Estoniya ilə Azərbaycan arasındakı münasibətləri genişləndirmək üçün böyük imkanlar vardır

Azərbaycanda səfərdə olan Estoniyanın sabiq Prezidenti Arnold Rüytel mayın 20-də Milli Məclisə gəlmişdir. Qonaq əvvəlcə Milli Məclisin iclas salonuna baxmış, deputatlar üçün yaradılmış iş şəraitini yüksək qiymətləndirmişdir. Parlamentin binasındakı Heydər Əliyev Xatirə zalı ilə də tanış olan Arnold Rüytel xalqımızın ümummilli lideri Heydər Əliyevin həyat və fəaliyyətini, dünyanın tanınmış siyasətçilərinin Azərbaycana səfərlərini və ulu öndərlə görüşlərini əks etdirən fotoşəkilləri, tarixi sənədləri maraqla izləmişdir.

Sonra Arnold Rüytel Milli Məclisin Sədri Oqtay Əsədovla görüşmüşdür.

O.Əsədov Azərbaycan ilə Estoniya arasındakı əlaqələrin tarixindən danışmış, hələ sovetlər birliyi dövründə ölkələrimiz arasında mehriban dostluq münasibətlərinin olduğunu diqqətə çatdırmışdır. Milli Məclisin Sədri müstəqillik illərində əlaqələrimizin daha da inkişaf etdiyini vurğulamış, bu işdə dövlətlərimizin başçılarının rolunu xüsusi qeyd etmişdir.

O.Əsədov eston iş adamlarının Azərbaycan iqtisadiyyatına sərmayə qoyduqlarının, ticarət dövriyyəsinin ilbəil artdığını diqqətə çatdırmışdır.

Estoniyanın sabiq Prezidenti ölkələrimiz arasındakı münasibətlərin mövcud səviyyəsindən razılığını bildirmiş, Azərbaycanın son illərdə əldə etdiyi uğurları yüksək qiymətləndirmişdir.

Qonaq demişdir ki, ölkələrimiz arasındakı münasibətləri daha da genişləndirmək üçün böyük imkanlar vardır. Parlamentlər bu sahədə faydalı iş görə bilərlər. Deputatlarımızın və hökumət üzvlərinin, eləcə də iş adamlarının qarşılıqlı səfərləri də bu baxımdan mühüm əhəmiyyətə malikdir.

Sonra görüşdə regional layihələr, dünyada baş verən proseslər, qlobal maliyyə böhranı, eləcə də qarşılıqlı maraq doğuran digər məsələlər ətrafında fikir mübadiləsi aparılmışdır.

AzərTAc

Azərbaycan.- 2009.- 21 may.- S. 2.