Azərbaycan Prezidenti İlham Əliyev Milli Təhlükəsizlik Nazirliyinin Mədəniyyət Mərkəzinin əsaslı təmir edilmiş binası ilə tanış olmuşdur

Martın 14-də Azərbaycan Respublikasının Prezidenti İlham Əliyev Milli Təhlükəsizlik Nazirliyinin Mədəniyyət Mərkəzinin və həmin mərkəzin nəzdində fəaliyyət göstərən musiqi məktəbinin əsaslı təmir edilmiş binaları ilə tanış olmuşdur.

Dövlətimizin başçısını burada milli təhlükəsizlik naziri general-leytenant Eldar Mahmudov qarşıladı.

Prezident İlham Əliyev Azərbaycanın xalq rəssamı, dünya şöhrətli fırça ustası Tahir Salahovla səmimi görüşdü.

Hazırda Mərkəzin binasının yerləşdiyi ərazidə 1912-ci ildə polyak kilsəsi (kostyol) tikilmişdi. Layihənin müəllifi tanınmış polyak memarı Yozef Ploşko idi. Onun layihəsi əsasında tikilmiş binalar indi də Azərbaycan paytaxtını bəzəyir. 1931-ci ildə bolşeviklərin göstərişi ilə kostyol dağıdılmış, 1938-ci ildə isə onun yerində F.Dzerjinski adına klubun təməli qoyulmuşdu. Lakin Böyük Vətən müharibəsinin başlaması ilə əlaqədar tikinti işləri dayandırılmışdı. Memar Hüseyn Məcidovun layihəsi əsasında tikilən bina 1953-cü ildə istifadəyə verilmiş və uzun müddət dövlət əhəmiyyətli müxtəlif tədbirlərin keçirildiyi yer olmuşdur. O vaxtdan bəri binada əsaslı təmir aparılmamışdı. Respublika Nazirlər Kabinetinin 2008-ci il 31 yanvar tarixli qərarı ilə həmin bina Milli Təhlükəsizlik Nazirliyinin balansına verilmişdir.

Dövlətimizin başçısı əvvəlcə ümummilli liderin binanın foyesində qoyulmuş büstünə baxdı, Mərkəzdə yaradılmış Heydər Əliyev muzeyində oldu. Milli Təhlükəsizlik Nazirliyinin arxivlərindən və dövlət arxivindən götürülmüş, çoxu ilk dəfə nümayiş etdirilən fotoşəkillərlə tanış oldu.

Dövlətimizin başçısı Mərkəzin 352 tamaşaçı yeri olan, ən müasir avadanlıqla təchiz edilmiş konsert salonuna, VİP-otağa, fəxri qonaqlar üçün lojalara baxdı.

Prezident İlham Əliyev binanın əvvəlki vəziyyətini əks etdirən kiçik fotoekspozisiya ilə də tanış oldu. Mərkəzin 100 yerlik kiçik salonunda ümummilli lider Heydər Əliyevin ölkənin milli təhlükəsizlik sisteminin təşəkkülündə rolundan bəhs edən sənədli filmə baxdı.

Binanın dördüncü mərtəbəsində 80 yerlik restoran və Azərbaycan təbiətinin bənzərsiz gözəlliklərini əks etdirən rəngkarlıq əsərlərinin nümayiş etdirildiyi qış bağı yerləşir.

Sonra dövlətimizin başçısı Mərkəzin binasına bitişik, uşaq vaxtı özünün oxuduğu musiqi məktəbinə gəldi. Məktəbin direktoru, vaxtilə gənc İlham Əliyevin müəllimi olmuş Nailə Kərimova 1969/1970-ci tədris ilinə aid qiymət cədvəlini Prezidentə təqdim etdi. Bu sənəddən görünür ki, fortepiano sinfində oxuyan İlham Əliyev yalnız əla qiymətlər alırmış.

Prezident İlham Əliyev musiqi məktəbi şagirdlərinin çıxışlarını dinlədi, daha sonra fotoekspozisiya ilə tanış oldu.

AzərTAc

Azərbaycan.-2009.-15 mart.-S.2.