Bələdiyyələrin fəaliyyətinə
inzibati nəzarət gücləndirilir
Ədliyyə Nazirliyinin mətbuat xidmətindən bildirmişlər ki, ölkəmizdə demokratiyanın inkişafına, bələdiyyələr haqqında normativ-hüquqi bazanın təkmilləşdirilməsinə, onların fəaliyyətinin qanunvericiliyə uyğun qurulmasına xüsusi diqqət yetirilir. Mart referendumunda bu sahədə inzibati nəzarətin konstitusion statusu təsbit olunmuşdur.
Bələdiyyələr insanların rifahının yaxşılaşması naminə sosial, iqtisadi və ekologiya sahələrində iş aparır, yerli əhəmiyyətli məsələlərin həllində fəal iştirak edirlər. Bununla yanaşı, bəzi bələdiyyələr qanun pozuntularına yol verirlər.
Ədliyyə Nazirliyi tərəfindən bələdiyyələrə metodoloji yardımın yaxşılaşdırılması, mövcud problemlərin aradan qaldırılması, onların fəaliyyətinə inzibati nəzarətin gücləndirilməsi üzrə ardıcıl tədbirlər görülür.
Bu ilin ötən dövründə inzibati nəzarət qaydasında aparılmış araşdırmalar nəticəsində bir sıra bələdiyyələr tərəfindən qanunvericiliyin tələblərinin kobud şəkildə pozulması, torpaqların qanunsuz dövriyyədən çıxarılıb və yaxud hərrac qaydalarına riayət edilmədən və bazar qiyməti nəzərə alınmadan mülkiyyətə, icarəyə verilməsi, sənədlərin saxtalaşdırılması və digər ciddi hüquq pozuntuları aşkar edilmişdir.
Həmin hərəkətlərlə bələdiyyə büdcələrinə külli miqdarda, o cümlədən Şəmkir rayonu Qaracəmirli bələdiyyəsi tərəfindən 4,1 milyon manat, Binəqədi rayonu Xocəsən bələdiyyəsi tərəfindən 3,6 milyon manat, Sabunçu rayonu Pirşağı bələdiyyəsi tərəfindən 1,3 milyon manat, Quba rayonu İkinci Nügədi bələdiyyəsi tərəfindən isə 337 min manat ziyan vurulması və s. ciddi faktlar müəyyən olunmuşdur.
Belə pozuntular digər yerli özünüidarəetmə orqanlarının fəaliyyətində, o cümlədən Oğuz rayonu Filfili və Xalxal, Astara rayonu Ərçivan, Samux rayonu Qiyaslı, Bakı şəhəri Nəsimi və Qaradağ rayonu Sahil bələdiyyələrində aşkar edilmişdir.
Qeyd olunan 10 bələdiyyə ilə bağlı araşdırma materialları cinayət işinin başlanması məsələsinə baxılması üçün Baş Prokurorluğa göndərilmişdir.
Bələdiyyələrin işində qanunçuluğun möhkəmləndirilməsi yönündə tədbirlər davam etdirilir.
AzərTAc
Azərbaycan.- 2009.- 19 may.- S. 7.