Bədii gimnastlarımızın tarixi zəfəri

Bakıda bədii gimnastika üzrə XXV Avropa çempionatı başa çatmışdır. Azərbaycan idmançıları bu yarışlarda 3 medal qazanaraq tarixi nailiyyətə imza atmışlar. Komanda hesabında seniorlardan ibarət millimiz və yeniyetmələrdən ibarət qrup hərəkətləri üzrə komandamız fəxri kürsünün ikinci pilləsinə qalxaraq gümüş medala yiyələnmişlər. Ayrı-ayrı növlər üzrə fərdi yarışların finalında isə bədii gimnastımız Anna Qurbanova topla bürünc medal qazanmışdır.

İdmançılarımızın tarixi uğuru mütəxəssislərin diqqətindən kənarda qalmamışdır. Ümumrusiya Gimnastika Federasiyasının prezidenti, Rusiya yığmasının baş məşqçisi İrina Viner azərbaycanlı bədii gimnastların çıxışını yüksək qiymətləndirmişdir. O qeyd etmişdir ki, Azərbaycan "gümüş"ə layiq idi, gimnastlar isə çox ləyaqətlə çıxış etmişlər: "Yadımdadır, bir vaxtlar Dinarə Gimatova Avropa çempionatının S divizionunda çıxış edirdi. Lakin qısa zamanda komanda gücünü xeyli artırmış və layiqli nailiyyət əldə etmişdir". Öz növbəsində ilk dəfə Avropa çempionatında məşqçi rolunda çıxış etmiş Dinarə Gimatova komandamızın nəticələrindən razı qaldığını bildirmişdir: "Məşqçi işi çox xoşuma gəlir. Müəllimlərimdən aldığım bütün təcrübə və biliklərimi yeni nəslə ötürməyə çalışacağam ki, Azərbaycan gimnastikası və Azərbaycan bayrağı yüksəlsin".

Azərbaycan Respublikasının Prezidenti, Azərbaycan Milli Olimpiya Komitəsinin prezidenti İlham Əliyev yarış ərəfəsində bildirmişdi ki, "bədii gimnastika üzrə mötəbər yarışların Azərbaycanda keçirilməsi artıq ənənə halını almışdır. Bu, respublikada idman və olimpiya hərəkatının sürətli inkişafının və Azərbaycanın dünyanın idman mərkəzlərindən birinə çevrilməsinin göstəricisidir. Ölkəmizdə bədii gimnastika özünün sürətli inkişaf dövrünü yaşayır... Milli Gimnastika Federasiyasının çoxtərəfli fəaliyyəti, bu qurumun beynəlxalq əlaqələri səmərəli əməkdaşlıq şəraitində qurması, ölkəmizdə keçirilmiş dünya və qitə çempionatlarının yüksək səviyyədə təşkil olunması öz bəhrələrini verir".

Sevindirici haldır ki, dövlət başçısının dedikləri qitə birinciliyinin nəticələri baxımından bir daha öz təsdiqini tapdı.

Avropa çempionatının Təşkilat Komitəsinin prezidenti, Azərbaycan Gimnastika Federasiyasının prezidenti Mehriban xanım Əliyeva XXV Avropa çempionatının iştirakçılarını, nümayəndə heyətlərinin üzvlərini və digər qonaqları salamlayaraq demişdir: "Azərbaycan paytaxtı Avropanın bədii gimnastika ailəsini qəbul etməyə və yeni çempionların adını elan etməyə hazırdır. Biz çox gözəl başa düşürük ki, Bakıda keçiriləcək "Avro-2009" yeni Olimpiya dövründə ilk mühüm yarış olacaqdır. Bundan əlavə, bu, yubiley çempionatıdır və bu amil də bizim - təşkilatçıların məsuliyyətini daha da artırır. 2007-ci ildə bu cür mühüm yarışların keçirilməsindəki təcrübəmizi nəzərə alaraq biz bu çempionatı yüksək səviyyədə təşkil edəcək, bununla da Avropa Gimnastika İttifaqının (AGİ) bizə göstərdiyi etimadı doğruldacağıq. Biz gözəl şərait yaradacağıq və mən ümid edirəm ki, siz Bakıya yenidən gəlməkdən, onun çoxəsrlik mədəniyyətini və müasir görünüşünü, onun qədim idman ənənələrini qiymətləndirərək məmnunluq duyacaqsınız. Mən əminəm ki, çempionatın hər günü Avropanın bədii gimnastika bayramının xoş anlarına çevriləcəkdir".

Mehriban xanım Əliyevanın dedikləri bütövlüklə reallaşmış və XXV Avropa çempionatı böyük idman bayramına çevrilmişdir. Turnirdə həm də yeni adlar üzə çıxmışdır. Buna misal olaraq ölkəmizin yeniyetmələrdən ibarət qrup hərəkətləri üzrə komandasını, belaruslu bədii gimnast Melitina Stanyutu, ukraynalı Alina Maksimenkonu, bolqarıstanlı idmançı Silviya Mitevanı və digərlərini göstərmək olar.

Yubiley çempionatı Avropa Gimnastika İttifaqının prezidenti Dimitrios Dimitropulosdan da yüksək qiymət almışdır. Qitə birinciliyinin yenidən paytaxtımızda keçirilməsindən qürur duyduğunu bildirən AGİ-nin rəhbəri demişdir: "2007-ci ildə Bakıda keçirilmiş bədii gimnastika üzrə Avropa çempionatının uğurlu təşkilindən sonra Avropa Gimnastika İttifaqı bilirdi ki, təşkilatçı federasiya və Azərbaycan hökuməti ilə birgə Bakı turnirin səlahiyyətli və peşəkar sahibi olacaq. Mən qürur hissi keçirirəm və minnətdaram ki, Azərbaycan Gimnastika Federasiyası bir daha Avropa Gimnastika İttifaqının 2009-cu ildə keçiriləcək ən mühüm yarışlardan birini təşkil etmək məsuliyyətini öz üzərinə götürdü. Mən Avropa Gimnastika İttifaqı adından Təşkilat Komitəsinə və onun üzvlərinə gördükləri işə görə səmimi minnətdarlığımı bildirirəm".

Yeni Olimpiya mərhələsində ilk vacib yarış olan bədii gimnastika üzrə XXV Avropa çempionatı artıq arxada qalmışdır. Bu turnir 2012-ci ildə Londonda keçiriləcək Yay Olimpiya Oyunlarına gedən yolun başlanğıcıdır. Bu yolda bədii gimnastlarımıza yeni-yeni uğurlar arzulayırıq.

Rizvan HİLALOĞLU

Azərbaycan.- 2009.- 19 may.- S. 8.