Bakıda "İslam mədəniyyəti və müasir dünyada dialoq" mövzusunda elmi-praktiki konfrans keçirilmişdir

Aprelin 30-da Bakıda ümummilli lider Heydər Əliyevin xatirəsinə həsr edilmiş "Dialoq Avrasiya Platforması" (DAP) beynəlxalq ictimai təşkilatının "Dialoq Avrasiya" jurnalının Azərbaycanda fəaliyyətə başlamasının 10-cu ildönümü münasibətilə "İslam mədəniyyəti və müasir dünyada dialoq" mövzusunda elmi-praktiki konfrans keçirilmişdir.

DAP-ın Azərbaycan Milli Komitəsinin sədri, Milli Məclisin deputatı, AMEA-nın müxbir üzvü Nizami Cəfərov konfransı açaraq platformanın yaranmasından, keçdiyi yoldan danışmışdır.

Qeyd edilmişdir ki, "Dialoq Avrasiya" jurnalı Türkiyə və Rusiya başda olmaqla Avrasiyanın 16 ölkəsində dərc olunur. Nəşrin hər sayında Azərbaycanın tarixi, mədəniyyəti, təhsili, iqtisadiyyatı ilə bağlı tanınmış şəxslərin və yazıçıların məqalələri dərc edilir.

Konfransda çıxış edən Prezident Administrasiyasının İctimai-siyasi məsələlər şöbəsinin müdiri Əli Həsənov xatırlatmışdır ki, 10 il bundan əvvəl ümummilli lider Heydər Əliyevin iştirakı ilə Bakıda "Dialoq Avrasiya" jurnalının təqdimatı keçirilmişdir. Ulu öndər o vaxt Avrasiyada dialoqun əhəmiyyəti haqqında müdrik fikirlərini söyləmişdir.

DAP-ın aktual bir işi, mövzunu, məkanı əhatə edən platforma olduğunu deyən Əli Həsənov vurğulamışdır ki, dialoq müasir dünyanın ən dəyərli fəaliyyət istiqamətlərindən biridir. Dialoq vasitəsilə bütün problemlərin həlli mümkündür. Tarix boyu başqa cəmiyyətləri güc yolu ilə öz dinindən, ənənəsindən döndərib güclü cəmiyyətlərə birləşdirmək cəhdləri müvəffəqiyyətsizliyə uğramışdır. Dialoq isə heç də digər cəmiyyətdən olan insanları öz inanclarından imtina etməyə vadar etmir. Bu, sadəcə, ortaq nöqtələrin tapılmasıdır.

Şöbə müdiri demişdir ki, din də, mədəniyyət də, informasiya mübadiləsi də, cəmiyyətlər arasındakı iqtisadi, siyasi, sosial inteqrasiya da - bunlar hamısı iştirak edən yerdə hərtərəfli əsaslandırılmış dialoqdan danışmaq olar. Dialoq insanların ictimai-siyasi, iqtisadi, mədəni həyatının bütün sahələrini əhatə edən, onların davranış normalarında ortaq dəyərlərin tapılıb qiymətləndirilməsi və bu istiqamətdə ünsiyyətin qurulmasıdır. Tolerantlıq cəmiyyətdə mövcud olan bütün mədəniyyətlərə, dinlərə, davranış normalarına, insanların vərdişlərinə hörmətlə yanaşıb, onların inkişafına stimul verməkdən ibarətdir.

Əli Həsənov bildirmişdir ki, ümummilli lider Heydər Əliyev həmişə Avrasiya məkanında yaşayan insanların mədəniyyətlərini, digər millətlərin ictimai davranış normalarını öyrənməyi xalqımıza təlqin edirdi. Ulu öndər Heydər Əliyev həmişə deyirdi ki, biz öz Nizamimizi də, dinimizi də gözəl bilməliyik, əski əlifba ilə klassiklərimizi də oxumağı bacarmalıyıq, amma eyni zamanda dünya mədəniyyətinin bugünkü dəyərlərini əks etdirən dilləri də bilməliyik. Bizim gənclik həm müasir, həm əxlaqlı olmalıdır. Bizim gənclik həm millətini, həm də bəşəriyyəti sevməlidir.

Azərbaycan Prezidenti İlham Əliyevin və Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın islam dəyərlərinin inkişafı məqsədi ilə xeyli iş gördüklərini vurğulayan Əli Həsənov demişdir ki, bu işlər davam etdirilir. Bakı bu il islam mədəniyyətinin paytaxtı elan olunmuşdur. Azərbaycanda bu il islamın ən qabaqcıl dairələri ölkəmizə dəvətlər almış, konfranslarda iştirak etmişdir. Dini Qurumlarla İş üzrə Dövlət Komitəsi bu il mühüm konfrans keçirməyi planlaşdırır.

Prezident Administrasiyasının şöbə müdiri Əli Həsənov "Dialoq Avrasiya" jurnalı ilə bağlı təkliflərini də vermişdir.

DAP-ın Azərbaycan Milli Komitəsinin katibi Mustafa Saatçı "Dialoq Avrasiya" jurnalının ölkəmizdə fəaliyyət göstərdiyi müddətdə Prezident Administrasiyasının rəhbəri Ramiz Mehdiyevin "Demokratiyaya gedən yol", baş nazirin müavini Elçin Əfəndiyevin "Əbədi düşüncələr" kitablarının türk dilinə tərcümə olunduğunu bildirmişdir. M.Saatçı jurnalın 28 nömrəsində Azərbaycanla bağlı 110 məqalənin nəşr olunduğunu qeyd etmişdir.

Tədbirdə Rusiyada fəaliyyət göstərən Mətbuatın İnkişaf İnstitutunun rəhbəri Olqa Karabamova, Azərbaycan Yazıçılar Birliyinin sədri Anar Rzayev, DAP-ın həmsədri Harun Tokak və başqaları qloballaşan dünyada dialoqun vacibliyindən danışmışlar.

AzərTAc

Azərbaycan.-2009.-1 may.-S.5.