Azad, ədalətli və şəffaf şəraitdə baş tutan referendum xalqın iradəsini ifadə etdi

Azərbaycan Respublikası Konstitusiyasına əlavələr və dəyişikliklərlə bağlı ümummxalq səsverməsi - referendum 29 saylı Səbail seçki dairəsində də seçicilərin fəallığı ilə müşahidə olundu. Dairənin 30 məntəqəsində siyahı üzrə 39015 nəfər seçici qeydə alınmışdır.

29 saylı Səbail seçki dairəsinin 4 saylı seçki məntəqəsinin sədri Lalə Əliyeva məntəqə üzrə 1048 seçicinin olduğunu bildirdi. Seçki prosesi qanunvericiliyin tələblərinə uyğun həyata keçirilir. Məntəqədə 4 nəfər qeydiyyatdançıxma vərəqəsi ilə səs verib. Seçki prosesini Böyük Britaniya və Fransa səfirliyindən olan nümayəndələr də izləyiblər və ilkin rəyləri müsbət olub. Seçki məntəqəsində bütün zəruri texniki avadanlıqlar - veb-kameralar da quraşdırılıb. Seçicilərin maarifləndirilməsi və referenduma çıxarılan məsələlərin vətəndaşlara dolğun çatdırılması yönümündə seçkiöncəsi aparılmış işlər öz bəhrəsini verir. Seçicilər onlar üçün yaradılmış demokratik mühitdən razılıqlarını bildirir və öz mövqelərini sərbəst ifadə edirlər.

4 saylı məntəqədə səs verən Xədicə Abbasova səsvermənin şəffaf keçdiyini və hər hansı xoşagəlməz halla rastlaşmadığını bildirdi. Qeyd etdi ki, qanunvericiliyə uyğun aparılan təşviqat kampaniyasında Konstitusiyaya edilən əlavələr və dəyişikliklər barədə müfəssəl məlumat əldə etdik. Səsverməyə gələndə artıq mövqelərimizi tam aydınlaşdırmışdıq. Hesab edirəm ki, hər kəs atacağı addımı əvvəlcədən müəyyənləşdirməli və ölkəmizin daha parlaq gələcəyi üçün mövqeyini ortaya qoymalıdır.

Həmin məntəqədə səsvermədə iştirak etmiş Ofeliya Məmmədova qeyd etdi ki, seçicilərin öz iradələrini sərbəst şəkildə ifadə etmələri üçün hər cür şərait yaradılıb. Referendumqabağı aparılan işlər vətəndaşların referenduma marağının daha da artmasına və seçici fəallığının təmin olunmasına gətirib çıxarıb. Səsvermədə seçicilərin yüksək fəallığı aparılan uğurlu təşviqat kampaniyasının məntiqi nəticəsidir.

29 saylı Səbail seçki dairəsinin 5 saylı məntəqəsinin sədri Solmaz Həsənova bildirdi ki, Əsas Qanuna nəzərdə tutulan dəyişikliklərə münasibətdə seçicilərin fəallığı müşahidə edilir. Məntəqə üzrə qeydə alınmış 1420 seçici günün birinci yarısında artıq səsvermə hüququndan istifadə edib. Səsvermə prosesini 20 müşahidəçi - 15 yerli və 5 xarici müşahidəçi izləyir. Heç bir qanun pozuntusu faktı aşkarlanmayıb. 2 nəfər qeydiyyatdançıxma vərəqəsi ilə səs verib. Referendum təşviqatın uğurla aparılması nəticəsində Azərbaycan Respublikasının Konstitusiyasına əlavələr və dəyişikliklər barədə ölkə vətəndaşları kifayət qədər məlumat alıblar. Seçicilərin maarifləndirilməsi, təklif edilən düzəlişlərin mahiyyətinin izah edilməsi istiqamətində seçkiöncəsi həyata keçirilən çoxsaylı tədbirlər öz nəticəsini verdi. Seçicilər səsvermədə aktiv iştirak etməklə vətəndaşlıq borclarını yerinə yetirmiş oldular.

Qeyd olunan məntəqədə "ELS" Müstəqil Araşdırmalar Mərkəzi tərəfindən "exit-poll" həyata keçirilirdi. Qurumun nümayəndəsi Şamil Qafarov seçki məntəqəsinin çıxışında seçicilərin rəy sorğusunun keçirilməsində heç bir çətinliklə üzləşmədiklərini bildirdi. Rəy sorğusunda iştirak edən vətəndaşlar həvəslə mövqelərini bildirir və səsvermə prosesindən razılıq edirdilər. Ş.Qafarov əlavə etdi ki, seçicilərin səsvermədə yüksək fəallığı müşahidə olunur. Mərkəz əməkdaşlarımız tərəfindən sorğu aparılan məntəqələrdə vətəndaşların Konstitusiyaya əlavələr və dəyişikliklərə münasibəti öyrənilir və səsvermə başa çatan kimi ictimaiyyətə nəticə barədə məlumat veriləcək.

Məntəqədə müşahidə aparan Naibə Nəcəfova səsvermə prosesinin qanunvericiliyə uyğun həyata keçirildiyini və ciddi qanun pozuntusuna rast gəlmədiyini bildirdi. Səs verən vətəndaşların Konstitusiyaya nəzərdə tutulan əlavələr və dəyişikliklər barədə lazımi qədər məlumatları var və sərbəst şəkildə mövqelərini bildirirlər.

23 saylı Nəsimi-Səbail seçki dairəsində də seçicilərin fəallığı aydın müşahidə olunurdu. Xatırladaq ki, dairə üzrə səsvermə hüququ olan 37698 seçici qeydə alınmışdı.

Adı çəkilən dairənin 28 saylı seçki məntəqəsində 1350 seçici qeydə alınmışdır. Bu məntəqədə də səsvermənin şəffaf keçdiyi və qanun pozuntusuna rast gəlinmədiyi prosesi izləyən yerli müşahidəçilər tərəfindən etiraf olundu. Rusiya Federasiyasından, Gürcüstan Respublikasından olan müşahidəçilərin ilkin rəylərində də səsvermənin azad, şəffaf keçdiyi qeyd olunub. Seçicilər kənar müdaxilə olmadan sərbəst şəkildə səsvermədə iştirak edirdilər.

Məntəqədə müşahidə aparan Rahib Mürsəlov heç bir qanun pozuntusuna rast gəlmədiyini bildirdi. Vətəndaşların normal səs vermələri üçün hər cür imkan yaradılıb. Seçici siyahısında adları göstərilən seçicilər şəxsiyyət vəsiqələrini təqdim etdikdən sonra bülletenlərini alaraq səsvermə otaqlarına keçirlər. Səsvermə otağından çıxan seçicilərin simasında xoş ovqat hiss olunur.

Seçki məntəqəsində olan digər müşahidəçi Qədir Əfəndiyev bildirdi ki, səhər tezdən müşahidəçilərin iştirakı ilə səsvermə qutuları yoxlanıldı və möhürləndi. Seçicilərin fəallığı günün birinci yarısında daha çox müşahidə olundu. Vətəndaşların səsverməsi üçün məntəqədə hər cür şərait yaradılıb və xoşagəlməz hala da rast gəlinməyib. Seçkilərin qanun pozuntusu olmadan başa çatacağına ümidvaram.

Yasamal

Rayon ərazisində üç əsas - 15, 16, 17, bir qarışıq - 12 saylı Qaradağ-Binəqədi-Yasamal seçki dairələri yerləşir. 15, 16, 17 saylı seçki dairələrinin 91 məntəqəsində 128 min 894 seçicinin səs verməsi üçün lazımi şərait yaradılmışdır.

Məntəqələrdəki fəallıq elə ilk baxışdan diqqəti cəlb edirdi. Öncə 15 saylı Yasamal birinci seçki dairəsində olduq. Dairənin sədri Sərdar Süleymanov bildirdi ki, burada 30 daimi, 4 qapalı seçki məntəqəsi yerləşir. Əlavə olaraq bir sıra xarici dövlətlərdə - Rusiyada, Ukraynada, Belarusda, Moldovada, Gürcüstanda, Qazaxıstanda, Baltikyanı ölkələrdə 11 seçki məntəqəsi fəaliyyət göstərir. Bu dairədə xaricdə yaşayan həmyerlilərimiz də daxil olmaqla 46955 seçici var. Səsvermə prosesi bütün seçki məntəqələrində yerli və xarici müşahidəçilər tərəfindən izlənilir. Bunun üçün onlara hər cür şərait yaradılmışdır. S.Süleymanov vurğuladı ki, təbliğat müddətində əhali arasında Konstitusiyaya edilən əlavə və dəyişikliklərlə bağlı "dəyirmi masa"lar, müzakirələr keçirilmiş, ümumxalq səsverməsinə çıxarılan məsələlərin həqiqi mahiyyətinin dərk olunması üçün xüsusilə gənclər arasında maarifləndirmə işləri aparılmışdır. Ona görə də bu gün Azərbaycan vətəndaşları referenduma çıxarılan müddəalarla əlaqədar öz mövqelərini müəyyənləşdirməkdə çətinlik çəkmirlər. 15 saylı Yasamal birinci dairə seçki komissiyasının üzvü, bitərəf Elçin Həmidov da söhbətə qatılaraq dedi ki, Konstitusiyanın 29 maddəsinin tam oxunub başa çatdırılması üçün vaxtı nəzərə alıb hər məntəqəyə 10-12 kabinə və 4 səsvermə qutusu qoyulmuşdur.

16 saylı Yasamal ikinci seçki dairəsində isə 19 məntəqədə 42788 nəfər səsvermə hüququna malikdir. Dairə seçki komissiyasının sədri Sədaqət Seyidzadə bildirdi ki, dairənin tərkibində əlavə olaraq hərbi hissədə və bəzi xarici ölkələrdə - İran, Birləşmiş Ərəb Əmirlikləri, Misir, Çin, Səudiyyə Ərəbistanı və Türkiyədə də seçki məntəqələri fəaliyyət göstərir. Ona görə də ümumilikdə bu dairədə 47816 nəfər ümumxalq səsverməsində iştirak edir. Sədr səsvermənin mütəşəkkil keçməsi üçün qabaqcadan ciddi hazırlıq görüldüyünü vurğuladı:

- İndiyədək heç bir qanun pozuntusuna yol verilməyib, saxtakarlıq halları qeydə alınmayıb. Əhali yüksək əhval-ruhiyyə ilə ümumxalq səsverməsində iştirak edir. Referenduma gələnlərin fəallığı isə artır. Bu siyasi aksiya xalqımız üçün əlamətdar tarixi bir gün kimi yadda qalacaqdır.

Bakı Dövlət Universitetinin binasında yerləşən 16 saylı Yasamal ikinci seçki dairəsinin 11 saylı məntəqəsində bayram əhval-ruhiyyəsi var idi. Vətəndaşlar müxtəlif partiyalardan, təşəbbüs qruplarından olan müşahidəçilərin gözləri qaşısında qeydiyyatdan keçir, bülleteni alıb, Əsas Qanunumuza təklif edilən əlavələr və dəyişikliklərə öz münasibətlərini bildirirdilər. Məntəqə seçki komissiyasının sədri Bəxtiyar Nəbiyev vətəndaşların səsvermədə fəal iştirak etdiklərini xüsusi vurğuladı. Qeyd etdi ki, indiyədək heç bir yerli və xarici müşahidəçilər tərəfindən seçkinin gedişinə irad tutulmayıb. Yeni Azərbaycan Partiyasının müşahidəçisi Əli Səmədov ümumxalq səsverməsinin normal qaydada, şəffaf keçdiyini bildirdi. Müstəqil müşahidəçi Adil Xasayev dedi ki, bu gün Azərbaycan xalqı özünün taleyüklü məsələlərinə münasibətini bildirir. Fəallıq birinci növbədə insanların bu referenduma daha çox qatılması ilə bağlıdırsa, digər tərəfdən hiss olunur ki, hər kəs qaldırılan məsələyə daha ciddi münasibət bəsləyir. Müşahidəçisi olduğum məntəqədə səsvermə prosesi qanunvericiliyə uyğun şəkildəaparılır, vətəndaşların hər hansı bir sorğusu komissiya üzvləri tərəfindən yerindəcə həllini tapır. Burada seçki prosesinin demokratikliyini təmin etmək və şəffaflığı qorumaq məqsədilə veb-kameralar da quraşdırılıb.

11 saylı seçki məntəqəsində olarkən BDU-nun prorektoru, professor İsmayıl Əliyevlə də görüşdük. Referenduma münasibətini bildirən İ.Əliyev dedi ki, bu gün cəmiyyətimiz çox tələbkardır. İnsanlar birinci növbədə reallıqlara inanırlar. Elə buna görə də Azərbaycanda ictimai rəy əsasən xalqı tərəqqiyə, inkişafa aparan siyasətə yönəlir. Ölkənin hüquq sisteminin bünövrəsini təşkil edən Əsas Qanuna yeni dövrün gerçəklikləri ilə səsləşən bir sıra əlavələr və dəyişikliklərin edilməsi zərurətə çevrilmişdir. Özünüz də şahidsiniz ki, son illərdə reallaşdırılan liberal ruhlu islahatlar, tətbiq olunan mütərəqqi hüquqi yeniliklər cəmiyyətin inkişaf ahənginə adekvat olmuş, ən başlıcası isə insan - vətəndaş hüquq və azadıqlarının təmini məsələlərini özündə ehtiva etmişdir. Bu baxımdan Referendum Aktı layihəsi məhz ictimai tələbatdan doğan bir addımdır. Və bu siyasi aksiya ilk gündən xalq tərəfindən maraqla qarşılanmış və dəstəklənmişdir. Seçki məntəqələrindəki fəallıq, mütəşəkkillik də dediklərimizə sübutdur. Əvvəlki seçkilərdən fərqli olaraq, bu kampaniyaya daha aktiv münasibət hiss olunur. Bu isə hamını sevindirir.

16 saylı Yasamal ikinci seçki dairəsinin 25 və 26 saylı məntəqələrində də olduq. Burada da bayram əhval-ruhiyyəsi var idi. 26 saylı məntəqədə muşahidəçi olan Azərbaycan Respublikası Veteranlar Şurası Rəyasət Heyətinin üzvü Samit Məsimov, təşəbbüs qruplarının nümayəndələri Aidə Cəfərova, Nəcibə Yaqubova, Mayəhtac Mollayeva və başqaları səsvermənin normal qaydada keçdiyini bildirdilər. Həmin məntəqənin seçicisi Azərbaycan Dövlət Mədəniyyət və İncəsənət Universitetinin prorektoru Rafiq Sadıqov dedi ki, Azərbaycan xalqı taleyüklü məsələlərdə heç vaxt seyrçi mövqe tutmayıb. Həmişə sözü, münasibəti və fəallığı ilə seçilib. Bu da təbii haldır. Çünki xalqın rəyi, zəmanəti və səsi cəmiyyətin gələcək sabitliyinə, əmin-amanlığına və firavan həyatına güclü təsir göstərir.

17 saylı Yasamal üçüncü seçki dairəsində 47766 seçici qeydiyyatdadır, 45 məntəqə fəaliyyət göstərir. 29 saylı seçki məntəqəsinin sədri Səbirə Məmmədova məntəqə üzrə 1475 seçicinin qeydiyyata alındığını bildirərək səsvermə prosesinin şəffaf, azad və ədalətli keçirildiyini dedi. Səsvermə prosesinin yenicə başladığı ilk saatlarda 403 seçici məntəqədə səs verərək ümumxalq müzakirəsinə çıxarılan məsələlərə mövqeyini ifadə edib. Məntəqədə 4-ü beynəlxalq olmaqla 25 müşahidəçi səsverməni izləyib. Eyni zamanda prosesin gedişini respublikamızın hüdudlarından kənarda izləmək üçün veb-kamera da quraşdırılıb.

Məntəqə seçki komissiyasının sədri heç bir qanun pozuntusunun qeydə alınmadığını dedi. Səsvermə hüququ olan vətəndaşlar qanunlara riayət edərək referendumda iştirak etmiş, ümumxalq müzakirəsinə çıxarılmış məsələlərə münasibət bildirmişdilər. Hələ səsvermədən bir neçə gün öncə məntəqədə qeydiyyatda olan bütün seçicilərə bildiriş vərəqələri paylanılmışdır. Səbirə Məmmədova dedi ki, səsverməyə qatılan bütün seçicilər bülletenlərdəki suallarla ətraflı tanış olduqlarını bildiriblər.

Respublikamızda fəaliyyət göstərən bir sıra səfirliklərin müşahidəçiləri, kütləvi informasiya vasitələrinin nümayəndələri 29 saylı seçki məntəqəsinə gələrək prosesin gedişini izləyiblər.

17 saylı Yasamal üçüncü seçki dairəsinin 30 saylı seçki məntəqəsinin sədri Zemfira İbrahimova da qeydiyyatda olan 1413 seçicinin 396 nəfərinin saat 10-da məntəqəyə gələrək referendumda yüksək fəalıq nümayiş etdirdiyini, bu aktivliyin gün ərzində davam etdiyini bildirdi. Müstəqil Dövlətlər Birliyinin Müşahidə Missiyasını təmsil edən müşahidəçilər səsvermə prosesinin gedişini izləyiblər. Onlar səsvermə prosesində heç bir qanun pozuntusu qeydə almayıblar.

Nərimanov

Rayonun 18 saylı Nərimanov-Nizami seçki dairəsində 45811 nəfər, 19 saylı Nərimanov birinci 39744 nəfər, 20 saylı Nərimanov ikinci seçki dairəsində isə 40219 nəfər səsvermə hüququ olan vətəndaş qeydiyyatdadır.

20 saylı Nərimanov ikinci seçki dairəsinin 30 saylı məntəqəsi akademik Həsən Əliyev 57-də - "Azneftkimyamaş" SC-nin inzibati binasında yerləşir. Azərbaycanın dövlət himni səsləndikdən sonra məntəqə seçki komissiyasının sədri Heydər Mirkərimov, komissiya üzvləri və müxtəlif təşkilatları təmsil edən müşahidəçilər öz yerlərini tuturlar. Az sonra insanlar ikibir-üçbir məntəqəyə doğru axışmağa başlayırlar. İlkin olaraq məntəqəyə ömürlərinin səksəninci illərini yaşayan iki qoca yaxınlaşır. MSK üzvləri ilə mehribanlıqla bayramlaşan ağsaqqal ömür-gün yoldaşı ilə birgə şəxsiyyət vəsiqəsini təqdim edir. Məlum olur ki, onlar - Çəmənzəminli küçəsi, 66 "A" ünvanda yaşayan, 1928-ci il təvəllüdlü Muxtar Həsənov və həyat yoldaşı Zabella nənədir. Məntəqəyə birgə gəlsələr də, ayrı-ayrı kabinələrdə səsvermə bülletenlərini işarələyib qutuya atırlar. Bundan sonra məntəqəyə 87 yaşlı nurani qoca - Şəmsi Rəhimov küçəsi, bina 3, mənzil 9-da yaşayan Tofiq Abdullayev daxil olur, hamıyla salamlaşır, bayramlaşır və səsvermə bülletenini götürüb kabinəyə keçir...

Muxtar Həsənovla yaxından tanış olmaq üçün məntəqənin həyətində görüşürük.

- Çox gözəl şərait yaradılıb, - deyir. Ayrı-ayrı kabinələrdə səs versək də, evdə məsləhətləşib gəlmişdik, ikimiz də eyni fikrdə idik. Heç bir müdaxilə hiss etmədik. Mən bilirəm və əminəm ki, Azərbaycanın gələcəyi daha yaxşı, bundan da qüdrətli olacaq.

Məntəqənin ən yaşlı seçiciləri ilə söhbət etdiyimiz anlarda insanların məntəqəyə axını daha da artırdı. Kimi tək, kimi ailə üzvləri ilə, kimi də qonşusu ilə birgə gəlirdi. Dəqiqələr saatlara çevrildikcə gələnlərin sayı çoxalırdı. Çox çəkmədən xarici ölkələrdən səsvermənin gedişini izləməyə gəlmiş müşahidəçilər də məntəqəyə daxil oldular. Onlar RF Dövlət Dumasının üzvü Sergey Smetaninov və Belçika Parlamentinin nümayəndələri Yvon Harmeeries və Saulmon Guy idi. Qonşu məntəqədən gəldiklərini, oradakı vəziyyətdən razı qaldıqlarını bildirdilər.

30 saylı məntəqədə 1243 nəfər səsvermədə iştirak edir. Məntəqə sədrinin məlumatına görə, bunlardan 10 nəfəri referendumqabağı qeydiyyatdan çıxdığına görə başqa məntəqədə səs verəcək. Artıq saat 12 radələrində 250 nəfər seçici səsvermədə iştirak etmişdi.

"Zəka" təşviqat qrupunun üzvü Emin Talıbov bildirdi: - Səsvermə mütəşəkkil və əhalinin fəallığı şəraitində keçir. Məntəqədə müxtəlif ictimai-siyasi təşkilatları, qurumları təmsil edən müşahidəçilərə normal şərait yaradılıb. Dörd saata yaxındır ki, camaat gəlib-gedir, hələlik heç bir neqativ hala, qanun pozuntusuna yol verilməyib.

Rayondakı 19 saylı Nərimanov birinci seçki dairəsinin 15 saylı məntəqəsində də vətəndaşların fəallığı qaneedici idi. Bayram ovqatlı insanlar dəstəbədəstə seçki məntəqəsinə gəldikcə onların seçki mədəniyyətinə, siyasi fəallığına qibtə etməyə bilmirsən. Eyni fikirlərin təsdiqini məntəqənin həyətində bizimlə müsahibəsində Estoniya Parlamentinin üzvü Tomas Alatalunun və Finlandiya təmsilçisi Karkkainen Karinin dilindən də eşitdik.

Günortaya yaxın burada 300 nəfərədək seçici səsvermədə iştirak etmişdi. Bu ara məntəqədən sevincək və özündən çox razı halda çıxan bir neçə gənc çoxunun diqqətini özünə çəkdi. Onlar rayonun H.Məmmədov küçəsi, 9 ünvanda yaşayan Kamran Əliyev və M.B.Məhəmmədzadə, 11 ünvanda yaşayan 18 yaşı təzəcə tamam olmuş Gövhər Talıbzadə idi. Yaxınlaşıb səsvermə prosesinə münasibətlərini öyrənmək istədik.

Kamran Əliyev dedi: - İlk dəfədir səsvermədə iştirak edir, bundan həm sevinir, həm də həyəcan keçirirdim. Amma məntəqədəki normal şərait, sərbəstlik mənə hər şeyi unutdurdu. Səsvermə bülletenimi alıb, özüm istədiyim kimi qeydlərimi etdim.

Rayonun digər məntəqələrində də seçicilərin fəallığının, öz vətəndaşlıq borclarına məsuliyyətlə yanaşdıqlarının şahidi olduq.

Xətai

Rayonun əhalisi bundan əvvəlki bütün seçkilərdə olduğu kimi, Konstitusiya islahatı ilə bağlı keçirilən ümumxalq səsverməsi - referendum günündə də fəal iştirak etdi. Onlar bu ərazidə 33-36-cı dairələr üzrə təşkil edilmiş 132 məntəqədə Referendum Aktının layihəsi əsasında hazırlanmış səsvermə bülletenindəki 29 maddədə nəzərdə tutulmuş dəyişikliklərə öz münasibətlərini bildirdilər .

Səhər tezdən biz də vətəndaşlıq borcumuzu yerinə yetirərək 36 saylı 4-cü seçki dairəsinin 9 saylı seçki məntəqəsində səs verəndən sonra bir sıra seçki məntəqələrində müşahidəçi kimi iştirak etdik. Səsvermənin şəffaf keçirilməsi üçün bütün seçki məntəqələrində əvvəlcədən yüksək səviyyədə hazırlıq işləri aparılmışdı. Əhali referendumda sərbəst, heç bir təzyiqə rast gəlmədən yüksək əhval-ruhiyyə ilə iştirak edirdilər. Bunun bir səbəbi də onlar arasında bu istiqamətdə əvvəlcədən təbliğat -təşviqat işlərinin düzgün qurulmasıdır. Bunu 36 saylı 4-cü seçki dairəsinin 2 saylı seçki məntəqəsində səs verən vətəndaş Elmira Həsənovanın sözlərindən də aydın görmək olar: "Müstəqil dövlətimizin bütün sahələr üzrə sürətli inkişaf yoluna qədəm qoyması, beynəlxalq aləmdə əlaqələrinin genişləndirilməsi, demokratik proseslərin inkişafına xüsusi önəm verilməsi, insan hüquq və azadlıqlarının qorunması istiqamətində əhəmiyyətli tədbirlərin həyata keçirilməsi Azərbaycan Konstitusiyasına bir sıra əlavələr və dəyişikliklərin edilməsini zəruri etmişdir. Bugünkü ümumxalq səsverməsində evimizdən 5 nəfər iştirak edərək aparılan islahatlara münasibət bildirmişdir".

4 saylı cəzaçəkmə müəssisəsində təşkil edilmiş 32 saylı seçki məntəqəsində də məhbus qadınların səsvermədə yüksək fəallıqla iştirak etdiklərini izlədik. Bu insanların seçkilərdə mütəşəkkilliklə iştirak etmələrinin bir səbəbi də bayramqabağı - martın 17- də Milli Məclisdə humanizmin təcəssümü olan amnistiya aktının qəbul edilməsi və bunun 9000 məhbusa şamil olunmasıdır.

Əfəndiyev adına 4 saylı klinik xəstəxananın nəzdində təşkil edilmiş 34 saylı seçki məntəqəsində də xəstələrin ruh yüksəkliyi ilə səs vermələrinn şahidi olduq. Sədr M.Əhmədzadə məlumat verdi ki, 197 xəstə bugünkü referendumda iştirak etməlidir. Yataq şəraitində olan 32 xəstənin səsvermədə iştirakını təmin etmək məqsədilə bülleten qutularının onların yanına aparılmasını təşkil etmişik.

1 və 5 saylı seçki məntəqələrində də qələbəliyin şahidi olduq. Bütün seçki məntəqələrində yerli və xarici müşahidəçilər səsvermənin gedişini izləyirdilər.

Xətai rayonu üzrə ümumilikdə 166.651 seçici var və onların əksəriyyəti referendumda iştirak etmişdir.

Azərbaycan.-2009.-19 mart.-S.4-5.