Yeni Azərbaycan Partiyasında Çin Xalq Respublikasının ölkəmizdəki səfiri ilə görüş

Yeni Azərbaycan Partiyasının (YAP) mətbuat xidmətindən bildirmişlər ki, mayın 14-də sədr müavini-icra katibi, Milli Məclisin deputatı Əli Əhmədov Çin Xalq Respublikasının Azərbaycandakı səfiri Çjan Yannyan ilə görüşmüşdür.

Azərbaycanda diplomatik fəaliyyətə yeni başlamış səfir ölkəmizlə ilk tanışlığın onda xoş təəssürat yaratdığını qeyd etmiş, dövlətlərimiz arasında münasibətlərin yüksək səviyyədə olduğunu, əlaqələrin daha da inkişafında Prezident İlham Əliyevin ÇXR-ə səfərinin mühüm rol oynadığını xüsusi vurğulamışdır.

Azərbaycanda diplomatik fəaliyyətə başlamasından qürur duyduğunu nəzərə çatdıran səfir, ölkələrimiz arasında əlaqələrin bundan sonra da dinamik inkişaf edəcəyinə əminliyini ifadə etmişdir.

Ölkələrimiz arasında əlaqələrin məmnunluq doğurduğunu qeyd edən YAP sədrinin müavini Əli Əhmədov, Yeni Azərbaycan Partiyası ilə Çin Kommunist Partiyası arasında yüksək səviyyədə əməkdaşlığın bu münasibətlərə müsbət təsirini xüsusi vurğulamışdır. İki ölkə arasında əlaqələrin daha da inkişaf etdirilməsini nəzərdə tutan təklif və təşəbbüslərin bundan sonra da dəstəklənəcəyi və reallaşacağı əminliklə qeyd olunmuşdur.

Görüşdə qarşılıqlı maraq doğuran bir sıra məsələlər ətrafında fikir mübadiləsi aparılmışdır.

AzərTAc

Azərbaycan.-2009.-16 may.-S.4.