Heydər Əliyevin xatirəsi Moskvada ehtiramla yad edildi

Azərbaycanın Rusiyadakı səfirliyində ümummilli lider Heydər Əliyevin anadan olmasının 86-cı ildönümünə həsr edilmiş tədbir keçirilmişdir.

Tədbirin iştirakçıları əvvəlcə ulu öndər Heydər Əliyevin səfirliyin foyesindəki barelyefinin qarşısına çiçəklər düzmüşlər.

Mərasimdə Azərbaycanın Rusiyadakı səfiri Polad Bülbüloğlu Heydər Əliyev şəxsiyyətinin böyüklüyündən, suveren Azərbaycan dövlətinin təşəkkül tapmasında ulu öndərin müstəsna rolundan söhbət açmışdır. Səfir demişdir ki, böyük insan, dünya miqyaslı siyasətçi, unudulmaz ümummilli lider Heydər Əliyevin doğum günü işıqlı bayram - Qələbə Günü ilə, demək olar, bir vaxta düşür.

P.Bülbüloğlu bildirmişdir ki, Azərbaycan Prezidenti İlham Əliyevin tapşırığı ilə onun üzərinə Rusiyanın üç görkəmli xadiminə "Dostluq" ordenini təqdim etmək kimi xoş vəzifə düşmüşdür. Səfir Azərbaycan və Rusiya arasında əməkdaşlığın və qarşılıqlı əlaqələrin möhkəmlənməsində xüsusi xidmətlərinə görə Rusiya Federal Məclisinin Federasiya Şurası sədrinin müavini Svetlana Orlovaya, "Rossiyskiye Jeleznıye Doroqi" ASC-nın prezidenti Vladimir Yakuninə və Dövlət Dumasının deputatı, Beynəlxalq İşlər Komitəsi sədrinin birinci müavini Leonid Slutskiyə "Dostluq" ordenini təqdim etmişdir.

Yuxarı palata sədrinin müavini Svetlana Orlova ona verilən bu yüksək qiymətə görə dövlətimizin başçısına minnətdarlığını bildirərək demişdir: "Çox şadam ki, Heydər Əliyevin xatirə günündə mənə belə bir yüksək mükafat - "Dostluq" ordeni təqdim edilir. Əlbəttə, bu, təkcə mənim mükafatım deyildir. Bu, Rusiyaya, başçılıq etdiyim parlament nümayəndə heyətinə verilən mükafatdır. Əlamətdar haldır ki, bu möhtəşəm Qələbə bayramı günü biz yenə də bir yerdəyik. Biz bir yerdə olmalıyıq. Rusiya və Azərbaycanın möhtəşəm tarixi vardır. Münasibətlərimizin də gələcəyi vardır. Mən fəxr edirəm ki, Dövlət Dumasındakı, Federasiya Şurasındakı nümayəndə heyətimiz və bütövlükdə biz hamımız münasibətlərimizin gələcəyinə öz kiçik töhfəmizi verə bilmişik. Azərbaycan heç də sadəcə gözəl ölkə deyildir. Azərbaycan bütün dünyaya göstərmişdir ki, iqtisadi baxımdan dinamik inkişaf edən sabit ölkədir. Mən çox şadam ki, prezidentlər - Dmitri Medvedev və İlham Əliyev arasında səmimi münasibətlər yaranmışdır. Çünki bu gənc, perspektivli prezidentlər hətta böhran dövründə belə, öz ölkələrini məharətlə idarə edə bildiklərini göstərmişlər".

"Rossiyskiye Jeleznıye Doroqi" ASC-nin başçısı Vladimir Yakunin də Azərbaycan Prezidenti İlham Əliyevə minnətdarlığını bildirərək demişdir ki, onun üçün bu, çox təntənəli bir gündür. O xüsusi vurğulamışdır ki, Sovet İttifaqının dağılması barədə qərar qəbul olunduqdan sonra Azərbaycan inteqrasiya, yoldaşlıq və dostluq mövqeyini saxlamış yeganə dövlət oldu. O, ötən il BAM-ın stansiyalarından birinə Heydər Əliyevin adının verilməsi münasibətilə keçirilən təntənəli tədbiri xatırladaraq demişdir: "Bu, BAM-ın bütün qurucuları üçün təntənəli an idi. Bu il BAM-ın tikintisinin başlanmasından 35 il ötür. Biz BAM-ı bir yerdə tikməyə başlamışdıq, onun tikintisini də birlikdə başa çatdırdıq və biz bir masa arxasında əyləşərək bir-birimizi Qələbə münasibətilə təbrik edirik".

V.Yakunin Heydər Əliyev adına stansiyaya turist marşrutu təşkil etmək təşəbbüsünü irəli sürmüşdür.

Dövlət Dumasının Beynəlxalq İşlər Komitəsi sədrinin müavini Leonid Slutski isə əlavə etmişdir ki, onun üçün bu, rəmzi gündür, çünki bu yüksək mükafatı Rusiya, Azərbaycan xalqlarını və digər xalqları bir araya gətirən böyük Qələbənin ertəsi günü alır: "Müasir Azərbaycan dövlətinin banisi olan Heydər Əliyevin bilavasitə doğum günü mükafat almaq isə olduqca xoşdur". Onun sözlərinə görə, Heydər Əliyevin irsi bu gün də yaşayır. Azərbaycan keçmiş sovet məkanında ən güclü və inkişaf etmiş dövlətlərdən birinə çevrilmişdir. Son illər Azərbaycan dövlətçiliyinin təşəkkülü, iqtisadiyyatın, sosial sahənin inkişafı istiqamətində çox işlər görülmüşdür. Təkcə yoxsulluqla mübarizə proqramı nəyə desən dəyər. Qaçqınların və məcburi köçkünlərin xeyli hissəsi mənzillə, iş yerləri ilə təmin olunmuşdur. Bu, Azərbaycanın yeni rəhbərliyinin böyük xidmətidir".

Deputat vurğulamışdır ki, ölkələrimiz arasındakı münasibətlər həmişəkindən də möhkəmdir. Azərbaycan və Rusiya xalqları arasındakı əbədi dostluq bundan sonra da inkişaf edərək möhkəmlənəcəkdir.

Səfirlik ümummilli lider Heydər Əliyevin anadan olmasının 86-cı ildönümü münasibətilə təntənəli nahar təşkil etmişdir.

Mərasimdə Heydər Əliyev Fondunun Rusiyadakı nümayəndəliyinin əməkdaşları, MDB-nin icraçı katibi S.Lebedev, ölkənin Xarici İşlər Nazirliyinin, Rusiyanın Azərbaycanlı Gənclər Təşkilatının nümayəndələri, hərbçilər, Böyük Vətən müharibəsi veteranları, ictimai xadimlər, xarici ölkələrin səfirləri iştirak etmişlər.

Asya Hacızadə,

AzərTAc-ın xüsusi müxbiri

Moskva

Azərbaycan.-2009.-13 may.-S.11.