Dövlət başçısının həyata keçirdiyi inkişaf strategiyası Ağdama yeni həyat verir

Futbol üzrə Azərbaycan çempionatında hər zaman fəal oyunu ilə seçilən "Qarabağ" komandası uzun müddət idi ki, ev oyunlarını Ağdamda keçirmirdi. Amma Ağdamın Quzanlı qəsəbəsində Olimpiya İdman Kompleksinin istifadəyə verilməsi "Qarabağ"ı Ağdama qaytardı.

Mayın 3-də futbol üzrə Azərbaycan çempionatının növbəti turunda "Qarabağ" klubu Quzanlıdakı Olimpiya İdman Kompleksinin futbol stadionunda Bakının "İnter" komandası ilə ev oyununu keçirdi. Bu, sadəcə bir futbol oyunu deyil, həm də uzun illərin həsrət və ayrılığından sonra ağdamlıların doğma torpaqda öz komandaları ilə görüşü idi. Stadiona toplaşmış on min nəfərdən artıq tamaşaçı sevincli anlar yaşayırdı.

Torpaqlarımızın bir hissəsinin işğal altında olduğu bir dönəmdə ideoloji-siyasi baxımdan mühüm əhəmiyyət kəsb edən bu idman hadisəsi ilə bağlı Ağdam ictimaiyyətinin nümayəndələri "Azərbaycan" qəzetinə müraciət ünvanlayıblar. Müraciətdə Azərbaycan Prezidenti cənab İlham Əliyevə minnətdarlıqlarını ifadə edən ağdamlılar bildirirlər ki, ulu öndər Heydər Əliyevin əsasını qoyduğu və hazırda dövlət başçısı tərəfindən layiqincə gerçəkləşdirilən əsaslandırılmış inkişaf strategiyası bütün cəbhəyanı rayonlar kimi Ağdama da yeni həyat verir. Müraciətdə deyilir: "Ulu öndər Heydər Əliyevin cəbhəyanı rayonların inkişafına və məcburi köçkünlərə olan diqqət və qayğısı bu gün Prezident İlham Əliyev tərəfindən uğurla davam etdirilir. Hələ 2003-cü ildə prezident seçkiləri ərəfəsində cənab İlham Əliyev bəyan etmişdi ki, Azərbaycanda bir dənə də olsun çadır şəhərciyi qalmayacaqdır. Dövlətimizin başçısı verdiyi vədə vaxtından tez əməl etməklə məcburi köçkünlərin ən böyük sosial problemlərindən birini qayğıkeşliklə həll etdi. Yeni salınmış qəsəbələrlə cəbhəyanı rayonlara, o cümlədən Ağdam rayonuna yeni nəfəs bəxş etdi".

Düşmənlə üz-üzə dayanan Ağdamın sürətlə inkişaf etdiyini qeyd edən ictimaiyyət nümayəndələri onu bildirirlər ki, cəbhə bölgəsində yerləşən rayonların sosial-iqtisadi inkişafı, habelə məcburi köçkünlərin həyat şəraitinin gündən-günə yaxşılaşdırılması məqsədilə artan dövlət qayğısı ağdamlılar tərəfindən rəğbətlə qarşılanır.

Müraciətdə ölkədə idmanın inkişafına qoyulan dövlət sərmayəsinin Ağdam rayonunda da yaxından hiss olunduğu bildirilir: "Ötən il Azərbaycan Prezidentinin Ağdama səfəri zamanı təntənəli şəkildə açılışını qeyd etdiyimiz Quzanlıdakı Olimpiya İdman Kompleksi bunun əyani sübutudur. Bu Olimpiya İdman Kompleksi son illər ölkədə istifadəyə verilmiş çoxsaylı idman obyektlərindən biridir. Kompleksin fəaliyyət göstərdiyi qısa müddət ərzində burada gənc idmançıların yetişdirilməsi istiqamətində xeyli iş görülmüşdür".

Ağdam ictimaiyyətinin nümayəndələri tezliklə rayonun işğal olunmuş torpaqlarının azad ediləcəyinə və "Qarabağ" komandasının ev oyunlarını Ağdam şəhərində seyr edəcəklərinə əminliklərini ifadə ediblər.

Azərbaycan.-2009.-5 may.-S.5.