"Muğam aləmi" beynəlxalq festivalı yüksək səviyyədə təşkil
ediləcəkdir
AMEA-nın
prezidenti akademik Mahmud Kərimovun, təhsil naziri Misir Mərdanovun,
mədəniyyət və
turizm nazirinin müavini Sevda Məmmədəliyevanın, Azərbaycan
Bəstəkarlar İttifaqının
sədri, xalq artisti Firəngiz Əlizadənin, AMEA-nın
vitse-prezidenti, muzeyin direktoru, akademik Nailə Vəlixanlının
iştirak etdikləri
mətbuat konfransında
bildirilmişdir ki,
festival çərçivəsində beynəlxalq elmi simpozium, beynəlxalq muğam müsabiqəsi və silsilə konsertlər təşkil olunacaqdır. Bu tədbirlərə
dünyanın müxtəlif
ölkələrini təmsil
edən 100-dək qonaq
qatılacaqdır. Martın
18-dən 20-dək keçiriləcək və dünyanın müxtəlif ölkələrindən
ənənəvi Şərq
musiqisini tədqiq edən 30-dək alimin, musiqi xadiminin iştirak edəcəyi beynəlxalq simpoziumun məqsədi müasir dövrdə muğam sənətinə diqqət
və qayğının
artırılması, muğam
fəlsəfəsi, peşəkar
musiqi ifaçılığının,
muğamın təbliği,
tədrisi, müasir dinləyici mədəniyyətinin
formalaşdırılması, klassik musiqi irsinin qorunması məsələlərinə diqqət
yetirməkdir. Simpoziumun materialları
müxtəlif dillərə
tərcümə edilərək
çap olunacaqdır.
YUNESKO və
İSESKO-nun xoşməramlı səfiri, Heydər Əliyev Fondunun prezidenti, Milli Məclisin deputatı Mehriban xanım Əliyevanın təşəbbüsü
ilə keçirilən
beynəlxalq festivalın
əhəmiyyətini vurğulayan
mətbuat konfransının
iştirakçıları bu tədbiri Azərbaycan mədəniyyətinin,
musiqisinin dünyada daha geniş tanıdılması, təbliği
istiqamətində atılan
hadisə kimi qiymətləndirmişlər.
Beynəlxalq muğam müsabiqəsi martın 22-dən 24-dək Azərbaycan
Dövlət Kukla Teatrında keçiriləcəkdir. Müsabiqəyə İran, Suriya, İraq, Mərakeş, Özbəkistan, Tacikistan,
Qazaxıstan, Misir, Türkiyə və Almaniyadan olan 67 iştirakçı qatılacaqdır.
Azərbaycanı isə
yarışmada beş ifaçı
- Təyyar Bayramov, Vəfa Orucova, Babək Niftəliyev, Arzu Əliyeva və Səbuhi İbayev təmsil edəcəkdir. Heydər Əliyev Fondunun, Mədəniyyət və
Turizm Nazirliyinin, Bəstəkarlar İttifaqının
təşkilatçılığı, Azərbaycan Mədəniyyətinin
Dostları Fondunun və Təhsil Nazirliyinin dəstəyi ilə təşkil olunan müsabiqədə baş mükafata layiq görülən iştirakçıya 20 min avro,
1-3-cü yerləri tutanlar
isə müvafiq olaraq 15 min, 10 min və 5
min avro alacaqdır.
Festival çərçivəsində Bakıya gələcək
qonaqlar Novruz bayramı şənliklərində
də iştirak edəcəklər.
YUNESKO-nun baş direktoru Koişiro Matsuuranın da iştirak edəcəyi beynəlxalq
festivalın rəsmi açılışı martın
20-də Beynəlxalq Muğam
Mərkəzində, təntənəli
bağlanış mərasimi
isə martın 25-də
Heydər Əliyev Sarayında olacaqdır.
AzərTAc
Azərbaycan.-2009.-18 mart.-S.7.