Vətənpərvərlik və
yüksək peşəkarlıq Heydər Əliyev məktəbindən
qaynaqlanır
Təhlükəsizlik
işçisi yüksək mədəniyyətli, keyfiyyətli
işçi olmalıdır. Elə bir işçi ki,
şairlə də, bəstəkarla da, yazıçı ilə
də, alimlə də, adi vətəndaşla da danışa
bilsin. Yəni belə səviyyədə olmalıdır. Əgər
belə olmasa, o, ağı qaradan, pisi yaxşıdan, cinayəti
səhvdən, səhvi cinayətdən ayıra bilməz.
Heydər Əliyev,
Azərbaycan xalqının ümummilli lideri
Böyük və mənalı ömrünü xalqına, Azərbaycanın möhkəmlənməsinə və yüksəlişinə həsr etmiş Heydər Əliyev özünün siyasi fəhmi və müdrikliyi ilə zəngin dövlətçilik məktəbi, yüksək idarəçilik ənənəsi yaratdı və ümummilli lider zirvəsinə yüksəldi. Ulu öndərin yaratdığı dövlət idarəçiliyi məktəbi - müstəqilliyimizi qorumaq, vətənə, millətə, xalqa sədaqətlə xidmət etmək və bu yolda canını belə əsirgəməmək kimi dəyərlərdən qaynaqlanır.
"Həyatımın sonuna qədər xalqıma sədaqətlə xidmət edəcək və bütün fəaliyyətimi Azərbaycan Respublikasının gələcək inkişafına sərf edəcəyəm". Ulu öndər Heydər Əliyev bu andını 1993-cü ildə müstəqil Azərbaycanın Prezidenti seçildiyi gün xalqına, bütün dünyaya bəyan etdi. Ulu öndərin həyat və fəaliyyətinin elə bir məqamı, elə bir mərhələsi yoxdur ki, onun bu anda sədaqətinin şahidi olmayasan. Və düşünürsən ki, bu şərəfli ömrü yaşamış insan Vətəninə, canı qədər sevdiyi Azərbaycanına, xalqına sədaqət andını öz pak vicdanı qarşısında içib.
Heydər Əliyev xüsusi xidmət orqanlarında fəaliyyətə başladığı gündən güclü məntiqi, dərin siyasi düşüncəsi və uzaqgörənliyi ilə mövcud rejimin zaman-zaman onun millətinin başına açdığı oyunları, sovet rəhbərliyinin bəzi ittifaq xalqlarına ikili standartdan yanaşmasını çox gözəl başa düşdüyündən, hələ gənclik dövründən öz fəaliyyət strategiyasını müəyyənləşdirmişdir. O, həyatda qarşıya qoyulan məqsədlərə çatmaq yolunun daim elm, bilik əldə etmək və öz üzərində çalışmaqdan keçdiyini bildiyindən səy və bacarığını bu istiqamətə səfərbər etmiş və yönəltmişdir.
SSRİ dövlət təhlükəsizlik orqanlarının vəzifə pillələrində Heydər Əliyev kimi irəliləmək hər azərbaycanlıya nəsib olmurdu. O, məhz öz əzmkarlığı, qətiyyəti, ağlı və istedadı ilə istək və arzularına doğru yol açırdı. Bu dahi şəxsiyyətin vəzifə yüksəlişi, atdığı bütün addımlar gizli-aşkar Azərbaycana, doğma xalqına xidmət naminə idi. Ötən əsrin 37-ci illərində repressiya olunmuş Azərbaycan ziyalılar nəslinin ən qabaqcıl nümayəndələrinin bəraət alması, partizan Mehdi Hüseynzadənin "vətən xaini" adı ilə damğalanmasına imkan verməyib, əksinə, ona "Sovet İttifaqı Qəhrəmanı" adının verilməsi, yetişməkdə olan neçə-neçə istedadlı, yaradıcı insanların sovet rejiminin siyasi təqiblərindən qorunması ulu öndərin göstərdiyi misilsiz xidmətlərin yalnız bir hissəsidir.
Ümummilli lider Heydər Əliyev Azərbaycan təhlükəsizlik orqanlarının tarixinə həm də bu vacib strukturun milliləşdirilməsinə nail olmuş və çəkinmədən demək olar ki, XX əsrin ikinci yarısından etibarən tədricən Azərbaycan təhlükəsizlik orqanlarının imkanlarını yeni, milli mənafeyə xidmət istiqamətinə yönəltmiş bir şəxsiyyət kimi də daxil olmuşdur.
Azərbaycanın tarixi keçmişinə böyük diqqət və qayğı ilə yanaşan ulu öndər Heydər Əliyev 1997-ci il martın 23-də Azərbaycan Respublikasının milli təhlükəsizlik orqanları əməkdaşlarının peşə bayramı gününün təsis edilməsi haqqında sərəncam imzaladı. Bu sərəncamla 1919-cu il martın 28-də Azərbaycan Xalq Cümhuriyyətinin Hərbi Nazirliyinin tərkibində xüsusi xidmət orqanı olan kəşfiyyat və əks-kəşfiyyat bölməsinin yaradıldığı gün peşə bayramı günü elan edildi. Həmin gün münasibətilə 1997-ci il iyunun 28-də Milli Təhlükəsizlik Nazirliyində keçirilən yığıncaqda ümummilli lider bu qurumun tarixi keçmişindən, milli dövlətçilikdəki rolundan və yerindən, burada çalışan insanların qarşısında duran vəzifələrdən çox dolğun nitq və qiymətli fikirlər söylədi. Həmin tarixi nitqində Heydər Əliyev DTK-dakı fəaliyyətinə toxunmuş və bu orqanlarda kadrların milliləşdirilməsindən danışaraq demişdir:
"...1953-cü ilin sonunda mən birdən-birə əks-kəşfiyyat şöbəsinə rəis təyin olundum. Bu, nadir hadisə idi. Nə qədər çətinliklər çəkdim ki, 37-38-ci illərdən, 30-cu illərdən qalmış və Azərbaycana xəyanət etmiş insanlardan - onların da əksəriyyəti azərbaycanlı deyildi, amma içərilərində belə yaramaz azərbaycanlılar da var idi, - bu orqanları xilas edək və yeni, gənc adamlar cəlb edək, orqanlarda sağlamlaşma işi aparaq. Bu, çox çətin oldu...
...1953-cü ildən saflaşma, sağlamlaşma prosesi gedibdir və mən də bu prosesin bilavasitə iştirakçısı, son illərdə də təşkitlatçısı olmuşam..."
Tarixi faktların təhlili göstərir ki, 1953-cü ildən sonra tədricən bu orqanlarda kəşfiyyat, əks-kəşfiyyat və digər başqa sahələrdə çox peşəkar azərbaycanlı kadrlar yetişmiş, inkişaf etmiş və bu orqanlar azərbaycanlılaşmışdır. Ümummilli lider bütün fəaliyyəti boyu bu orqana doğma münasibət göstərmiş, onun uğuruna sevinmiş, qüsur və çətinliklərinə biganə qalmamışdır. Heydər Əliyev ötən əsrin 80-ci illərinin sonunu, 90-cı illərinin əvvəllərini xatırlayaraq deyirdi: "Bu orqanın işində, burada kadrların təlim-tərbiyə, təhsil almasında, böyüməsində, inkişaf etməsində böyük zəhmətlərim olmuşdur. Bu zəhmətlərimə görə mənim üçün çox acı idi, ağır dəhşətli idi ki, 1988-ci ildən başladılar bu orqanı dağıtmağa. Burada hər şeyi dağıtmağa başladılar".
Nə qədər acı olsa da 1980-ci illərin sonlarının reallığı belə idi. Amma dağılan təkcə təhlükəsizlik orqanı deyildi. Çoxlarının çəkindiyi, yenilməz, qüdrətli və sarsılmaz iradəsi qarşısında aciz qaldıqları böyük siyasi fiquru Kremldən uzaqlaşdırandan sonra Azərbaycana bütün istiqamətlərdən hücumlar başladı. Bu, 20 Yanvar hadisələri zamanı da özünü büruzə verdi. Son nəfəsini yaşayan sovet imperiyası tərəfindən azadlıq və müstəqillik mücadiləsinə qalxmış Azərbaycan xalqını "cəzalandırmaq üçün" 1990-cı ilin Qanlı Yanvar faciəsi törədildi. Həmin vaxt respublikada hakimiyyət böhranının mövcudluğu, zəif, səriştəsiz və təcrübəsiz "liderlərin" peyda olması, kütlələr arasında isə ümidsizliyin hökm sürməsi, müəyyən dövlət strukturlarında çalışan bəzi məmurların qorxaqlığı və mərkəzə yarınmaq meyilləri faciənin maneəsiz törədilməsinə imkanlar verirdi.
Təqib və təzyiqlər altında olan, qürbətdə yaşamağa vadar edilən Heydər Əliyev bu məqamda xalqına, Vətəninə qarşı təcavüzə, xəyanətə, işğala dözməyib Moskvadan, imperiyanın baş şəhərindən bütün dünyaya sərt bəyanat verdi. Bu tarixi bəyanat çökməkdə olan imperiya ağalarını, onun Bakıdakı əlaltılarını çox ciddi təşvişə saldı. Azərbaycan xalqı, həmin günlərdə kimsəsizləşmiş millətimiz bu səsi gözləyirmiş kimi yenidən kükrədi, coşdu, öz dahi və qüdrətli oğlunu Vətənə səsləyərək özünə rəhbər istədi...
Zaman hər şeyi yerinə
qoydu. Amma bu zamanın axarında min bir əziyyətlə,
ağıl və zəka ilə qurulub yaradılanların fərqinə
varmadan bir anda dağıdılmasının nə
böyük fəlakət olduğunu dərindən anlamaq gərəkdir.
Biz bu günlərin canlı şahidləri kimi gerçəklikləri
yaxşı xatırlayırıq.
Azərbaycan
reallıqlarını, 1993-cü ildəki tam mənzərəni
ulu öndərimiz mətbuata verdiyi müsahibədə lakonik
açıqlayırdı: "İndi Azərbaycanda vəziyyət
belədir: iqtisadiyyat büsbütün
dağılmışdır. O ki qaldı ictimai-siyasi vəziyyətə,
bundan pisini ağıla gətirmək olmaz".
Həyatda elə anlar, elə
tarixi məqamlar olur ki, ictimai-siyasi proseslər nə məntiq,
nə də əxlaq qanunlarına uyğun gəlir. Amma Heydər
Əliyev bütün bu acı, hiddət və qəzəb
doğuran gerçəkliyə öz məntiqi, siyasi
dünyagörüşü, müdrikliyi ilə
yanaşdı və az bir zaman çərçivəsində
məhv olmaq təhlükəsilə üz-üzə qalan,
mürəkkəb, ziddiyyətli, psixoloji cəhətdən
son dərəcə gərgin hadisələri ustalıqla nəzarət
altına aldı və müsbət məcraya yönəltməklə
elə idarə etməyə başladı ki, bütün
dünyanı heyrətdə qoydu. Xalqımızın min illərdən
süzülüb gələn tarixinə, adət-ənənəsinə,
mədəniyyətinə əsaslanan təcrübəyə
söykənən ulu öndərin idarəçilik fəlsəfəsi
sayəsində dağılmaq, parçalanmaq həddində
olan Azərbaycanda arzusunda olduğu müstəqil milli dövlətçiliyin
əsası qoyuldu və ümummilli lider onu cilaladı,
möhkəmləndirdi, əzəmətə gətirdi. O,
ölkəni təhdid edən vətəndaş müharibəsinin,
qardaş qırğınının, dövlət
çevrilişi cəhdlərinin qarşısını
aldı, qarşılıqlı ittihamlara, hakimiyyət
uğrunda gedən çəkişmələrə, ziddiyyətlərə
son qoydu.
"Hamımız
üçün bir böyük məfhum var: Azərbaycan
Respublikası, Azərbaycan xalqı. Bu məfhum ətrafında
hamı sıx birləşməlidir" - deyən ulu öndər
bütün o ağır məqamlarda xalqın gücünə
arxalanır, millətin ona olan sonsuz inamına bel
bağlayırdı.
Bütün bunlarla
yanaşı, ümummilli lider müstəqil dövlətçiliyin
vacib atributlarından biri kimi milli təhlükəsizlik
orqanlarının xalqımızın maraqları və mənafeləri
naminə fəaliyyətinin daha da təkmilləşdirilməsi
işinə mühüm əhəmiyyət verirdi. "Azərbaycanın
dövlət müstəqilliyini qoruyan dövlət
atributlarının hər birisi bizim üçün əhəmiyyətlidir.
Bunların içərisində Milli Təhlükəsizlik
Nazirliyi xüsusi yer tutur". Təbii ki, xüsusi yer
heç də bu orqana verilən səlahiyyət və diqqətlə
ölçülmürdü. Bu xüsusi yer adından da
göründüyü kimi, milli təhlükəsizliyin,
dövlətçiliyin, ölkədə ədalətin və
qanunçuluğun qorunması sahəsində onun üzərinə
düşən vəzifələrlə bağlı idi və
bu gün də belə olaraq qalır.
Həmin vəzifələrin
sadə vəzifələr olmadığı, xüsusi əhəmiyyət
daşıdığı üçün bu orqanlarda
çalışan kadrların da yüksək
hazırlığı, səriştə və peşəkarlığı,
intizamı və sədaqətli olması mühüm əhəmiyyət
kəsb edir.
Ümummilli lider bununla
bağlı milli təhlükəsizlik orqanlarında
çalışanların qarşısında ciddi tələblər
qoymuş və dəyərli məsləhətlər
vermişdir: "Dövlət təhlükəsizlik, yaxud kəşfiyyat
orqanı o vaxt qalib gəlir, öz vəzifəsini yerinə
yetirir ki, orada peşəkar əhval-ruhiyyə olsun, peşəkar
kadrlar və iş üslubu olsun. Peşəkarlıq səviyyəsinin
artırılmasının sərhədi, hüdudu yoxdur. Ona
görə də siz daim peşəkarlığınızın
təkmilləşdirilməsi üzərində işləməlisiniz,
oxumalı, öyrənməlisiniz, çox savadlı, bilikli
insanlar olmalısınız".
Lakin ötən əsrin
80-ci illərinin lap sonları və 90-cı illərin əvvəllərində
ölkənin bütün həyatında baş verən xaos,
özbaşınalıq, hərc-mərclik təhlükəsizlik
orqanlarının fəaliyyətini də iflic vəziyyətə
salmış, orientirlərin itirilməsinə, təhdidlərin
düzgün qiymətləndirilməməsinə, hədəflərin
isə dürüst müəyyən edilə bilməməsinə
gətirib çıxarmışdı. Həmin dövrdə
Azərbaycan Dövlət Təhlükəsizlik Komitəsinin
maddi-texniki bazası əsasında Milli Təhlükəsizlik
Nazirliyi yaradıldıqdan sonra buradakı bir sıra peşəkar,
səriştəli və təcrübəli kadrların
tutduqları vəzifələrdən
uzaqlaşdırılması nəticəsində əməliyyat
potensialının kəsəri də xeyli
azalmışdı.
Azərbaycan
Respublikasının milli təhlükəsizlik naziri
general-leytenant Eldar Mahmudovun qeyd etdiyi kimi, "mühüm
dövlətçilik təsisatlarından olan Milli Təhlükəsizlik
Nazirliyinin fəaliyyətində dönüş mərhələsi
ümummilli liderimiz Heydər Əliyevin Azərbaycan rəhbərliyinə
növbəti qayıdışı ilə
başlanmışdır. Məhz bu dövrdə nazirliyin
özünəməxsus müsbət ənənələrinin
bərpası, onların ən dəyərlilərinin
yaşadılması üçün təşkilati-əməli
tədbirlər görülməsinə başlanıldı".
Bu tədbirlər
sırasında kadrların yetişdirilməsi, onların
hazırlıq səviyyəsinin artırılması Milli Təhlükəsizlik
Nazirliyinin qarşısında duran ən önəmli məsələlərdən
sayılır. Bu işdə yenə ulu öndərimizin
gördüyü əməli tədbir ən yüksək
alqışa layiq oldu. Çünki kadr
hazırlığını ali məktəbsiz təsəvvür
etmək mümkün deyildi. 1998-ci il dekabrın 1-də Azərbaycan
Respublikasının Prezidenti Heydər Əliyevin sərəncamı
ilə Azərbaycan Respublikası Milli Təhlükəsizlik
Nazirliyinin Akademiyası yaradıldı. Akademiya milli təhlükəsizlik
orqanları üçün kadrların təkmilləşdirilməsini,
yüksək ixtisaslı xüsusi təhsilli mütəxəssislərin
hazırlanmasını həyata keçirən qapalı ali hərbi
təhsil müəssisəsidir. Burada 4 fakültə və 16
kafedra fəaliyyət göstərir. Fakültələrdə
tədrisi milli təhlükəsizlik orqanlarında uzun illər
xidmət etmiş və böyük təcrübəyə
malik yüksək rütbəli zabitlər, elmlər namizədləri
və doktorlar, dosent və professorlar həyata keçirirlər.
Bu da kursantların və dinləyicilərin gələcək
xidməti fəaliyyyətləri üçün zəruri
fundamental nəzəri biliklər almasını və
xüsusi hazırlığını təmin edir. Bununla
yanaşı, akademiyada xüsusi fənlər üzrə
mühazirələr oxumaq və praktik dərslər aparmaq
üçün Milli Təhlükəsizlik Nazirliyinin rəhbər
işçiləri və yüksək ixtisaslı mütəxəssisləri
də tədris prosesinə cəlb olunurlar.
Bu günlərdə 10 illik
yubileyini qeyd etmiş akademiyada bütün ixtisaslar üzrə
geniş tədris-metodiki və elmi-tədqiqat işləri
aparılır. İndi Milli Təhlükəsizlik Nazirliyinin
Heydər Əliyev adına Akademiyasında tədris prosesinin
yüksək səviyyədə təmin edilməsi
üçün müasir kompüterlər, bütün
texniki imkanlara malik xüsusi təyinatlı siniflər və
kabinetlər, zəngin fonda malik xüsusi və ümumi
kitabxanalar, mədəni-kütləvi tədbirlərin
keçirilməsi üçün gözəl tərtibatlı,
audio-video qurğularla təchiz olunmuş klub, zəruri
avandanlıq, trenajorlarla quraşdırılmış idman
zalları, meydançaları kursantların və dinləyicilərin
ixtiyarına verilmişdir. Akademiyanın elmi-pedaqoji kollektivi tərəfindən
hazırlanmış tədris vəsaitləri, metodiki təlimatlar,
monoqrafiyalar, elmi araşdırmalar akademiyanın müasir
poliqrafiya avadanlığı ilə təchiz edilmiş nəşriyyat
bazasında, irihəcmli xüsusi dərsliklər isə Milli
Təhlükəsizlik Nazirliyinin Nəşriyyat-Poliqrafiya Mərkəzində
dərc edilir. Akademiyaya qəbul olunmuş kursantlar dövlət
təminatına götürülür, hərbi geyimlərlə,
gündə üç dəfə yeməklə və
yüksək səviyyədə məişət şəraiti
yaradılmış yataqxana ilə təmin edilirlər. Onlara
təhsil aldıqları dövrdə müasir tibbi
avadanlıqlarla təchiz edilmiş yüksək səviyyəli
tibbi xidmət göstərilir. Akademiyada təhsil alan hər
bir kursanta təqaüd verilir. 2004-2005-ci tədris ilindən
milli təhlükəsizlik naziri tərəfindən
ümummilli lider Heydər Əliyevin adına hər biri 90
manat məbləğində 10 xüsusi təqaüd təsis
edilmişdir. Azərbaycan Respublikasının Prezidenti, Ali
Baş Komandan İlham Əliyevin diqqət və
qayğısı, Milli Təhlükəsizlik Nazirliyinin rəhbərliyi
tərəfindən bu siyasətin həyata keçirilməsinə
gündəlik nəzarət nəticəsində
akademiyanın ölkənin təhlükəsizlik
orqanlarının gələcək fəaliyyətində əhəmiyyətli
dərəcədə rol oynayacağı şübhəsizdir.
Bir neçə ildir ki, akademiya öz yüksək
hazırlıqlı kadrları ilə milli təhlükəsizlik
orqanlarının şəxsi heyətinin sıralarını
möhkəmləndirir və potensialını artırır.
2005-ci il dekabrın 20-də
möhtərəm Prezident İlham Əliyevin sərəncamı
ilə Azərbaycan Respublikası Milli Təhlükəsizlik
Nazirliyinin Akademiyasına Heydər Əliyevin adı verildi.
Milli Təhlükəsizlik Nazirliyinin bütün kollektivi bu ədalətli
tarixi qərarı ömrünün 25 ilini təhlükəsizlik
orqanlarında şərəflə xidmət etmiş,
xalqına, Vətəninə yüksək sədaqət
nümunəsi nümayiş etdirmiş, bu orqanın milliləşməsində
böyük xidmət göstərmiş Heydər Əliyevə
olan hörmət və məhəbbətin nümunəsi kimi
alqışlamışdır. Bu, akademiyanın
kursantlarını daha böyük səylə ulu öndərin
adına layiq oxumağa, onun arzuladığı, tələb
etdiyi kadr kimi yetişməyə çağırır.
2006-ci il martın 27-də
akademiyanın həyatında daha bir əlamətdar hadisə
baş verdi. Azərbaycan Respublikasının Prezidenti cənab
İlham Əliyevin bu ali təhsil ocağında ümummilli
liderimizin abidəsinin və "Şöhrət" muzeyinin
açılışında iştirakı, Silahlı
Qüvvələrin Ali Baş Komandanının akademiyaya
Döyüş bayrağı verməsi və bir qrup əməkdaşımızı
mükafatlandırması bütün şəxsi heyətin
yaddaşında silinməz izlər buraxmışdır.
Akademiyada görülən işləri yüksək qiymətləndirən
möhtərəm Prezident demişdir: "Akademiya ilə
Bu gün Milli Təhlükəsizlik
Nazirliyi ən yeni tarixini, müasir, beynəlxalq norma və
standartlara uyğun inkişaf dövrünü yaşayır.
Ümummilli lider Heydər Əliyevin bütün sahələrdə
siyasi xəttini uğurla davam etdirən Azərbaycan
Respublikasının Prezidenti cənab İlham Əliyev milli təhlükəsizlik
orqanlarının fəaliyyətini də daim diqqət mərkəzində
saxlayır, bu sahənin inkişafı, müasir standartlar əsasında
fəaliyyətini təmin etmək üçün dəstəyini
heç zaman əsirgəmir. Milli Təhlükəsizlik
Nazirliyində baş verən ciddi dəyişikliklər,
maddi-texniki bazanın möhkəmləndirilməsi, iş
şəraitinin yaxşılaşdırılması, əməkdaşlarımızın
sosial müdafiəsinin gücləndirilməsi, əmək
haqlarının, hərbi rütbəyə görə
maaşların artırılması, böyük bir qrup əməkdaşın
mənzil şəraitinin
yaxşılaşdırılması məhz bu diqqət və
qayğının nəticəsidir.
Əlbəttə,
bütün bunlar ümummilli vəzifələrin yerinə
yetirilməsinə öz təsirini göstərməmiş
deyil. Məhz bunun nəticəsidir ki, Milli Təhlükəsizlik
Nazirliyi son illər terror-təxribat fəaliyyətlərinin
qarşısının alınmasında, mütəşəkkil
cinayətkarlığın digər təhlükəli təzahürlərinə
qarşı mübarizədə uğurlu nəticələr əldə
etmişdir. Əməkdaşlarımızın yüksək
peşəkarlıqla həyata keçirdikləri əks-kəşfiyyat
və əməliyyat-axtarış tədbirləri nəticəsində
beynəlxalq terrorçu təşkilatlarla əlaqələri
olan, yerli və xarici vətəndaşlardan ibarət təhlükəli
cinayətkar qruplar ifşa edilərək zərərsizləşdirilmişdir.
2007-ci ilin may ayında Azərbaycan
Respublikası Prezidentinin sərəncamı ilə təsdiq
olunmuş Milli Təhlükəsizlik Konsepsiyası Milli Təhlükəsizlik
Nazirliyinin qarşısında da çox ciddi və
mühüm vəzifələr qoymuşdur. Həmin vəzifələrin
reallaşmasında bu orqanların kadr siyasətinin rolu
mühümdür. Ona görə də kadrların
seçilib yerləşdirilməsi zamanı onların peşə,
fiziki və mənəvi hazırlığına, bilik səviyyəsinə
və dünyagörüşünə xüsusi önəm
verilir. Bu seçimdə yenə ulu öndər Heydər Əliyevin
xüsusi xidmət orqanlarının qarşısında
qoyduğu tələblər və prinsiplər əsas
götürülür. Ümummilli liderin layiqli siyasi varisi
möhtərəm Prezident İlham Əliyevin dediyi kimi,
"Bizə sağlam millət lazımdır, sağlam, yeni gənc
nəsil lazımdır. Bilikli, savadlı, bütün
dünyada gedən proseslərə bələd olan, gözəl
təhsil alan, öz biliyi, savadı ilə Azərbaycanın gələcək
inkişafına töhfə verəcək gənc nəsil
lazımdır, vətənpərvər gənc nəsil
lazımdır".
Bu gün cəmiyyətdə
baş verən proseslər milli təhlükəsizlik
orqanlarında kadr siyasətinin müntəzəm təkmilləşdirilməsini
tələb edir. Ona görə də yaxın gələcək
üçün proqnozlaşdırılan proseslər nəzərə
alınmaqla Milli Təhlükəsizlik Nazirliyində struktur
islahatları aparılmış, yeni xidmət sahələri
yaradılmış, bir sıra istiqamətlər daha da
genişləndirilmişdir. Təhlükəsizlik
orqanlarına həqiqi hərbi xidmətə vətənpərvər,
yüksək mədəniyyətə, geniş
dünyagörüşünə malik, müvafiq psixoloji və
fiziki hazırlıqlı gənclər qəbul olunur, hər
bir namizədə fərdi yanaşılır, gələcək
fəaliyyətlərində əqli və fiziki
potensiallarından səmərəli istifadə olunması
üçün onlar daha dərindən, hərtərəfli
öyrənilir. Bu sahədə Kadrlar Baş İdarəsinin əməkdaşları
üzərlərinə düşən böyük məsuliyyət
hissini dərk edir və bu işin öhdəsindən layigincə
gəlməyə çalışırlar.
Son illər kadrların
seçilib yerləşdirilməsi sahəsində
ardıcıl iş aparılmasına, bir sıra istiqamətlərdə
kadr potensialının gücləndirilməsinə və
keyfiyyət tərkibinin
yaxşılaşdırılmasına baxmayaraq, bu sahədə
fəaliyyət görülən işlərlə məhdudlaşmır.
Dünyanın siyasi-iqtisadi mənzərəsi dəyişdikcə,
beynəlxalq aləmdə və regionda gedən proseslərə
uyğun olaraq təhdidlər və hədəflər də dəyişir.
Deməli, kadrlarla iş prosesində də adekvat tədbirlər
görülməlidir. Bu proses dinamikdir, daim davam edəcəkdir.
Sadəcə olaraq zamanla ayaqlaşmaq, durmadan təkmilləşmək
lazımdır. Milli təhlükəsizliyin etibarlı təmin
olunmasında əldə edilmiş uğurların qorunub
saxlanması və dönmədən artırılması, ilk
növbədə, Milli Təhlükəsizlik Nazirliyində
düşünülmüş kadr siyasətinin
aparılması və beynəlxalq təcrübənin
müsbət tərəflərini mənimsəməklə
peşə hazırlığına xüsusi diqqətin
yetirilməsi nəticəsində mümkün ola bilər.
Milli Təhlükəsizlik
Nazirliyinin şəxsi heyəti üçün Vətənə
və xalqa sədaqətin, tapşırılmış sahə
üçün məsuliyyət hissinin Heydər Əliyev
nümunələri daim örnəkdir. Akademiyaya
Döyüş bayrağının verilməsi mərasimində
milli təhlükəsizlik naziri general-leytenant Eldar Mahmudov bu məsələlərə
toxunaraq demişdir: "Bizim qarşımızda duran ən
ümdə vəzifə gəncləri dövlətçilik
və vətənpərvərlik, Heydər Əliyev
amallarına sədaqət ruhunda tərbiyə etməkdir.
Hazırda kadrların seçilib yerləşdirilməsi və
təlim-tərbiyəsində bu prinsiplər rəhbər
tutulur, eyni zamanda, gənclərimizin fiziki və peşə
hazırlığına, müasir bilik səviyyəsinin və
dünyagörüşünün formalaşmasına
böyük önəm verilir".
Milli Təhlükəsizlik
Nazirliyində məhz duzgün kadr siyasətinin həyata
keçirilməsinin nəticəsidir ki, terrorçuluqla, onun
beynəlxalq formaları ilə, transmilli cinayətkarlıqla
uğurlu mübarizə aparılır, ölkə ictimaiyyəti
və tərəfdaş dövlətlər tərəfindən
təqdir olunan ciddi nailiyyətlər qazanılır. Vətənə,
dövlətə və xidməti borca sədaqət, icra
intizamına qüsursuz riayət edilməsi uğurların rəhnidir.
Nizam-intizam və tərbiyəvi
işin təşkili həmişə kadrlarla işin prioritet
istiqamətlərindən olub. Ümummilli liderimiz Heydər Əliyev
bu məsələyə xüsusi önəm verərək
bildirmişdir: "Nizam-intizam Milli Təhlükəsizlik
Nazirliyinin işinin əsasını təşkil edən
amillərdən biridir. Siz hərbi qulluqdasınız. Hərbi
qulluq birinci növbədə nizam-intizam üzərində
qurulur. Nizam-intizam gündən-günə möhkəmlənməlidir.
Milli Təhlükəsizlik Nazirliyində işləyən
sıravi adam da, zabit də, rəhbər işçi də
bilməlidir ki, nizamnamə, Konstitusiya, Milli Təhlükəsizlik
Nazirliyinin Əsasnaməsi sizin üçün rəhbər
və istiqamətverici sənədlərdir. Öz peşəkarlıq
səviyyənizi yüksəltmək sizin vəzifəniz
olmalıdır. Bu, hər bir ölkənin təhlükəsizlik
orqanı üçün vacib olan amildir".
Bu tövsiyələri əldə
rəhbər tutan Milli Təhlükəsizlik Nazirliyinin rəhbərliyi
şəxsi heyətin icra, hərbi və xidməti intizama,
peşə, döyüş və fiziki
hazırlığına xüsusi diqqət yetirir.
Milli Təhlükəsizlik
Nazirliyinin bugünkü fəaliyyəti çox maraqlı,
eyni zamanda çox məsuliyyətli bir ictimai-siyasi və əməliyyat
şəraitində cərəyan edir. Qloballaşma,
dünyanı bürüyən iqtisadi böhran və
inflyasiya, beynəlxalq terrorçuluğun yeni forma və təzahürləri,
müəyyən dini radikallaşma prosesləri, təcavüzkar
separatçılıq və ekstremizm, enerji və ərzaq təhlükəsizliyi
məsələləri özünü daha qabarıq
büruzə verir. Azərbaycan Respublikasının Prezidenti cənab
İlham Əliyevin tarazlaşdırılmış və
düşünülmüş müstəqil dövlətçilik
siyasəti, milli mənafelərə xidmət edən siyasi və
iqtisadi kursu sayəsində ölkəmiz bütün çətinliklərə
mətanətlə sinə gərir, sınaqlardan dəyanətlə
çıxır, öz tərəqqi xəttini, hər bir
sahədə sabitliyi, son illər ardıcıl surətdə
yüksələn iqtisadi inkişaf tempini qoruyub saxlaya bilir. Azərbaycanın
milli təhlükəsizlik orqanlarının da başlıca
vəzifəsi ölkənin daxili və xarici siyasəti
üçün əlverişli şərait yaratmaq, təhdidləri
proqnozlaşdırmaq, onların qarşısını almaq və
zərərsizləşdirməkdir. Milli Təhlükəsizlik
Nazirliyi bu yönümdə bütün qüvvə və
vasitələrini qarşıya qoyulmuş vəzifələrin
layiqincə icrasına səfərbər edir. Kollektivdə
yaranmış sağlam əhval-ruhiyyə, müsbət təmayüllər
gələcək nailiyyətlər üçün lazımi
zəmindir.
"Sabitlik, təhlükəsizlik
Azərbaycanda bütün məsələlərin həlli
üçün başlıca şərtdir və Azərbaycanda
təhlükəsizlik ən yüksək səviyyədədir,
sabitlik qorunub saxlanılır" - deyən ölkə
Prezidenti, Ali Baş Komandan cənab İlham Əliyevin bu
inamı bizim üçün birbaşa proqram, vəzifə,
həm də böyük məsuliyyətdir.
Milli dəyərlərə
sadiq olan, ölkənin maraqlarının keşiyində
ayıq-sayıq dayanan Milli Təhlükəsizlik Nazirliyinin əməkdaşları
öz fəaliyyətlərini bundan sonra da gücləndirəcək
və Azərbaycan xalqının, dövlətinin
qarşısında duran böyük, taleyüklü vəzifələrin
həyata keçirilməsində fəal iştirak edəcəkdir.
Əlimusa Əliyev,
MTN-in Baş İdarə rəisi,
general-mayor
Azərbaycan.-2009.-6 mart.-S.4.