Zaqatala daha
da irəliləyəcək
"Azərbaycan Respublikası
regionlarının 2009-2013-cu illərdə sosial-iqtisadi
inkişafı Dövlət
Proqramı"nın
təsdiq edilməsi Zaqatala rayonunda da böyük ruh yüksəkliyi ilə qarşılanmışdır.
2004-2008-ci illəri əhatə
edən I Dövlət
Proqramının icrası
regionların, o cümlədən Zaqatalanın sosial-iqtisadi
yüksəlişinə əhəmiyyətli
dərəcədə təsir
etmiş, rayonun simasını kökündən
dəyişmişdir. Dünyanı qlobal maliyyə böhranı bürüdüyü,
əksər ölkələrdə
işsizliyin, maddi sıxıntının artdığı
bir vaxtda ölkəmizdə indiyə
qədər görülmüş
və görülməkdə
olan möhtəşəm
tədbirlərin davamını
şərtləndirən II Dövlət Proqramının
qəbulu bölgələrin sosial-iqtisadi inkişafının
yeni mərhələsini
əsaslandırmaqla yanaşı,
insanlarımızın gələcəyə
inamını daha da gücləndirir, sosial-iqtisadi tərəqqi
yönündə onların
mənəvi-psixoloji rahatlığına zəmin
yaradır.
Zaqatala RİH başçısı Asif
Əsgərovun sözlərinə
görə, son beş ildə rayon üzrə nəzərdə tutulan bütün layihələr
vaxtında icra olunmuş, iqtisadi və sosial sahələrdə baş
verən dəyişiklikləri
əks etdirən makroiqtisadi göstəricilər
artmış, sahibkarlığın
inkişafı üçün
lazımi şərait yaradılmış, yeni müəssisələrin və
iş yerlərinin açılması yönündə
mühüm tədbirlər
həyata keçirilmişdir.
II Dövlət Proqramında nəzərdə tutulan sənaye və kənd təsərrüfatı istehsalının genişləndirilməsi, elektrik enerjisi, istilik və qaz təchizatının yaxşılaşdırılması, səhiyyə, mədəniyyət, idman və təhsil müəssisələrinin inşası, yenidən qurulması və digər tədbirlər zaqatalalıların ürəyincə olmuşdur.
Rayon təhsil
şöbəsinin müdiri
Tahir Məmmədov:
- I Dövlət Proqramı çərçivəsində həyata keçirilən
tədbirlər nəticəsində
Zaqatala rayonunda təhsilin bütün sferaları inkişaf etmiş, məzmunu yeniləşmiş, yeni məktəblər tikilmiş,
informasiya texnologiyaları
tətbiq edilmişdir.
Təhsilə ayrılan vəsait hər il davamlı surətdə artmışdır.
2003-cü ildə rayonun
təhsil xərcləri
2,7 milyon manat olduğu halda, 2008-ci ildə 11,3 milyon manata çatmışdır.
Son illər rayonumuzda yeni məktəblərin tikintisi,
təhsil müəssisələrinin
əsaslı təmiri
və maddi-texniki bazasının yeniləşməsi
təhsilin keyfiyyətinin
yüksəlməsinə şərait
yaratmışdır. Artıq
müəllimlərimizin 30 faizi dərslərini kompüter avadanlığının
köməyilə tədris
edir.
Məlumdur ki, ümumtəhsil məktəblərində təhsilin keyfiyyətinin yüksəlməsi onun maddi-texniki bazasının möhkəmləndirilməsindən asılıdır. Son beş ildə Prezidentin imzaladığı fərman və sərəncamlara uyğun olaraq, Zaqatala şəhərində 320 yerlik internat məktəbi, akademik Zərifə Əliyeva adına 500 yerlik məktəb-lisey, eləcə də Qazangül, Marıx, Danaçı, Qanbax və digər kəndlərdə yeni məktəb binaları tikilmiş, bütün tədbir ocaqlarının maddi-texniki bazası möhkəmləndirilmişdir. Bütün bunlar çox möhtəşəm işlərdir və bu işlərin davamlı olması üçün II Dövlət Proqramının təsdiq edilməsi biz təhsil işçilərini çox sevindirir.
Rayon Qaz İdarəsinin rəisi Qurban Mehdiyev:
- II Dövlət Proqramında Zaqatala şəhərinin qaz təchizatının yaxşılaşdırılmasının və rayonun yaşayış məntəqələrinin qazlaşdırılmasının nəzərdə tutulmasını hər birimiz böyük minnətdarlıq hissi ilə qarşıladıq. Baxmayaraq ki, regionların sosial-iqtisadi inkişafına dair qəbul olunmuş I Dövlət Proqramının icrası müddətində Zaqatalada qaz təchizatının yaxşılaşdırılması və yaşayış məntəqələrinin qazlaşdırılması istiqamətində xeyli iş görülmüşdür. Bir faktı xatırladım ki, son 3 ildə rayonda qaz abonentlərinin sayı 2,7 dəfə artaraq 8300-ü keçmişdir. Zaqatala şəhəri, Aşağı Tala, Yuxarı Tala, Kebeloba, Muxax və Zəyəm kəndləri tam qazlaşdırılmış, Qazangül qəsəbəsi, Çökəkoba, Göyəm, Sumaylı və Dardoqqaz kəndlərinə orta təzyiqli qaz xətləri çəkilmişdir. Əliabad qəsəbəsində tikilməkdə olan yeni qaz paylayıcı stansiya isə əlavə 10 kəndin qazlaşmasına imkan verəcək. II Dövlət Proqramının təsdiqi işlərimizin uğurlu davamı üçün bizə daha geniş imkanlar yaradacaq.
Əhalinin Sosial Müdafiəsi Mərkəzinin
direktoru Elman Muradov:
- Regionların sosial-iqtisadi inkişafı ilə bağlı II Dövlət Proqramının qəbulu ötən müddət ərzində sosial təminat sahəsində görülmüş işlərin davam etdirilməsi deməkdir. Yeri gəlmişkən qeyd edim ki, son illər Zaqatalada pensiya təminatının maliyyə sabitliyi və tarazlığı təmin edilmiş, 2081 nəfərə ünvanlı sosial yardım verilmiş, 220 nəfər kimsəsiz yaşlılara xidmət göstərilmişdir. Hazırda 3688 nəfər sosial müavinət alır. Əlillərin sosial müdafiəsinin gücləndirilməsi istiqamətində də müvafiq tədbirlər görülmüş, əlil və şəhid ailələri üçün 36 və 28 mənzilli hər cür avadanlıq və mebellə təchiz olunmuş yaşayış binaları və fərdi evlər tikilmişdir.
Rayon Suvarma Sistemləri İdarəsinin
rəisi Fikrət Şərifov:
- Zaqatalada torpaqların sel sularından mühafizə edilməsi, suvarma şəbəkəsinin təmiri və əhatəsinin genişləndirilməsi ilə bağlı xeyli işlər görülmüş, suvarma suyundan səmərəli istifadəyə diqqət artırılmışdır. İdarəmiz tərəfindən ötən müddət ərzində Muxaxçayda 500, Talaçayda 160, Bəkməzçayda 100 metr uzunluğunda əsaslı bəndlər tikilmiş, istismarda olan bəndlərdə təmir işləri aparılmış, 10 kənddə suvarma məqsədilə artezian quyuları qazılmışdır. II Dövlət Proqramında nəzərdə tutulan tədbirlər isə bizə imkan verəcək ki, daha 3 çayda bənd tikintisini davam etdirək. Yeni proqramda əlavə texnika almağımız da nəzərdə tutulub. Bu isə əkinə yararlı torpaq sahələrinin suvarılmasında mühüm rol oynayacaq. Nəzərdə tutduğumuz işlərin Dövlət Proqramının tədbirlər planında əksini tapması bir daha deməyə əsas verir ki, üzərimizə düşən vəzifələrin yüksək səviyyədə yerinə yetirilməsi üçün heç bir çətinliyimiz olmayacaq.
17 saylı Yol İstismarı İdarəsinin rəisi Mövlud Qəhrəmanov:
- Yeni Dövlət Proqramında yol təsərrüfatı və nəqliyyatın inkişafı üçün də müəyyən tədbirlər nəzərdə tutulub. Bu da həqiqətdir ki, ötən 5 il ərzində Azərbaycanda yol təsərrüfatının inkişafına xüsusi fikir verilmişdir. Təkcə 2006-2008-ci illərdə Zaqatala rayonunda 55 kilometrə yaxın şəhər və kənd yolları, o cümlədən 8 körpü tikilmişdir. Hazırda isə Qafqazda bənzəri olmayan 172 metr uzunluğunda asma körpü inşa olunur. Bir-iki aya tikinti başa çatmalıdır. Bütün dünyanı iqtisadi böhran bürüdüyü, hətta məşhur şirkətlərin işlərini dayandırmaq təhlükəsi ilə üzləşdiyi bir zamanda ölkəmizdə sürətli inkişaf tempi təmin edilir. Öz sahəmizlə bağlı bir misal deyim. Təkcə aprel ayı ərzində 6,5 kilometr yol asfaltlaşdırılıb, Qandax-Faldarlı kəndlərinə asfalt yol çəkilişi başa çatdırılıb. Suvagil kəndinə isə yola asfalt döşənməsi davam edir. Son bir ay ərzində 5 min tona yaxın asfalt istehsal etmişik. Bu asfalt rayonun şəhər və kənd yollarının abadlaşdırılmasında istifadə olunur.
Telman Nəzərli
Azərbaycan.-2009.-20 may.-S.5.