Slovakiya Azərbaycan ilə hüquqi islahatlar sahəsində əməkdaşlıqda maraqlıdır

Azərbaycan Respublikasının baş prokuroru Zakir Qaralov ölkəmizdə səfərdə olan Slovakiya Baş nazirinin müavini, ədliyyə naziri Ştefan Harabinin başçılıq etdiyi nümayəndə heyəti ilə görüşmüşdür.

Ölkəmizdə həyata keçirilən demokratik islahatlardan söhbət açan baş prokuror, məhkəmə hakimiyyətinin müstəqilliyinə təminat verən məhkəmə-hüquq islahatları, qanunvericilik bazasının təkmilləşdirilməsi, yeni məhkəmə sisteminin təşkili, qanunvericiliyə beynəlxalq standartlara uyğun əlavələrin edilməsi, Məhkəmə-Hüquq Şurasının yenidən formalaşdırılması, Hakimlərin Seçki Komitəsinin yaradılması, hakim vəzifəsinə namizədlərin tam şəffaf prosedurlarla, ən müasir beynəlxalq tələblər səviyyəsində seçilməsinin yeni qaydasının müəyyən olunması barədə ətraflı məlumat vermişdir.

Qeyd edilən tədbirlərin davamı olaraq Azərbaycan və Slovakiya ədliyyə nazirlikləri arasında imzalanmış əməkdaşlıq haqqında memorandumun dövlətlərimizin hüquqi əməkdaşlığının daha da möhkəmləndirilməsində rolu xüsusi vurğulanmışdır.

Baş prokuror Zakir Qaralov sivil və mütərəqqi dövlət təsisatı kimi tam yeni məzmunda formalaşmış Azərbaycan prokurorluğunun fəaliyyəti barədə qonaqlara geniş məlumat verərək, yeni siyasi, iqtisadi, sosial reallıqlara uyğun olaraq, ölkəmizdə prokurorluq orqanlarının statusunda əsaslı dəyişikliklər edilməsi, şəffaflığın təmin edilməsi, prokurorluq işçilərinin maddi və sosial vəziyyətinin yaxşılaşdırılması, prokurorluğun kadr korpusunun sağlamlaşdırılması istiqamətində ən qəti tədbirlər görülməklə 2002-ci ildən başlayaraq, keçirilən müsabiqələr nəticəsində hazırda prokurorluq işçilərinin ümumi sayının 30 faizdən çoxunu təşkil edən 293 gənc mütəxəssisin işə qəbul edilməsi, Baş Prokuror yanında Korrupsiyaya Qarşı Mübarizə İdarəsinin yaradılması, dövlət ittihamının müdafiəsi işinin tamamilə yeni məzmunda formalaşdırılması, ölkəmizin dünya dövlətləri birliyinə inteqrasiyası şəraitində prokurorluğun beynəlxalq əlaqələrinin daha da genişləndirilməsi istiqamətində görülən işlərdən söhbət açmışdır.

Görüşdə "İnsan hüquqlarının və əsas azadlıqların müdafiəsi haqqında" Avropa Konvensiyasının və İnsan hüquqları üzrə Avropa Məhkəməsinin presedent hüququnun prokurorluq orqanlarında ciddi öyrənilməsi, təcrübədə tətbiq olunması və bu sahədə prokurorluq orqanlarının qarşısında duran vəzifələr barədə ətraflı məlumat verilmişdir.

Səmimi qəbuldan və ədliyyə sahəsində səmərəli əməkdaşlıqdan məmnun qalan Ştefan Harabi Slovakiyanın Azərbaycan ilə hüquqi islahatlar üzrə ikitərəfli formatda əməkdaşlıqda maraqlı olduğunu bildirmişdir. O, təmsil etdiyi təşkilatın Azərbaycanla əlaqələrin inkişafına böyük önəm verdiyini xüsusi vurğulayaraq, səfər müddətində Azərbaycanda keçirdiyi görüşlərdən söz açmış, Ali Məhkəmənin yeni inzibati binasının açılışını Azərbaycanda məhkəmə hakimiyyətinə dövlət səviyyəsində göstərilən yüksək diqqətin təzahürü kimi qiymətləndirmişdir. Ştefan Harabi slovakiyalı həmkarları tərəfindən İnsan hüquqları üzrə Avropa Məhkəməsinin presedent hüququnun öyrənilməsi və məhkəmə təcrübəsində istifadə olunmasından ətraflı söhbət açmışdır.

Görüşdə ölkələrimizin prokurorluq orqanları arasındakı əməkdaşlıgın perspektivlərinə dair, həmçinin tərəfləri maraqlandıran digər məsələlər ətrafında fikir mübadiləsi aparılmışdır.

AzərTAc

Azərbaycan.-2009.-17 may.-S.4.