Elmi-praktik konfrans keçirilib

Azərbaycanın Tacikistandakı səfirliyi ümummilli lider Heydər Əliyevin anadan olmasının 86-cı ildönümünə həsr olunmuş elmi-praktik konfrans keçirmişdir.

Prezident Administrasiyası İctimai-siyasi məsələlər şöbəsinin xaricdə yaşayan azərbaycanlılarla iş sektorunun müdiri Qafar Əliyevin rəhbərliyi ilə Azərbaycan nümayəndə heyətinin, Tacikistan Xarici İşlər Nazirliyinin rəsmi nümayəndələrinin, səfirlərin, beynəlxalq təşkilatların təmsilçilərinin, jurnalistlərin iştirak etdikləri tədbirdə Tacikistanın və Azərbaycanın dövlət himnləri səslənmişdir.

Azərbaycanın Tacikistandakı səfiri Məhərrəm Əliyev ümummilli liderin həyatı haqqında ətraflı məlumat vermiş, Heydər Əliyev irsinin öyrənilməsi sahəsində görülən işlərdən danışmışdır.

Bildirilmişdir ki, xalqın tələbi ilə Azərbaycanda ikinci dəfə hakimiyyətə gələn görkəmli dövlət xadimi Heydər Əliyev ölkəni məhv olmaq təhlükəsindən xilas etdi, bununla da vətənimizin xilaskarına çevrildi.

Tədbirdə Azərbaycanda neft və qaz sahəsində görülən işlər, Bakı-Tbilisi-Ceyhan əsas neft ixrac boru, Bakı-Tbilisi-Ərzurum qaz və Bakı-Tbilisi-Qars dəmir yolu layihələri haqqında məlumat verilmişdir.

Tacikistan xarici işlər nazirinin birinci müavini Maxmudcon Sabirov demişdir ki, biz Heydər Əliyev kimi uzaqgörən bir siyasətçi ilə bir dövrdə yaşadığımıza görə xoşbəxtik. Bu böyük siyasətçi Azərbaycan iqtisadiyyatının dirçəldilməsi, neft strategiyasının həyata keçirilməsi, müstəqil Azərbaycanın dünyada layiqli yer tutması naminə böyük işlər görmüşdür. Azərbaycan Prezidenti İlham Əliyev hazırda bu siyasəti inamla davam etdirir.

Azərbaycan Respublikası Prezidenti Administrasiyasının sektor müdiri Qafar Əliyevin "Müstəqil Azərbaycanın dirçəldilməsində və inkişafında Heydər Əliyevin rolu" mövzusunda məruzəsi maraqla qarşılanmışdır.

Məruzəçi demişdir ki, Azərbaycanın çətin bir dövründə Naxçıvandan Bakıya dəvət edilən ümummilli lider Heydər Əliyev bütün sahələrdə islahatlara başlamış, Ermənistan-Azərbaycan, Dağlıq Qarabağ münaqişəsində atəşkəsə nail olmuşdur.

Azərbaycanın 2000-ci ildə təqribən 2 milyard dollar olan dövlət büdcəsi indi artıq 12 milyard manatı ötüb keçmişdir. Bu, məhz ulu öndərin düzgün qurulmuş iqtisadi strategiyasının nəticəsidir.

Azərbaycanın neft-qaz strategiyasından danışan Milli Məclisin deputatı Vasif Əliyev demişdir ki, ulu öndər Heydər Əliyev hələ SSRİ dövründə respublikamızın enerji təhlükəsizliyi, o cümlədən neft və qaz sahələrinin inkişafı məsələlərinə böyük diqqətlə yanaşırdı. Biz bu uzaqgörən siyasətin nəticələrini indi görürük.

SSRİ dövründə Tacikistanda müxtəlif vəzifələrdə işləmiş Talbak Nazarov ulu öndər Heydər Əliyevlə görüşlərini yada salmış, böyük siyasətçi haqqında xatirələrini söyləmişdir.

Sonda Azərbaycanın xalq artisti Zaur Rzayev və Düşənbədə tanınan müğənni Rüstəm İsayevin iştirakı ilə konsert proqramı olmuşdur.

Qulu Kəngərli,

AzərTAc-ın xüsusi müxbiri

Düşənbə

Azərbaycan.-2009.-14 may.-S.3.