ANAMA-nın bazasında minalarla mübarizə üzrə beynəlxalq mərkəz yaradılacaqdır

Mayın 20-də ANAMA-nın (Ərazilərin Minalardan Təmizlənməsi üzrə Milli Agentlik) əsas ofisində Birləşmiş Millətlər Təşkilatının İnkişaf Proqramı (BMTİP) ilə birgə layihənin üçüncü mərhələsinin həyata keçirilməsinə dair sənədin imzalanma mərasimi keçirilmişdir.

ANAMA-nın direktoru Nazim İsmayılov bildirmişdir ki, "Azərbaycanda minalarla mübarizə üzrə potensialın daha da gücləndirilməsi və genişləndirilməsi" layihəsindən əsas məqsəd növbəti üç il ərzində ANAMA-ya texniki dəstək, məsləhət və əlaqələndirmə yardımı göstərməkdir.

Azərbaycanda Minalarla Mübarizə üzrə Proqramı çərçivəsində minalanmış ərazilərdə tədqiqat, xəritəçəkmə və təmizləmə işlərinin aparılması, həmçinin işğal altında olan torpaqlar azad edildikdən sonra bu ərazilərin minalardan təmizlənməsi üçün zəruri potensialın yaradılması nəzərdə tutulmuşdur. Ümumi dəyəri 6 milyon 600 min ABŞ dolları olan layihədə ANAMA-nın Minalarla Mübarizə üzrə Beynəlxalq Mərkəzə çevrilməsi də planlaşdırılır.

Bildirilmişdir ki, 1998-ci ildən ANAMA-nın öz ehtiyatları hesabına 100 kvadratkilometrdən artıq ərazi təmizlənmişdir.

BMTİP-in rezident-əlaqələndiricisi Bruno Pueza müharibə şəraitində yaşayan Azərbaycan əhalisinin minalardan çox ziyan çəkdiyini bildirmiş, bu sahədə ANAMA-nın gördüyü işləri təqdirəlayiq hesab etmişdir. Azərbaycan hökumətinin ərazilərin minalardan təmizlənməsinə xüsusi diqqət yetirdiyini vurğulayan B.Pueza bu əməliyyatların səmərəli surətdə həyata keçirilməsində, həmçinin zərərçəkənlərə yardım göstərməkdə ANAMA-ya dəstək veriləcəyini söyləmişdir.

Sonra ANAMA ilə BMTİP arasında əməkdaşlığın daha üç il davam etdirilməsi barədə sənəd imzalanmışdır.

AzərTAc

Azərbaycan.- 2009.- 21 may.- S. 7.