Filmlərin mühafizəsinə dövlət qayğısı

Əlbəttə, onların əməyi, zəhməti hədər getməyib. Yadigarları yaradıcılıq nümunələri müasir dövrümüzə çatıb. Əvvəllər həmin lent təsvirləri necə gəldi saxlanılırdısa, indi onlar dünya standartlarına uyğun mühafizə edilir. Dövlət başçısının sərəncamı ilə bədii-publisistik filmlərin qorunması, saxlanılması üçün müasir texniki avadanlıqlar quraşdırılmış yeni bina istifadəyə verilmişdi. Dövlət Film Fondunun direktoru, əməkdar incəsənət xadimi Cəmil Quliyev bu barədə dedi:

- Azərbaycan Respublikasının Prezidenti cənab İlham Əliyev və xanımı Mehriban Əliyeva film fondun yeni istifadəyə verilmiş binasında oldular. Dövlət başçısı və xanımı ilk əvvəl foyedə ulu öndər Heydər Əliyevin milli kino sənətinin inkişafındakı xidmətlərini canlandıran fotoguşəyə, film fondun xarici, daxili görünüşlərini əks etdirən fotoşəkillərə baxdılar. Dövlət başçısına məlumat verildi ki, ümumi sahəsi 8,6 min kvadratmetr olan binanın birinci mərtəbəsində texniki avadanlıqla təchiz edilmiş inzibati otaqlar, laboratoriya, 120 yerlik salon və yardımçı otaqlar yerləşir. Fondda dünya kinosunun tarixini əks etdirən kinokameralar, o cümlədən 1902-ci ilin istehsalı olan "Edisson" kinoproyektoru, 1910-cu ildə istehsal olunan "Debri" kinokamerası, habelə Azərbaycan kinosunun tarixi baxımından qiymətli olan yazının dərc olunduğu "Kaspi" qəzetinin nadir nüsxəsi və digər eksponatlar nümayiş etdirilir.

Dövlət Film Fondunda ümumilikdə 64 min 373 ədəd saxlanma vahidi həcmində kinomaterial, 10 mindən çox müxtəlif arxiv sənədləri, eləcə də Azərbaycanda istehsal edilmiş filmlər saxlanılır. Burada xüsusi temperatur rejimi tətbiq olunur. Fondda siqnalizasiya və videomüşahidə sistemi qurulmuşdur. Qədim tarixi olan filmlərin qorunması üçün xüsusi boks yaradılmışdır. Onların sayı 1000 ədəddən çoxdur. İndiyə qədər Rusiya arxivlərində saxlanılan 30-a qədər Azərbaycan filminin nüsxələri fondun arxivinə daxil edilmişdir.

Fondda kino ilə bağlı 12 mindən çox foto da qorunur. Fotoarxivə dünyanın müxtəlif yerlərində istehsal edilən filmlərin fotoşəkilləri də daxil edilmişdir. Əməkdaşlarımız bu şəkilləri şəxsi arxivlərdən yığmışlar. Ötən əsrin 60-cı illərində istehsal edilən ekran əsərindən çıxarılan fotolar üzərində bərpa işləri aparılıb. Arxivə Avropa və Amerikada, Baltikyanı ölkələrdə çəkilən filmlərin fotoşəkilləri də daxil edilmişdir.

Dövlət Film Fondunda görülən işlər Azərbaycan kino incilərinin daha mükəmməl və etibarlı qorunmasına imkan verəcək. Burada kino tarixi ilə bağlı tədqiqatların aparılması üçün də lazımi şərait var.

T.Ağaoğlu

Azərbaycan.-2009.-16 may.-S.7.