Bakıda Rusiya İnformasiya-Mədəniyyət Mərkəzi açılmışdır

Martın 12-də Bakıda Rusiya İnformasiya-Mədəniyyət Mərkəzi açılmışdır.

Mərkəzin açılış mərasimində iştirak edən Rusiyanın xarici işlər naziri Sergey Lavrov ölkəsinin bütün sahələrdə Azərbaycan ilə əlaqələrin inkişafından məmnun olduğunu bildirmişdir. Nazir demişdir: "Biz humanitar sahədə əlaqələrə xüsusi önəm veririk. Bir qədər əvvəl həm Azərbaycanda, həm də Rusiyada ölkələrimizin mədəniyyət illəri keçirilmişdir. Biz yalnız ikitərəfli formatda əməkdaşlıqla kifayətlənmirik. Əlaqələr MDB çərçivəsində də inkişaf edir. Bu gün burada Rusiya İnformasiya-Mədəniyyət Mərkəzinin açılışı humanitar sahədə münasibətlərin daha da inkişaf etdirilməsi üçün yeni addımdır".

S.Lavrov mərkəzin işinin yalnız Rusiya vətəndaşları üçün deyil, həm də azərbaycanlılar üçün maraqlı olacağına əminliyini vurğulamışdır. Nazir ölkələrimiz arasında münasibətlərdən danışaraq demişdir ki, biz maraqlı şəxslərlə ünsiyyət üçün bu mərkəzin qapılarının həmişə açıq olmasını arzulayırıq.

Rusiyalı nazir mərkəzin açılışı ilə bağlı Azərbaycan rəhbərliyinə xüsusi minnətdarlığını bildirmişdir.

Xarici işlər naziri Elmar Məmmədyarov Azərbaycan ilə Rusiya arasında humanitar əlaqələrin ümummilli lider Heydər Əliyevin xüsusi diqqəti və qayğısı sayəsində inkişaf etdiyini demişdir.

E.Məmmədyarov vurğulamışdır ki, bu gün də ölkəmizdə rus dilinə və mədəniyyətinə böyük önəm verilir. Azərbaycanda rus dilli məktəblər fəaliyyət göstərir, Azərbaycan Dövlət Rus Dram Teatrı əhali arasında sevilən incəsənət ocaqlarından biridir. Bu yaxınlarda isə Prezident İlham Əliyev M.V.Lomonosov adına Moskva Dövlət Universitetinin Bakı filialının açılışında iştirak etmişdir.

Azərbaycanın xarici işlər naziri rusiyalı həmkarına MDU-nun Bakı filialının rektoru, professor Nərgiz Paşayevanı təqdim etmişdir.

Sonra qarşılıqlı xatirə hədiyyələri təqdim olunmuşdur. Milli Məclisin deputatı, yazıçı-publisist Elmira Axundova ulu öndər Heydər Əliyev haqqında yazdığı 4 cildlik kitabını Sergey Lavrova hədiyyə etmişdir.

Mərkəzlə yaxından tanışlıq zamanı bildirilmişdir ki, Rusiya İnformasiya-Mədəniyyət Mərkəzinin əsas vəzifəsi ictimaiyyəti rus və Rusiya Federasiyası xalqlarının tarixi və mədəniyyəti, iqtisadi potensialı ilə yaxından tanış etmək, Azərbaycan təşkilatları ilə əlaqələr qurmaq və inkişaf etdirməkdir. Burada rus dili kursları fəaliyyət göstərəcək, müxtəlif konfranslar, "dəyirmi masa"lar, yeni kitabların təqdimatı keçiriləcəkdir. Mərkəzin zəngin kitabxanasında isə həm rus, həm xarici nəşrlər toplanmışdır. Sərgi-konsert zalında mütəmadi fotoekspozisiyalar, sərgilər, bayram tədbirləri təşkil olunacaqdır. Mərkəzin fəaliyyətində vacib istiqamətlərdən biri də Azərbaycandakı rus icması arasında mədəni-maarifləndirmə işinin aparılmasıdır.

Mərkəz ilə tanışlıqdan sonra S.Lavrov Azərbaycandakı həmvətənləri ilə də görüşmüş, Rusiya Federasiyasının MDB, xaricdə yaşayan həmvətənlər və beynəlxalq humanitar əməkdaşlıq işləri üzrə Federal Agentliyinin Azərbaycan nümayəndəliyinin də artıq fəaliyyət göstərdiyini demişdir.

Mərasimdə Azərbaycan rəsmiləri, diplomatlar, Bakı və Xəzəryanı bölgə yeparxiyasının yepiskopu Aleksandr ata, Milli Məclisin deputatı, Azərbaycanda rus icmasının sədri Mixail Zabelin, Azərbaycan kazaklarının atamanı Viktor Mereşkin və digər şəxslər iştirak etmişlər.

AzərTAc

Azərbaycan.-2009.-13 mart.-S.2.