Mərkəzi Avropa ölkələrində yaşayan həmvətənlərimiz ümumxalq səsverməsində fəal iştirak etmişlər

Azərbaycanın Avstriyadakı səfirliyində yaradılmış 17 saylı Yasamal üçüncü seçki dairəsinin 37 saylı seçki məntəqəsində Azərbaycan Konstitusiyasına əlavələr və dəyişikliklər edilməsi ilə bağlı ümumxalq səsverməsi yerli vaxtla saat 8-də (Bakı vaxtı ilə saat 11-də) başlamış və saat 19-da sona çatmışdır.

Seçki məntəqəsində Avstriyada, səfirliyin akkreditə olunduğu Slovakiya və Sloveniyada yaşayan soydaşlarımızla yanaşı, Macarıstanda (Azərbaycan səfirliyinin konsulluq şöbəsində qeydiyyatda olan Azərbaycan Respublikası vətəndaşlarının sayı 50 nəfərdən az olduğu üçün) yaşayan həmvətənlərimiz və Avstriyada ezamiyyətdə olan Azərbaycan vətəndaşları - ümumilikdə 128 nəfər qeydiyyatda olmuşdur. Səsvermədə 78 nəfər (60,9 faiz) iştirak etmişdir.

İtaliyadakı səfirliyimizdə yaradılmış 17 saylı Yasamal üçüncü seçki dairəsinin 45 saylı məntəqəsində səsvermə vaxtında başlamış və heç bir qanun pozuntusu qeydə alınmadan keçmişdir. Əksəriyyəti Romada yaşayan həmvətənlərimiz olmaqla, məntəqədə qeydiyyata alınmış 58 seçicidən 22-si (37,9 faiz) səsvermədə iştirak etmişdir.

İsveçrə Konfederasiyasında yaşayan və həmçinin hazırda bu ölkədə ezamiyyətdə olan Azərbaycan vətəndaşları ölkəmizin BMT-nin Cenevrə bölməsi yanında daimi nümayəndəliyində yaradılmış 17 saylı Yasamal üçüncü seçki dairəsinin 42 saylı məntəqəsində səs vermişlər. Soydaşlarımızın əsas hissəsinin Cenevrə kantonu və yaxın ərazilərdə məskunlaşması nəzərə alınaraq, seçki məntəqəsinin paytaxt Bern şəhərində deyil, Cenevrədə yaradılması məqsədəuyğun hesab edilmişdir. Seçki məntəqəsində qeydiyyatda olan 73 şəxsdən 36-sı (49,3 faiz) səsvermədə iştirak etmişdir.

Seçki Məcəlləsinin tələblərinə uyğun olaraq, seçki məntəqələrində seçicilərin öz iradələrini sərbəst ifadə etmələri üçün bütün şərait yaradılmışdır. Hər üç məntəqədə səsvermə heç bir qanun pozuntusu qeydə alınmadan keçmişdir.

Elgün Niftəliyev,

AzərTAc-ın xüsusi müxbiri

Vyana

Azərbaycan.-2009.-19 mart.-S.11.