Yunanıstan Azərbaycanla əlaqələrin inkişafında maraqlıdır

Mayın 7-də ölkəmizdə səfərdə olan Yunanıstan-Azərbaycan parlamentlərarası əlaqələr üzrə işçi qrupunun üzvləri Milli Məclisin Sədri Oqtay Əsədovla görüşdülər. Qonaqları salamlayan Milli Məclisin Sədri Oqtay Əsədov dedi ki, Azərbaycanla Yunanıstan arasında siyasi, iqtisadi, humanitar və digər sahələrdə münasibətlər uğurla inkişaf edir. Bu ölkələr arasında əlaqələrin yüksək səviyyəyə çatmasında qarşılıqlı səfərlərin əhəmiyyəti böyükdür. Spiker Oqtay Əsədov bildirdi ki, dövlət başçılarının qarşılıqlı səfərləri zamanı imzalanmış çoxsaylı sənədlər əməkdaşlıq üçün yaxşı hüquqi baza yaratmışdır. Azərbaycan Prezidentinin 2009-cu ilin fevralında Yunanıstana səfəri əlaqələrin inkişafı üçün yeni səhifə açmışdır. Parlamentlərimiz yaranmış imkanlardan maksimum istifadə etməli, münasibətlərimizin daha da genişlənməsinə töhfə verməlidir.

Özünün 2008-ci ildə Yunanıstana səfərini, eləcə də Yunanıstan parlamenti sədrinin müavininin Azərbaycan parlamentinin 90 illik yubileyində iştirakını məmnunluqla yada salan spiker Oqtay Əsədov iki ölkə deputatlarının beynəlxalq təşkilatlarda əməkdaşlığını yüksək qiymətləndirdi.

Yunanıstan-Azərbaycan parlamentlərarası əlaqələr üzrə işçi qrupunun rəhbəri Konstatinos Tsiaras 2007-ci ildə ölkəmizə səfərini xatırladaraq ötən müddət ərzində Azərbaycanda aparılan quruculuq-abadlıq işlərini yüksək dəyərləndirdi. Onun sözlərinə görə, Azərbaycan Prezidenti İlham Əliyevin bu ilin fevralında Yunanıstana səfəri dövlətlərimiz və xalqlarımız arasında dostluq münasibətlərinin inkişfında yeni mərhələ açmışdır. Yunanıstan sürətlə inkişaf edən Azərbaycan ilə əlaqələrin hərtərəfli inkişafında maraqlıdır və bunun üçün yaxşı imkanlar var. Parlamentarilərin belə səfərləri də əlaqələrin möhkəmləndirilməsinə töhfə verir.

Görüşdə Dağlıq Qarabağ münaqişəsinin həlli yolları, beynəlxalq tədbirlərdə birgə əməkdaşlıq, Avropanın enerji təhlükəsizliyində Azərbaycanın rolu və digər məsələlər ətrafında fikir mübadiləsi aparıldı.

Azərbaycan.-2009.-8 may.-S.2.