Vergilər Nazirliyi rəsmi internet saytının yeni versiyasını təqdim etdi

Paytaxtın "Park İNN" otelində Vergilər Nazirliyinin rəsmi internet saytının yeni versiyasının təqdimat mərasimi keçirildi. Tədbirdə dövlət qurumlarının, beynəlxalq təşkilatların ölkəmizdəki nümayəndəliklərinin, Milli Elmlər Akademiyasının, qeyri-hökumət təşkilatlarının, Azərbaycanda internet sahəsində ixtisaslaşmış qurumların nümayəndələri iştirak edirdi.

Tədbiri açan vergilər nazirinin müavini Sahir Məmmədxanov bildirdi ki, nazirlik hər zaman açıq informasiya siyasətini fəaliyyətində prioritet istiqamət kimi müəyyən edib.

Vergilər Nazirliyinin rəsmi internet səhifəsinin 2002-ci ilin sonlarında yaradıldığını və ötən müddət ərzində daim təkmilləşdirdiyini vurğulayan natiq onun həmin ilin ən uğurlu saytı kimi "Humay" mükafatına, 2005-ci ildə ilin ən yaxşı dövlət saytı kimi "NETTY" milli internet mükafatına, 2006-cı ildə "İntellekt" mükafatına və World Summit Award beynəlxalq mükafata, həmçinin hüquqi maarifləndirmə sahəsindəki fəaliyyətinə görə Avrasiya Hüquqşünaslar İttifaqının fəxri diplomuna layiq görüldüyünü diqqətə çatdırdı. Yeni internet saytında vergi qanunvericiliyinə əməl olunması ilə bağlı biliklərin yaxşılaşdırılması, informasiya məkanında geniş istifadə olunması, vergi orqanları və biznes strukturları arasında qarşılıqlı əlaqələrin genişləndirilməsi, əhalinin və sahibkarların maraqlarının daha asan və çevik təmin olunması kimi vəzifələri reallaşdırmaq məqsədi öz əksini tapmışdır.

Sonra Vergilər Nazirliyinin Vergi Ödəyicilərinə Xidmət İdarəsinin rəisi Elçin Məmmədov çıxış edərək saytın yeni versiyasının üstünlükləri, texniki parametrləri barədə danışdı, yeni saytın müqayisəli təhlilini apardı, saytda naviqasiya rahatlığının yaradıldığını və ən çox istifadə olunan bölmələrinin ümumi paneldə cəmləşdirilməsini vurğuladı.

Təqdimat mərasimindən sonra mətbuat nümayəndələri üçün brifinq keçirildi.

Rizvan Cəfərov

Azərbaycan.-2009.-2 may.-S.7.