqtisadi vəziyyətinin yaxşılaşdırılması və məşğulluğunun artırılması üzrə Dövlət Proqramı"na edilmiş əlavələrdə Laçın rayonuna xüsusi diqqət yetirilmiş, məcburi köçkünlərin sıx məskunlaşdıqları ərazilərdə bir sıra mühüm tədbirlərin həyata keçirilməsi - Taxta Körpü qəsəbəsindəki "fin" evlərində, daxmalarda məskunlaşmış 3800 məcburi köçkün ailəsinə yeni evlərin tikilməsi, ərazidə çınqıl örtüklü yolların çəkilməsi, yeni subartezian quyularının qazılması, elektrik təchizatının yaxşılaşdırılması, məcburi köçkünlərin məskunlaşdıqları yataqxana və digər ictimai binaların əsaslı və cari təmir olunması nəzərdə tutulmuşdur.

Kənd təsərrüfatı məhsulları istehsalçılarına dövlət dəstəyi laçınlıların da aqrar sektora marağını xeyli artırıb. Hazırda rayon əhalisində və fermer təsərrüfatlarında 27,1 min baş qaramal, 192,8 min baş davar bəslənilir. Taxta Körpü ərazisində hesabat ilində 2947 hektar sahədə 9.127 ton taxıl istehsal edilmişdir. Bu, 2007-ci ildəkindən 2 dəfə çoxdur. Rayonun 1167 nəfər kənd təsərrüfatı istehsalçısına əkin sahələrinin becərilməsində istifadə etdikləri yanacaq və sürtkü yağlarına görə 175870 manat kompensasiya hesablanmış və həmin məbləğin istehsalçılara plastik kartlar vasitəsilə ödənilməsi təmin edilmişdir. Həmçinin 2008-ci ildə "Aqroservis" müəssisəsi üçün əlavə olaraq 7 yeni kənd təsərrüfatı texnikası alınmış, güzəştli qiymətlərlə 50 ton azot, 23 ton superfosfat gübrəsi satılmışdır.

2008-ci ilin yaddaqalan hadisələrindən biri də ilk dəfə olaraq respublikanın müxtəlif elm, təhsil, səhiyyə, mədəniyyət, hüquq-mühafizə və dövlət idarəetmə orqanlarında çalışan laçınlı ziyalıların və iş adamlarının keçən ilin aprelində keçirilmiş görüşüdür. Ənənəvi tədbirlərdən fərqlənən bu görüş məcburi köçkünlər arasında sağlam mənəvi-psixoloji mühitin yaranmasına əhəmiyyətli təsir göstərmişdir.

Məruzədə qeyd olundu ki, uzun illər bəzi idarə və müəssisələr Bakıda fəaliyyət göstərirdi və bu da əhalinin narahatlığına və narazılığına səbəb olurdu. Bunu nəzərə alan rayon rəhbərliyi əhalinin üz tutduğu idarə və müəssisələrin rayonun icra strukturlarının fəaliyyət göstərdiyi Taxta Körpü qəsəbəsinə köçürülməsini təmin etmişdir. Eyni zamanda, qəsəbədə "Kapital Bank"ın Laçın filialı üçün bina tikilib istifadəyə verilmişdir. Əhalinin Sosial Müdafiəsi və Məşğulluq mərkəzləri, Dövlət Sosial Müdafiə Fondunun rayon şöbəsi üçün inzibati binaların tikintisi isə hazırda davam etdirilir.

Hesabat ili rayonda təhsilin inkişafı sahəsində də mühüm mərhələ olmuşdur. ABŞ-ın ölkəmizdəki səfirliyinin xətti ilə Əzizbəyov rayonunun Binə qəsəbəsində fəaliyyət göstərən 46 saylı və Yaponiya səfirliyinin vəsaiti hesabına rayonun Vaqazin 1 saylı orta məktəblər üçün yeni binalar tikilib istifadəyə verilmişdir. Bundan əlavə, ötən il Dövlət Qaçqınkom tərəfindən ibtidai siniflərdə təhsil alan 1300 şagird üçün məktəbli forması, Heydər Əliyev Fondunun xətti ilə 1456 nəfər birinci sinif şagirdinə 17 adda dərs ləvazimatı ilə birlikdə məktəbli çantası paylanmışdır.

Hesabat məruzəsində və yığıncaqda səslənən çıxışlarda dövlət başçısı İlham Əliyevin ardıcıl və qətiyyətli fəaliyyəti sayəsində işğal altında olan torpaqlarımızın tezliklə azad ediləcəyinə böyük əminlik ifadə olundu.

Lazım Quliyev

Azərbaycan.-2009.-5 mart.-S.5.