Azərbaycanın
müdafiə naziri, general-polkovnik Səfər Əbiyev
mayın 21-də ABŞ-ın Avropadakı Silahlı Qüvvələrinin
komandanı, general Bants Kraddok ilə
görüşmüşdür.
Müdafiə Nazirliyində təntənəli
qarşılanma mərasimindən sonra nümayəndə heyətlərinin
geniş tərkibli görüşü olmuşdur.
Nazirliyin mətbuat xidmətindən
bildirmişlər ki, Azərbaycan-ABŞ əlaqələrinin
inkişaf dinamikasından söhbət açan S.Əbiyev, hərbi
əməkdaşlıq sahəsində də münasibətlərin
uğurlu olduğunu diqqətə
çatdırmışdır.
Müdafiə naziri
regionda hərbi-siyasi vəziyyətə toxunaraq bildirmişdir
ki, Ermənistan silahlı qüvvələri işğal
olunmuş Azərbaycan torpaqlarından geri çəkilməyincə
bölgədəki gərginlik daha da dərinləşəcək,
beləliklə, münaqişənin dinc yolla nizama
salınması mümkün olmayacaqdır. Ona görə də,
həm Avropa, həm də ATƏT-in Minsk qrupunun həmsədri
olan ölkələr işğalçı Ermənistana təsir
vasitələrini gücləndirməlidirlər. Əks təqdirdə,
arzu olunmayan prosesin yaranacağı qaçılmazdır.
General Bants Kraddok da
görüş zamanı bölgədəki gərgin vəziyyətin
aradan qaldırılmasının vacibliyini qeyd etmişdir. O, həmçinin
Azərbaycanın beynəlxalq təhlükəsizlik sisteminə
verdiyi töhfələrdən, Kosovoda, İraqda, hazırda isə
Əfqanıstanda ölkəmizin sülhməramlı hərbi
kontingentinin yüksək xidməti fəaliyyətindən
razılığını bildirmişdir.
Görüşdə
ABŞ-ın Azərbaycandakı səfiri Ann Ders iştirak
etmişdir.
AzərTAc
Azərbaycan.- 2009.- 22 may.- S. 3.