Azərbaycan ilə
Amerika Birləşmiş Ştatları strateji tərəfdaşdırlar
və ölkələrimiz arasında çox yaxşı
işbirliyi vardır. Azərbaycanın antiterror əməliyyatlarında
rolu, regional layihələrdə iştirakı dünya birliyi
tərəfindən yüksək qiymətləndirilir.
Bu fikirlər ölkəmizdə
səfərdə olan ABŞ Milli Hərbi Kollecinin yüksək
rütbəli hərbi və mülki şəxslərdən
ibarət nümayəndə heyətinin mayın 18-də Milli
Məclis Sədrinin birinci müavini, parlamentin Təhlükəsizlik
və müdafiə komitəsinin sədri Ziyafət Əsgərov
ilə görüşündə səslənmişdir.
Z.Əsgərov
demişdir ki, Azərbaycan ilə ABŞ arasında münasibətlərimiz
yüksək səviyyədədir. Nümayəndə heyətlərimizin
qarşılıqlı səfərləri əməkdaşlığımızı
daha da genişləndirir və möhkəmləndirir. Ölkələrimizin
münasibətləri strateji tərəfdaşlıq səviyyəsinə
yüksəlmişdir. Azərbaycan ilə ABŞ-ın bir
sıra irimiqyaslı layihələrdə, eləcə də
antiterror əməliyyatlarında birgə əməkdaşlığı
müsbət nəticələr verir. Ümid edirik ki, iqtisadi
sahədə olduğu kimi, siyasi və hərbi sahələrdə
də əməkdaşlıq uğurla davam edəcəkdir.
ABŞ Milli Hərbi
Kollecinin fakültə nümayəndəsi Ceyms MakDuqal
demişdir ki, ötən il regionda tədqiqatlar
aparmışlar. Azərbaycanda həyata keçirilən
islahatlar, demokratik inkişaf təqdirəlayiqdir. Bu gün on nəfər
azərbaycanlının ABŞ-ın Milli Müdafiə
Akademiyasında təhsil aldığını diqqətə
çatdıran C.MakDuqal bildirmişdir ki, Azərbaycanın
antiterror əməliyyatlarda iştirakı, regional layihələrdəki
rolu dünya birliyi tərəfindən yüksək qiymətləndirilir.
Sonra görüşdə
qarşılıqlı maraq doğuran digər məsələlər
ətrafında fikir mübadiləsi aparılmışdır.
AzərTAc
Azərbaycan.- 2009.- 19 may.- S. 3.