Kanadada diasporumuzun təşkilatlanması başa çatıb

Kanadada fəaliyyət göstərən diaspor təşkilatlarımız burada Azərbaycan həqiqətlərinin yayılması, həmin ölkədə respublikamız barəsində dolğun təsəvvürün formalaşdırılması istiqamətindəki fəaliyyətlərində bir sıra uğurlara nail olublar. Bütün bunlar ayrı-ayrı Azərbaycan cəmiyyətlərinin fəaliyyətlərinin koordinasiya edilməsi, Kanada-Azərbaycan Əməkdaşlıq Assosiasiyasının yaradılması hesabına başa gəlib.

Assosiasiyanın prezidenti İlham Axundov bizimlə söhbətində görüləcək işlərdən və qarşıda duran vəzifələrdən söhbət açdı: - Kanadada fəaliyyət göstərən diaspor təkilatlarımızın, cəmiyyətlərimizin qlobal məsələlərin - ölkəmizin xarici siyasəti, Ermənistan-Azərbaycan, Dağlıq Qarabağ münaqişəsi barədə həqiqətlərin dünyaya çatdırılması, qondarma "erməni soyqırımı"nın ifşası məsələlərində və digər problemlərin həllində ayrı-ayrılıqda fəaliyyət göstərmələri ciddi effekt vermirdi. Qərara aldıq ki, Kanadada bütün diaspor təşkilatlarını bir mərkəzdə cəmləşdirək.

Çünki eyni istiqamətdə bir yox, bir neçə nəfər fəaliyyət göstərdikdə nəticə daha təsirli olur. Elə bu məqsədlə də Kanada-Azərbaycan Əməkdaşlıq Assosiasiyasını birləşdirici təşkilat olaraq təsis etdik. Birliyin yaradılması bu zərurətdən irəli gəldi. Hazırda mərkəzdə 10 diaspor təşkilatı təmsil olunur. Onlar Kanadanın müxtəlif yerlərində fəaliyyət göstərən Azərbaycan cəmiyyətləridir.

Bu qurumların müstəqil fəaliyyət göstərliklərini deyən assosiasiyanın rəhbəri təşkilatların vacib olan məqamlarda bir araya gəldiklərini qeyd etdi. Bütün təşkilatlar tədbirlərdə, hər hansı məsələ ilə əlaqədar beynəlxalq təşkilatlara, dünya ölkələrinə müraciətlərdə fərdi yox, assambleya adından çıxış edirlər.

İlham Axundov Kanadada təhsil alan gənclərlə iş aparıldığını xüsusi vurğuladı: "Diqqətimizi Kanadada təhsil alan azərbaycanlı tələbələrə yönəltmişik. Onların bir qismi burada çoxdan yaşayır. Bu insanlar gələcəkdə seçkili orqanlarda təmsil olunmaq imkanlarına malikdirlər. Əsas məqsədimiz soydaşlarımıza kömək etmək, istedadlı gənclərimizi üzə çıxarmaq, həmin gənclərin ictimai işlərdə yaxından iştirakını təmin etməkdən ibarətdir. Bizə müraciət edən azərbaycanlı gənclərə təhsil almaqda kömək göstəririk. Assambleyanın xətti ilə Kanadaya gələn dörd tələbə bizim himayəmiz altında təhsil alır. Soydaşlarımıza viza məsələsində də kömək göstəririk. Hazırkı şəraitdə Kanadada Azərbaycan həqiqətlərinin yayılmasının bir yolu da var - bu ölkənin universitetlərində konfranslar düzənləmək, tələbə cəmiyyətlərinin təşkilatçılığı ilə aksiyalar keçirmək. Tarixi faciələrimiz, soyqırım günlərimiz ilə əlaqədar anım mərasimləri təşkil edirik".

Assosiasiyanın rəhbəri qeyd etdi ki, hazırda Kanadada 33 min azərbaycanlı yaşayır. Soydaşlarımız bu ölkədə 13 diaspor təşkilatı təsis ediblər: "Dünya Azərbaycanlılarını Əlaqələndirmə Şurasının son toplantısı növbəti mərhələdə qarşımızda duran əsas vəzifələri müəyyənləşdirib. Mayın sonlarında assosiasiyanın qurultayını keçirəcəyik. Toplantıda "Dünya Azərbaycanlılarının Həmrəylik Xartiyası" müzakirə ediləcək. Eyni zamanda sənəddən irəli gələn vəzifələrə uyğun olaraq iş planımız təsdiq olunacaq. Mayın 28-də Azərbaycan bayrağının Toronto bələdiyyəsinin binası üzərində qaldırılması mərasimi keçiriləcək. Tədbirə Kanadanın təşkilatlarının, nüfuzlu qurumlarının nümayəndələrini də dəvət edəcəyik". Bundan bir gün sonra isə Toronto Universitetində "Xəzəryanı ölkələrin siyasətində enerji daşıyıcılarının rolu" mövzusunda beynəlxalq konfrans düzənlənəcək. Tədbirə Kanadanın müxtəlif bölgələrindən, ABŞ, İngiltərə və Azərbaycandan mütəxəssislər dəvət olunacaqdır.

İlham Axundov Kanadada iqtidar dəyişikliyi zamanı siyasi hakimiyyətin diaspor təşkilatlarına münasibətlərinə təsir göstərdiyini də dedi: "Üç il öncə Liberal Partiyası hakimiyyətdə idi. Bu siyasi təşkilatla yaxından əməkdaşlıq edirdik. Kanadanın Baş naziri Pol Martin Azərbaycanın diaspor təşkilatları ilə görüşüb müzakirələr apardı. Görüşdə bu ölkənin respublikamızda səfirliyinin açılması, Dağlıq Qarabağ münaqişəsi məsələlərini müzakirə etdik. Lakin sonra konservatorlar hakimiyyətə gəldi. Onlar hakimiyyətə gələn kimi ermənipərəst olduqlarını büruzə verdilər, bizimlə əməkdaşlığa maraq göstərmədilər. Bütün bunlara baxmayaraq həmin partiya ilə əlaqələr qurduq, münasibətlərimizdə balans yarada bildik. Artıq ermənipərəst dövlət məmurları hər hansı aksiyada iştirak etdikdə burada Azərbaycanın diaspor təşkilatlarının da fəaliyyət göstərdiyini anlayır, mövqelərimizi nəzərə alırlar".

Hazırda assosiasiyanın fəaliyyəti müsbət nəticələr verməkdədir. Dünyanın tanınmış ictimai-siyasi, elm xadimlərinin təşkilatın Kanadada keçirdiyi tədbirlərə qatılması ilə bir sıra uğurlar əldə edilib. İndi bu ölkənin ictimaiyyəti də Azərbaycan barəsində ətraflı məlumatlanmaqdadır. Kanada Senatının martın sonlarında keçirilmiş iclasında senatorlardan biri Xocalı faciəsi ifadəsini dilə gətirdi. O, Senatın üzvlərini Azərbaycanla həmrəy olmağa çağırdı. Bu, soydaşlarımızın böyük müvəffəqiyyətidir.

Anar RASİMOĞLU

Azərbaycan.- 2009.- 21 may.- S. 7.