Mətbuat Şurası Dünya Mətbuat Azadlığı gününü qeyd etmişdir

Azərbaycan Mətbuat Şurası 3 May - Dünya Mətbuat Azadlığı gününə həsr olunmuş "dəyirmi masa" keçirmişdir.

Tədbirdə jurnalist təşkilatı nümayəndələri, KİV rəhbərləri, media mütəxəssisləri və ekspertləri, həmçinin beynəlxalq qurumların təmsilçiləri iştirak etmişlər.

Əvvəlcə aprelin 30-da Azərbaycan Dövlət Neft Akademiyasında baş vermiş faciədə həlak olanların xatirəsi bir dədiqəlik sükutla yad edilmişdir.

Şuranın sədri Əflatun Amaşov, "Azərbaycan" qəzetinin Baş redaktoru Bəxtiyar Sadıqov və digərləri çıxış edərək Dünya Mətbuat Azadlığı gününün tarixindən, hansı zərurətdən meydana çıxmasından, mediamızın mövcud vəziyyətindən, problem və çətinliklərdən danışmış, dövlətin azad mətbuata göstərdiyi dəstəkdən bəhs etmişlər.

Bildirilmişdir ki, Prezident İlham Əliyevin 2009-cu il 3 aprel tarixli fərmanı ilə Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu yaradılmış və bir sıra ciddi işlər görülmüşdür. Fond tərəfindən kütləvi informasiya vasitələrinə 1 milyon 300 min manatın ayrılması bir daha vurğulanmışdır.

ABŞ səfirliyinin nümayəndəsi Terri Devidson bildirmişdir ki, Azərbaycan Mətbuat Şurasının gördüyü işləri yüksək qiymətləndirirəm. Kütləvi İnformasiya Vasitələrinin İnkişafına Dövlət Dəstəyi Fondunun yaradılması çox müsbət haldır. Mətbuat Azadlığı günü ilə əlaqədar hamınızı təbrik edir, uğurlar arzulayıram.

Dövlət Neft Akademiyasında baş vermiş faciəli hadisədən kədərləndiyini deyən T.Devidson Amerika xalqı adından həlak olanların ailələrinə və yaxınlarına dərin hüznlə başsağlığı vermişdir.

Tədbirdə müzakirələr aparılmış, mətbuat azadlığının təmin olunması istiqamətində həyata keçirilən işlər təhlil olunmuşdur.

AzərTAc

Azərbaycan.-2009.-2 may.-S.3.