Azərbaycan Yunanıstan üçün çox mühüm ölkədir

Azərbaycan Yunanıstan üçün çox mühüm ölkədir və rəsmi Afina ölkələrimiz arasında əlaqələrin hərtərəfli inkişafında maraqlıdır.

Bu sözləri Yunanıstanın ölkəmizdəki səfiri İonannis Metaksas martın 16-da Milli Məclisdə Azərbaycan-Yunanıstan parlamentlərarası əlaqələr üzrə işçi qrupunun üzvləri ilə görüşdə söyləmişdir.

Milli Məclisin mətbuat xidmətindən bildirmişlər ki, parlamentin Sosial siyasət daimi komissiyasının sədri, Azərbaycan-Yunanıstan parlamentlərarası əlaqələr üzrə işçi qrupunun rəhbəri Hadi Rəcəbli Prezident İlham Əliyevin bu ilin fevralında Yunanıstana dövlət səfərindən söz açmış və bildirmişdir ki, bu səfər ölkələrimiz arasında əlaqələrin möhkəmlənməsinə və əməkdaşlığın dərinləşməsinə yeni təkan vermişdir. Komissiya sədri münasibətlərimizin inkişafında parlamentlərin xüsusi rolu olduğunu vurğulamış, işçi qruplarının fəaliyyətlərinin daha da genişləndirilməsinin vacibliyini qeyd etmişdir.

Səfir İonannis Metaksas Azərbaycan Prezidentinin Yunanıstana səfərini böyük tarixi hadisə adlandırmış, imzalanan sənədlərin siyasi və iqtisadi baxımdan əhəmiyyətini qeyd etmişdir.

Görüşdə ölkələrimiz arasında turizm əlaqələrinin yaradılması və möhkəmləndirilməsi, orta sahibkarlığın inkişafına təkan verəcək biznes forumların təşkili, sadələşdirilmiş viza rejiminin tətbiqi, tələbə, müəllim və elmi işçilərin mübadiləsi, ali məktəblərdə qarşılıqlı dil və mədəniyyət mərkəzlərinin açılması, kənd təsərrüfatı sahəsində əməkdaşlığın genişləndirilməsi, qarşılıqlı səfərlərin intensivləşməsi təşəbbüsləri irəli sürülmüşdür.

Söhbət zamanı Ermənistan-Azərbaycan, Dağlıq Qarabağ münaqişəsinin həllinin vacibliyinə də toxunulmuşdur. İ.Metaksas Azərbaycan üçün çox mühüm əhəmiyyət kəsb edən bu məsələni xüsusi diqqətdə saxladığını və problemin həlli istiqamətində ATƏT-in səylərini dəstəklədiyini bildirmişdir. Diplomat qeyd etmişdir ki, Yunanıstan dövlətlərin ərazi bütövlüyü prinsipinə hörmətlə yanaşır.

AzərTAc

Azərbaycan.-2009.-17 mart.-S.3.