Milli Məclisin
nümayəndə heyəti
İkinci Beynəlxalq
Moskva Konqresinin işində iştirak etmişdir
Sankt-Peterburqdakı
Tavriçeski sarayında RF Hökumətinin dəstəyi ilə
MDB üzvü olan dövlətlərin Parlamentlərarası
Assambleyası (MDB PAA), Avropa Şurası Parlamentlərarası
Assambleyası və Rusiya Federal Məclisinin Federasiya
Şurası tərəfindən təşkil edilmiş
İkinci Beynəlxalq Neva Konqresi
açılmışdır.
Konqresin işində Azərbaycan
Milli Məclisinin nümayəndə heyəti - parlament sədrinin
müavini Bahar Muradova, Regional Məsələlər Komitəsinin
sədri Arif Rəhimzadə, Hüquq Siyasəti və Dövlət
Quruculuğu Komitəsinin sədri Əli Hüseynov, Təbii
Ehtiyatlar, Energetika və Ekologiya Komitəsinin sədr
müavini Elton Məmmədov, Milli Məclisin MDB PAA-da daimi
nümayəndəsi, MDB PAA Baş katibinin müavini Aydın
Cəfərov iştirak etmişdir.
Konqresin
açılışında Rusiya prezidenti Dmitri Medvedevin və
RF Hökumətinin sədri Vladimir Putinin Konqresə təbrikləri
oxunmuşdur.
Neva Konqresinin məqsəd
və vəzifələri haqqında məruzə ilə RF
Federasiya Şurasının və MDB PAA Şurasının sədri
Sergey Mironov və təşkilat komitəsinin həmsədri,
Avropa Şurası Parlament Assambleyasının sədri Luis
Mariya de Puç çıxış etmişdir. Qeyd
edilmişdir ki, Neva Konqresinin əsas məqsədi beynəlxalq
ekoloji təhlükəsizlik sisteminin formalaşması, təbii
ehtiyatlardan istifadə və onların idarə edilməsi sahəsində
qanunvericiliyin təkmilləşdirilməsi, bioloji müxtəlifliyin
qorunub saxlanması və ekoloji fəlakətlərə
qarşı mübarizə məsələlərini
müzakirə etməkdir. 2008-ci ilin dekabrında keçirilmiş
birinci Neva Konqresində əldə edilmiş razılaşmaya
görə, ekoloji təhlükəsizliyin təmin edilməsi
müxtəlif ölkələrin, təşkilatların və
hər bir insanın məsuliyyəti ilə birbaşa əlaqədar
olan qlobal vəzifə hesab edilməlidir.
Plenar iclaslarda və
tematik "dəyirmi masa"larda enerji ehtiyatlarından istifadə
və ətraf mühitin qorunması, MDB üzvü olan
dövlətlərin və Avropa Şurasının
üzvü olan ölkələrin ekoloji qanunvericiliyinin
uyğunlaşdırılması, enerji ehtiyatlarından istifadənin
ekoloji təhlükəsizliyinin artırılması, ekoloji
sistemlərin qorunub saxlanması, habelə texnogen ekoloji fəlakətlərin,
iqlim dəyişməsi ilə əlaqədar təbii fəlakətlərin
nəticələrinin aradan qaldırılması üzrə
uğurlu strategiya və proqramların həyata keçirilməsi
istiqamətində informasiya və təcrübə mübadiləsi
məsələlərinə dair geniş müzakirələr
olmuşdur.
"Energetikada ekoloji təhlükəsizlik"
mövzusunda "dəyirmi masa" çərçivəsində
yanacaq-energetika kompleksində ekoloji təhlükəsizlik, atom
elektrik stansiyalarının təhlükəsizliyi,
tullantılardan istifadə edilməsi, energetika sahəsində
tullantıların basdırılması və təkrar
emalı problemləri, bir sıra digər məsələlər
müzakirə edilmişdir. "Dəyirmi masa"nın
moderatorlarından biri, Milli Məclisin deputatı Elton Məmmədov
müzakirələrdə çıxış etmişdir. Ekoloji
təhlükəsizlik məsələləri "Ekoloji təhlükəsizliyin
təmin edilməsi sahəsində transsərhəd əməkdaşlıq",
"Əhalinin sağlamlığı və ətraf
mühit: vətəndaş cəmiyyəti təhlükəsiz
energetikanın tərəfdarıdır",
"İnsanın yaşayış mühitinin ekoloji problemləri
və energetika ehtiyatlarından davamlı istifadənin təmin
edilməsi", "Su ehtiyatlarının ekologiyası"
mövzularına həsr edilmiş "dəyirmi masa"lar
çərçivəsində də geniş müzakirə
edilmişdir. Deputatlar Arif Rəhimzadə və Əli
Hüseynov diskussiyalarda fəal iştirak etmiş, müzakirə
edilən məsələlər barəsində Azərbaycanın
mövqeyini bildirmişlər.
Konqres çərçivəsində
"Ekoloji təhlükəsizlik və enerji
ehtiyatları" mövzusunda sərgi təşkil
edilmişdir.
Asya Hacızadə,
AzərTAc-ın xüsusi müxbiri
Moskva
Azərbaycan.-2009.-16 may.-S.2.