Azərbaycan Universitetində elmi-praktiki seminar keçirilmişdir

Dünən Azərbaycan Universitetində ümummilli lider Heydər Əliyevin anadan olmasının 86-cı ildönümünə həsr edilmiş elmi-praktiki seminar keçirilmişdir. Öncə professor-müəllim heyəti və tələbələr xalqımızın ümummilli lideri Heydər Əliyevin məzarını ziyarət edərək dahi öndərin xatirəsini yad etmişlər.

Sonra Azərbaycan Universitetində seminar öz işinə başlamışdır. Seminarı açıq elan edən universitetin rektoru, AMEA-nın müxbir üzvü, professor Akif Musayev Heydər Əliyevin uğurlu siyasi fəaliyyəti barədə danışmış, ulu öndərin öz ömrünü Azərbaycan xalqına həsr etdiyini vurğulamışdır. A.Musayev Heydər Əliyevin doğma Azərbaycanı ən ağır günlərində xilas etdiyini, müstəqil dövlət kimi bütün dünyaya tanıtdığını və ölkəmizin beynəlxalq aləmdə layiqli yer tutmasında əvəzsiz xidmətlər göstərdiyini bir daha xatırlatmışdır. Rektor qeyd etmişdir ki, ulu öndərin şah əsəri olan müasir Azərbaycanın inkişaf konsepsiyası daimi olaraq müstəqil dövlətimizi irəli aparacaqdır.

Tədbirdə Heydər Əliyevin həyatını və Azərbaycan dövlətçiliyində fəaliyyətini əks etdirən film nümayiş olunduqdan sonra Azərbaycan Universitetinin kafedra müdiri E.Qəhrəmanov "Azərbaycanın Heydər Əliyev vektoru" mövzusunda məruzə ilə çıxış etmişdir.

Seminarda Milli Məclisin deputatları Fəttah Heydərov, Xanhüseyn Kazımlı, Məlahət Həsənova, Aydın Mirzəzadə, akademik Teymur Bünyadov çıxış etmişlər.

Tədbirin sonunda Azərbaycan Universitetinin tələbələrindən bir qrupuna Yeni Azərbaycan Partiyasının üzvlük vəsiqələri təntənəli şəkildə təqdim olunmuşdur.

Rizvan Cəfərov

Azərbaycan.-2009.-5 may.-S.5.