Türkiyənin Xəritə Baş Komandanlığının nümayəndə heyəti Dövlət Torpaq və Xəritəçəkmə Komitəsində olmuşdur

Dövlət Torpaq və Xəritəçəkmə Komitəsindən (DTXK) bildirmişlər ki, martın 11-də qurumda Türkiyə Müdafiə Nazirliyi Xəritə Baş Komandanlığının nümayəndə heyəti ilə görüş keçirilmişdir. Görüşdə Türkiyə ilə Azərbaycan arasında əməkdaşlıq haqqında müqaviləyə əsasən bu il yerinə yetiriləcək işlər razılaşdırılmış və ortaya çıxan problemləri vaxtında aradan qaldırmaq məqsədilə görüləcək tədbirlər müəyyənləşdirilmişdir.

Nümayəndə heyətinin komitənin sədri akademik Qərib Məmmədov ilə görüşündən və müvafiq danışıqlardan sonra qonaqlar DTXK-nın struktur bölmələrində də olmuşlar.

Dövlət Aerogeodeziya Müəssisəsində və Bakı Kartoqrafiya Fabrikində keçirilən görüşlərdə Türkiyənin Müdafiə Nazirliyi Xəritə Baş Komandanlığı ilə birgə yerinə yetiriləcək işlər müzakirə olunmuş və müvafiq qərarlar qəbul edilmişdir.

AzərTAc

Azərbaycan.-2009.-13 mart.-S.3.