Azərbaycan hər zaman qlobal sabitliyin və təhlükəsizliyin təmin olunmasına töhfə verməyə hazırdır

Xarici İşlər Nazirliyinin mətbuat xidmətindən bildirmişlər ki, nazir Elmar Məmmədyarov mayın 21-də ABŞ-ın Avropadakı Silahlı Qüvvələrinin komandanı, general Bants Kraddok ilə görüşmüşdür.

B.Kraddok Azərbaycanda ilk dəfə 2003-cü ildə olduğunu, ötən müddətdə Bakıda böyük dəyişikliklərin baş verdiyini diqqətə çatdırmışdır. Qonaq ölkələrimiz arasında ikitərəfli münasibətlərdə səmərəli əməkdaşlığın həyata keçirildiyini qeyd edərək, Əfqanıstanda sülhyaratma əməliyyatlarına Azərbaycanın verdiyi dəstəyi yüksək qiymətləndirmişdir.

Nazir E.Məmmədyarov Bakıda müşahidə olunan inkişafın bütün ölkədə gedən prosesin bir hissəsi olduğunu bildirmişdir.

Ölkəmizin hər zaman qlobal sabitliyin və təhlükəsizliyin təmin edilməsinə töhfə verməyə hazır olduğunu vurğulayan nazir, Cənubi Qafqazda da sülhün bərqərar edilməsinin zəruriliyini diqqətə çatdırmışdır. Xarici siyasət idarəsinin rəhbəri Ermənistanın Azərbaycana qarşı davam edən təcavüzünün buna ən böyük maneə olduğunu və Dağlıq Qarabağ münaqişəsinin Azərbaycanın ərazi bütövlüyü çərçivəsində tezliklə nizamlanmasının vacibliyini bildirmişdir.

Görüşdə qarşılıqlı maraq doğuran ikitərəfli, regional, qlobal məsələlər ətrafında fikir mübadiləsi aparılmışdır.

AzərTAc

Azərbaycan.- 2009.- 22 may.- S. 3.