Azərbaycan Prezidenti İlham Əliyev Rusiya Federal Məclisi Federasiya Şurası sədrinin müavini Svetlana Orlovanın başçılıq etdiyi nümayəndə heyətini qəbul etmişdir

Azərbaycan Respublikasının Prezidenti İlham Əliyev martın 18-də Rusiya Federal Məclisi Federasiya Şurası sədrinin müavini Svetlana Orlovanın başçılıq etdiyi nümayəndə heyətini qəbul etmişdir.

Svetlana Orlova ölkəmizdə referenduma hazırlığın yüksək səviyyədə təşkil olunduğunu, bir çox məntəqədə veb-kameraların quraşdırıldığını, dairələrin texniki vasitələrlə tam təchiz edildiyini vurğuladı. O, 40-dan artıq seçki məntəqəsində müşahidələr apardıqlarını bildirərək dedi ki, saat 12-yə qədər həmin məntəqələrdə seçicilərin 43 faizdən çoxunun referendumda iştirak etməsi yüksək göstəricidir.

Qonaq ölkəmizə səfəri müddətində ümumilikdə Azərbaycanda gedən inkişaf proseslərinin şahidi olduqlarını söylədi.

Dövlətimizin başçısı ölkəmizdə referenduma hazırlıq işlərinin yüksək səviyyədə təşkil edildiyini bildirdi. Prezident İlham Əliyev Azərbaycanda bütün sahələrdə sürətli inkişafa nail olunduğunu vurğuladı.

Görüşdə Azərbaycanla Rusiya arasında ikitərəfli münasibətlərin müxtəlif istiqamətlərdə, o cümlədən parlamentlərarası əməkdaşlıq sahəsində də uğurla inkişaf etdiyi bildirildi, Rusiya nümayəndə heyətinin səfərinin qarşılıqlı əlaqələrin daha da genişlənməsinə töhfə verəcəyinə əminlik ifadə olundu.

AzərTAc

Azərbaycan.-2009.-18 mart.-S.1.