Milli Məclisdə görüş

Mayın 19-da Milli Məclisin Azərbaycan-Macarıstan parlamentlərarası əlaqələr üzrə işçi qrupunun üzvləri ilə ölkəmizdə səfərdə olan Macarıstan Parlamentinin Avropa İşləri üzrə Komitəsinin sədri Matyas Eörşinin rəhbərlik etdiyi nümayəndə heyəti arasında görüş keçirildi.

Qonaqları səmimi salamlayan Azərbaycan-Macarıstan parlamentlərarası əlaqələr üzrə işçi qrupunun sədri Xanhüseyn Kazımlı Azərbaycanla Macarıstan arasındakı dostluq əlaqələrinin qədim tarixindən danışaraq ölkəmizin müstəqillik qazandıqdan sonra münasibətlərimizin daha da genişləndiyini bildirdi. Azərbaycan Prezidenti İlham Əliyevin 2008-ci ilin fevralında Macarıstana dövlət səfərini xatırladan Xanhüseyn Kazımlı dedi ki, bu səfər ölkələrimiz arasında əlaqələrin inkişafında yeni səhifə açmışdır.

Azərbaycanın sosial-iqtisadi inkişafından söz açan işçi qrupun sədri Ermənistan-Azərbaycan, Dağlıq Qarabağ münaqişəsi barədə də qonaqlara ətraflı məlumat verdi.

Xanhüseyn Kazımlı Matyas Eörşinin Avropa Şurası Parlament Assambleyasının Baş katibi postuna namizədliyini irəli sürməsini yüksək qiymətləndirərək onun seçiləcəyi təqdirdə bu beynəlxalq təşkilatda Azərbaycanın haqlı mövqeyinin müdafiə ediləcəyinə ümidvar olduğunu bildirdi.

Azərbaycana dost kimi gəldiyini vurğulayan Matyas Eörşi dedi ki, Avropa İttifaqının "Şərq Tərəfdaşlığı Proqramı" çərçivəsində reallaşan səfərinin məqsədi Azərbaycanın mövqeyini daha yaxından öyrənmək, məsələhətləşmələr aparmaqdır. O bildirdi ki, Azərbaycanın sürətli inkişafı, həyata keçirilən hüquqi, demokratik islahatların uğurlu nəticələri bu ölkənin parlaq gələcəyindən xəbər verir. "Biz Azərbaycana böyük ümidlə baxırıq. İnanırıq ki, Azərbaycan yaxın gələcəkdə Avropa ailəsinin tamhüquqlu üzvü olacaqdır".

Qonaq onu da bildirdi ki, AŞPA-nın Baş katibi seçilibseçilməyəcəyindən asılı olmayaraq Azərbaycanın haqlı mövqeyini həmişə müdafiə edəcəkdir.

Görüşdə "Şərq Tərəfdaşlığı Proqramı"nın əhəmiyyəti, Dağlıq Qarabağ münaqişəsinin həlli yolları, Azərbaycan-Macarıstan əlaqələrinin, parlamentlərarası münasibətlərin inkişaf perspektivləri və digər məsələlər ətrafında geniş fikir mübadiləsi aparıldı.

Azərbaycan.-2009.-20 may.-S.3.