Rəssamın yubiley sərgisi keçirilmişdir

Muzey Mərkəzinin sərgi qalereyasında qrafika sənətinin tanınmış nümayəndələrindən Mais Əliyevin anadan olmasının 60 illik yubileyinə həsr olunmuş fərdi yaradıcılıq sərgisi açılmışdır.
Bu münasibətlə keçirilən mərasimdə Rəssamlar İttifaqının katibi, xalq rəssamı Ağəli İbrahimov və başqaları M.Əliyevin yaradıcılığından və əsərlərinin özünəməxsus xüsusiyyətlərindən danışmışlar.

Tədbirdə vurğulanmışdır ki, M.Əliyev 1968-ci ildə Ə.Əzimzadə adına Dövlət Rəssamlıq Məktəbini bitirdikdən sonra təhsilini V.İ.Surikov adına Moskva Dövlət Rəssamlıq İnstitutunda, Ukraynanın Lvov şəhərindəki İ.Fyodorov adına Poliqrafiya İnstitutunun dəzgah və kitab qrafikası fakültəsində davam etdirmişdir.

Rəssamın ilk fərdi sərgisi 2000-ci ildə ABŞ-ın Arizona ştatında keçirilmiş, ikinci fərdi sərgisi isə 2004-cü ildə "Abşeron" rəsm qalereyasında açılmışdır. Fırça ustasının əsərləri xarici ölkələrdəki şəxsi kolleksiyalarda və muzeylərdə saxlanılır.

Sərgidə tamaşaçılara 74 qrafika əsəri təqdim olunmuşdur.

AzərTAc

Azərbaycan.- 2009.- 19 may.- S. 6.