Təbii sərvətlər
mühafizə olunur
Təbiət sərvətlərini və əsrarəngiz gözəlliklərini insanlara təmənnasız bəxş edib. Bu səxavətin qarşılığında gərək onu böyüklü, kiçikli hamı qorusun. Bununla insan tək təbiəti yox, həm də öz sağlamlığını qorumuş olur. Bizim ölkəmizdə də təbiətə qayğı göstərilir, lazımi yerlərdə qoruqlar yaradılır. Onlardan biri Qarayazı dövlət təbiət qoruğudur. Qoruq 1978-ci ildə unudulmaz təbiətşünas alim, akademik Həsən Əliyevin təşəbbüsü ilə Kür sahili Tuqay meşələrinin keçmiş təbii varlığını qoruyub saxlamaq, kökü kəsilməkdə olan bitki və heyvanat aləmini mühafizə və bərpa etmək məqsədi ilə yaradılıb. Qoruğun direktoru Rafiq Əhmədov bu barədə məlumat verərək dedi:
- Qoruq 9 658 hektar sahəyə malikdir. Əsasən Kür çayının çaylaq hissəsini və sol sahildəki Qarayazı ovalığını əhatə edir. Qonşu Gürcüstan Respublikası ilə, habelə Qazax rayonunun I Şıxlı, II Şıxlı, Yuxarı Salahlı kəndləri ilə Ağstafa rayonunun Sadıqlı, Muğanlı, Saloğlu kəndləri və Qarayazı, Poylu qəsəbələri ilə həmsərhəddir.
Qarayazı dövlət təbiət qoruğu zənğin flora və faunaya malikdir. Burada əsasən qovaq, palıd, akasiya, qarağac, söyüd kimi ağac növləri, habelə, yemişan, böyürtkən, zirinc, itburnu kimi dərman bitkiləri bitir.
Qoruğun heyvanat aləmi də zəngindir. Burada maral, canavar, qaban, tülkü, dovşan, porsuq, çöl pişiyi, qunduz, dələ, qırqovul, qartal, hacıleylək, alabaxta, göyərçin, köçəri
ördək və sair quşlar yaşayır.
Kür çayında karp, çəki, çapaq, naqqa, durnabalığı,
qızılxallı və
digər balıq növlərinə rast gəlmək mümkündür.
Qoruqda elmi-tədqiqat işləri
aparılır. Ərazisinin dinamikası öyrənilir
və hər ilin sonunda hesabat
şəklində Ekologiya
və Təbii Sərvətlər Nazirliyinə
təqim edilir.
Bu təşkilatın əməkdaşları
da çətinlikləri
aradan qaldırmağa,
qanun pozuntularının
qarşısını almağa,
qarşıya çıxan
problemləri imkan daxilində həll etməyə çalışırlar. Məqsəd birdir - sərvətlərimizi
mühafizə edib gələcək nəslə
çatdırmaq.
Eldar Nəsibli
Azərbaycan.-2009.-19 mart.-S.12.