Astara gündən-günə abadlaşır

Astara Azərbaycanın qədim torpağıdır, Azərbaycanın ən gözəl guşələrindən biridir. Burada çox gözəl təbiət var, çox gözəl şərait var. Dəniz var, meşələr var, dağlar var, böyük nemətlər var. Ancaq xalqımızın ümummilli lideri Heydər Əliyev demişkən, ən böyük nemət, ən böyük sərvət burada yaşayan insanlardır. Vətənpərvər, zəhmətkeş insanlardır. O insanlar ki, daim, bütün dövrlərdə Azərbaycanın dövlət müstəqilliyinin güclənməsi istiqamətində fəaliyyət göstərmişlər, bu işə öz əməyini vermişlər.

İlham ƏLİYEV

Modul tipli ilk stansiya burada tikilib

Dörd-beş il əvvəl Astarada gün ərzində əhaliyə vur-tut 5-6 saat enerji verilirdi. Gərginlik çox aşağı olduğundan onun işığında uşaqlar dərs hazırlaya, əhali elektrik cihazlarından, qızdırıcılardan, soyuduculardan istifadə edə bilmirdi. Təbii qazın olmaması Astara camaatının qayğılarını daha da artırırdı. Məcbur olub qışda ətraf meşələrdəki qiymətli ağacları kəsib doğrayırdılar. Digər işlər də ürəkaçan deyildi. Əməkhaqları, pensiyalar cüzi idi. "Yaman günün ömrü az olar" - deyiblər. Ulu öndər Heydər Əliyevin xalq üçün gördüyü işlər çox çəkmədən səmərə verməyə başladı. Ölkə başçısı cənab İlham Əliyevin məqsədyönlü iqtisadi siyasəti Astarada böyük canlanma yaratdı. Regionların sosial-iqtisadi inkişafı Dövlət Proqramı həyata vəsiqə aldı. Proqrama əsasən, Ərçivan kəndində gücü 90 meqavat olan modul tipli elektrik stansiyası tikildi. Ölkə başçısı 2005-ci il sentyabrın 8-də stansiyanın təməlqoyma və 2006-cı il fevralın 3-də istifadəyə verilməsi mərasimlərində iştirak etdi. Stansiya istifadəyə verildikdən sonra cənub bölgəsində əhalinin elektrik enerjisi ilə təminatında əsaslı dönüş yarandı. Yeni-yeni istehsal, xidmət sahələri işə düşdü.

Yeri gəlmişkən, son beş ildə Prezident Astaraya 3 dəfə səfər etmişdir. Astaralılar hər dəfə İlham Əliyevi böyük hərarət və gül-çiçəklə qarşılamışlar. Prezident hər dəfə rayon ictimaiyyətinin nümayəndələri ilə görüşlər keçirmiş, neçə-neçə mühüm əhəmiyyətli obyektin təməlinin qoyulmasında, istifadəyə verilməsində iştirak etmişdir. "Azər-Cənub" MMC-nin beynəlxalq yük terminalı, "Astara Çay-2" ASC, Telman kəndindəki konserv zavodu, "Şindan" hoteli, Astara Qaz-Kompressor Stansiyası və digərləri bu qəbildəndir. Rayonda son illər 3 min 798 iş yeri açılmışdır ki, bunun da 3 min 493-ü daimidir.

Quruculuq, abadlıq işləri göz oxşayır

Ulu Tanrı Astaradan səxavətini əsirgəməmişdir. Zümrüd meşələr, mavi dəniz, çaylar, bulaqlar, limon, narıngi, portağal, feyxoa bağları... 2004-cü ildən üzü bu yana, ölkəmizin hər yerində olduğu kimi, Astarada da əsl tikinti-quruculuq işlərinə başlanıldı. Dövlət proqramına əsasən, rayona vəsait ayrıldı.

İndi Astaraya yolu düşənlər burada aparılan quruculuq işlərinə heyran qalır. Ulu öndərin adını daşıyan prospekt əsaslı şəkildə yenidən qurulub. Müasir işıqlandırma sistemi, yeni binalar, ticarət şəbəkələri, yolun hər iki tərəfində hörülmüş daş hasarlar, layla diqqət çəkir.

Orijinal layihə ilə tikilən Heydər Əliyev muzeyi, ulu öndərin tunc heykəli, dördulduzlu "Şindan" hoteli, uşaqların əyləncə mərkəzi, musiqi məktəbi, mədəniyyət evi, Qəhrəmanlar parkı göz oxşayır, könül açır. Meydan həmişə qələbəlik olur. Gənclər asudə vaxtlarının bir hissəsini burada keçirir. Atalar-analar, babalar-nənələr nəvələrini tez-tez buraya gətirirlər.

Quruculuq işləri keçən il daha böyük həcmdə olmuşdur. Sərhədyanı Rüsumsuz Ticarət Mərkəzi, şəhid ailələri, Qarabağ, Çernobıl və Əfqanıstan əlilləri üçün 32 mənzilli yaşayış binası, Dövlət Sosial Müdafiə Fondunun rayon şöbəsi üçün inzibati bina, Gənclər evi, asfalt zavodu istifadəyə verilmişdir. Şəhərdəki Azərbaycan prospekti, digər küçə və xiyabanlar, parklar yenidən qurulmuşdur. 4 kilometrlik Pensər-Şiyəkəran-Şahağacı yolunun əsaslı təmiri başa çatdırılmışdır. Görülən işlərdə Astara şəhər bələdiyyəsinin də öz payı vardır.

Astara şəhəri Xəzərin 100-150 metrliyində yerləşir. Son illər dənizin səviyyəsinin qalxması nəticəsində yaranan təhlükəni aradan qaldırmaq məqsədilə sahilbərkitmə işləri davam edir.

Təhsil, səhiyyə və mədəniyyət ocaqları yeniləşir

Ümummilli lider Heydər Əliyevin təhsil sahəsindəki siyasəti ölkə Prezidenti tərəfindən uğurla davam etdirilir. Bunu Astaranın da timsalında aydın görmək olar. Dövlət proqramı və "Yeniləşən Azərbaycana yeni məktəb" layihəsi çərçivəsində 2008-ci il xüsusilə əlamətdar olmuşdur. Heydər Əliyev Fondunun maliyyə dəstəyi ilə Astara şəhər 4 saylı orta məktəbi üçün 380, Şahağacı kənd 2 saylı və Səncərədi kənd orta məktəblərinin hər biri üçün 360, Şiyəkəran kənd 2 saylı orta məktəbi üçün 420 və Marzəsəy kənd əsas məktəbi üçün 180 şagird yerlik yeni binalar tikilib istifadəyə verilmişdir.

Astara şəhər 3 saylı, Ərçivan kənd 4 saylı orta məktəbləri əsaslı şəkildə yenidən qurulmuşdur. Kijəbə qəsəbə və Rinə kənd orta məktəblərində təmir işləri başa çatmaq üzrədir. Adları çəkilən məktəblər eyni zamanda lazımi avadanlıqlarla təmin olunmuşdur.

Həyata keçirilən tədbirlər təlim-tərbiyə işlərinə müsbət təsir göstərmişdir. 113 məzun respublikamızın müxtəlif ali məktəblərinə daxil olmuşdur. Təngərüd kənd orta məktəbinin riyaziyyat müəllimi Seyran Babayev respublikanın əməkdar müəllimi, Maşxan kənd orta məktəbinin müəllimi Müzəffər Hacıyev "İlin ən yaxşı müəllimi" adına layiq görülmüşlər. M.Hacıyev həm də Prezident təqaüdçüsü olmuşdur.

Rayonda əhaliyə göstərilən səhiyyə xidmətinin səviyyəsi də ilbəil yaxşılaşır. Keçən il mərkəzi xəstəxananın cərrahiyyə, reanimasiya, təcili yardım, terapiya şöbələri və poliklinika abadlaşdırılmışdır.

Hər qala, tarixi abidə keçmişi özündə yaşadan sənət nümunəsidir. Yadelli işğalçılardan qorunmaq, milli-mənəvi dəyərləri yaşatmaq zəminində yaranıb bu abidələr. Astaranın ərazisində 102 belə abidə var və hazırda onların hər biri nadir sənət incisi kimi qorunur, mühafizə olunur.

Bütövlükdə mədəniyyətin inkişafı rayonda diqqət mərkəzində saxlanılır. Əvvəlki dövrlərdə qazanılmış nailiyyətlər uğurla davam etdirilir. Təsadüfi deyil ki, keçən ilin may ayında uşaq muğam ifaçılarının 4-cü ümumrespublika müsabiqəsi burada keçirilmişdir. Rayon uşaq musiqi məktəbinin şagirdi Elyana Məhərrəmli laureat adını qazanmışdır. Ümummilli lider Heydər Əliyevin 85 illik yubileyinə həsr edilmiş gənclərin "İstedad" müsabiqəsi, "Kitab", "Uşaq kitab - bilik" bayramları da burada olmuşdur.

Elin gözü tərəzidir

Astara şəhərinə giriş Heydər Əliyev prospektindən başlayır. İrəlilədikcə yolun hər iki tərəfində yeni inşa olunan tikililər, səliqə-sahman nəzər-diqqəti cəlb edir. Onları maraqla seyr etdiyimi görən sürücü: - Deyəsən, çoxdandır Astaraya gəlmirsiniz? - sualını verir. Üç aydan bir az çox olar, amma çox iş görülüb, - deyirəm. - Kaş Astarada həmişə belə tikinti-abadlıq işləri aparılaydı. Onda bura əsl cənnət olardı, - deyir.

Təkcə sürücü deyil, bu cənub şəhərinin hansı sakinini dindirsən, burada görülən işlərdən ətraflı məlumat verəcək.

Hamlet Əliyev, Rayon Ağsaqqallar Şurasının sədri: - Astarada müxtəlif işlərdə çalışmışam. Xalqımızın ümummilli lideri Heydər Əliyev 11 dəfə rayonumuzda olmuş, burada yaşayan insanlarla görüşmüş, rayonun iqtisadi, mədəni inkişafı üçün göstərişlər, tapşırıqlar verilmişdir. Həmin görüşlər xoş xatirə kimi hər bir astaralının qəlbində indi də yaşayır, gələcəkdə də yaşayacaq. Ulu öndər fenomen şəxsiyyət idi. Azərbaycanın hər bir bölgəsinin xüsusiyyətlərini, adət-ənənəsini çox gözəl bilirdi. Ölkəmizi ötən əsrin 90-cı illərinin fəlakət burulğanından o xilas etdi. Yoxsa kim bilir, taleyimiz necə olardı. Bu gün, respublikamızın hər bir rayonu kimi, Astara da inkişaf edir. Rayonda heç vaxt indiki qədər tikinti-quruculuq işləri görülməyib. Bunlar ümummilli liderin işini uğurla davam etdirən Prezident İlham Əliyevin regionlara göstərdiyi diqqət və qayğının nəticəsidir. Astara Rayon İcra Hakimiyyəti qüvvələri yaxşı səfərbər edir, həyata keçirilən quruculuq, abadlıq işlərinin daha keyfiyyətli olması üçün əlindən gələni əsirgəmir.

Kamal Səfərov, Astara şəhər sakini: - Ulu öndər Heydər Əliyev Astaraya tez-tez gələrdi. O görüşlərin çoxunda mən də iştirak etmişəm. Bu gün respublikamızın hər bir güşəsi kimi ümummilli liderimizin Cənub mirvarisi adlandırdığı Astara da tərəqqi edir. Bir neçə il əvvəl rayonumuzda işıq, qaz və yol sarıdan problemlər vardı. İndi Astaranın hər bir yaşayış məntəqəsi fasiləsiz elektrik enerjisi alır. Əksər qəsəbə və kəndimizdə "mavi alov" şölələnir. Yollarımız əsaslı şəkildə yenidən qurulur. Prezident İlham Əliyev son 5 ildə 3 dəfə Astaraya səfər edib. Elektrik stansiyasının, qaz-kompessor qurğusunun, digər obyeklərin açılışında iştirak edib. Dövlət proqramı ilə bağlı yeni-yeni məktəblər, xəstəxanalar, mədəniyyət ocaqları tikilib, təmir olunub. Görülən işləri sadalamaqla qurtarmaz.

Həllini gözləyən işlər də var

Astara əsasən kənd təsərrüfatı rayonudur. Digər sahələr kimi, aqrar bölmənin inkişaf etdirilməsi üçün də burada son illər müəyyən işlər görülmüşdür. Əkinçilik, heyvandarlıq məhsulları istehsalı xeyli artmışdır. Çəltikçiliyə maraq güclənir. 2007-ci ilə kimi rayonda hər il nəzərdə tutulduğundan artıq sitrus meyvələri yetişdirilmişdir. Lakin 2008-ci ilin yanvarında düşən güclü şaxtalar bağlardakı çoxillik meyvə ağaclarını tələf etdi. Yalnız dağətəyi ərazidə bağların bir qismi, 10 faizi az ziyan çəkdi. Respublika Kənd Təsərrüfatı Nazirliyi, digər əlaqədar təşkilatlar tərəfindən bağbanlara dəymiş ziyanın ödənilməsi ilə bağlı, demək olar ki, heç bir kömək göstərilmədi.

Pay torpaqlarından heç də səmərəli istifadə olunmur, onların müəyyən hissəsi əkilib becərilmir. Halbuki vaxtilə həmin sahələrdə bol tərəvəz məhsulu yetişdirilərək keçmiş SSRİ-nin müxtəlif şəhərlərinə göndərilib. Çayçılığın inkişafı, meyvə-tərəvəz məhsulları emalı ilə bağlı məsələlərin həlli vaxtı artıq çatmışdır.

Astarada turizmin, balıqçılığın inkişafı üçün əlverişli şərait vardır. Rayon icra hakimiyyətinin başçısı Mahir Quliyev söhbət zamanı imkanlı iş adamlarının bu və ya digər məsələlərlə bağlı Astaraya az üz tutduqlarından gileyləndi, onlar üçün burada lazımi şəraitin olduğunu vurğuladı.

Yurdumuza bahar gəlir. Baharda Astara daha günəşli və gözəl olur. Səhərlər Xəzərdən doğan günəş öz saf, təmiz, zərrin şüalarını ətrafa yayır. Hər tərəf rəngbərəng gül-çiçəyə bürünür. Astaralılar gələcəyə böyük nikbinliklə baxırlar. Onlar əmindirlər ki, növbəti 5 il ərzində 2009-2013-cü illərdə digər məsələlər də öz həllini tapacaq, insanlar daha xoşbəxt və firavan yaşayacaqlar. Bu arzu, bu istəklə də onlar martın 18-də keçiriləcək ümumxalq səsverməsində (referendumda) fəal iştirak etməyi qərara almışlar.

Seyran Cavadov

Azərbaycan.-2009.-17 mart.-S.7.