Daxili İşlər
Nazirliyinin mətbuat xidmətindən bildirmişlər ki, son
günlər Narkotiklərlə Mübarizə Baş İdarəsi
əməkdaşlarının keçirdikləri uğurlu əməliyyat
tədbirləri nəticəsində narkotiklərin qanunsuz
dövriyyəsi ilə məşğul olan iki transmilli
mütəşəkkil cinayətkar dəstə zərərsizləşdirilmişdir.
Onlardan ümumilikdə 121 kiloqramdan çox müxtəlif tərkibli
narkotik vasitə götürülmüşdür.
Cinayətkar dəstələrdən
birinin üzvləri olan İran vətəndaşları - 31
yaşlı Behzad Əmiri və 28 yaşlı Rəhman Zəmani
saxlanılmışlar. Onların üstündən və
kirayədə yaşadıqları mənzildən üst-üstə
13 bağlamada 26 kiloqram 147 qram heroin, 70 bağlamada 13 kiloqram
935 qram həşiş, 9 bükümdə 5 qram kokain və
1,2 qram tiryək tapılmışdır. Dəstə üzvləri
istintaqa ifadələrində narkotik vasitənin Abuzər
adlı həmyerlilərinə məxsus olduğunu
bildirmişlər. Şəxsiyyəti istintaq tərəfindən
araşdırılan həmin İran vətəndaşı
narkotik maddələri 26 ədəd ütü lövhəsində
gizlədərək, qaçaqmalçılıq yolu ilə
ölkəmizə göndərmişdir.
Behzad Əmiri və Rəhman
Zəmani ütü lövhələrini qəbul etdikdən
sonra Nərimanov rayonundakı Xan Şuşinski küçəsində
kirayədə yaşadıqları mənzildə gizlətmişlər.
İstintaqla o da müəyyən
edilmişdir ki, Abuzər Behzad Əmiriyə zəng vuraraq 4
bağlamanı hələlik şəxsiyyəti məlum
olmayan bir nəfərə verməyi
tapşırmışdır. Sonuncu isə narkotik maddələri
görüş yerinə gətirməyi Rəhman Zəmaniyə
həvalə etmişdir.
Elə burada həm
Behzad Əmiri, həm də Rəhman Zəmani polis əməkdaşları
tərəfindən cinayət başında
yaxalanmışlar. Narkotik vasitələrin əsas hissəsi
isə onların kirayədə yaşadıqları mənzildən
götürülmüşdür.
İdarə əməkdaşlarının
davam etdirdikləri əməliyyat tədbiri ilə analoji cinayətlər
törədən daha bir transmilli mütəşəkkil cinayətkar
dəstə zərərsizləşdirilmiş, onun 4
üzvü tutulmuşdur. Saxlanılan şəxslər Astara
rayon sakini 36 yaşlı İsrafil Muqdilov, Bakı şəhər
sakinləri 34 yaşlı Elçin Məmmədov, 54
yaşlı Rəşad Rzayev və İran vətəndaşı
30 yaşlı Behruz Rəvan Buddur. Onlardan 81 kiloqram 236 qram tiryək
götürülmüşdür. İstintaq
araşdırmaları zamanı narkotik vasitənin Azərbaycana
qaçaqmalçılıq yolu ilə İsrafil Muqdilovun
tanışı, qonşu ölkənin şəxsiyyəti hələlik
istintaqa bəlli olmayan Səid adlı vətəndaşı
tərəfindən Xəzər dənizi vasitəsilə
motorlu qayıqda 2 silahlı şəxsin müşaiyəti
ilə göndərildiyi məlum olmuşdur. Cinayətkarlar
bir-birinin yerini müəyyənləşdirmək
üçün əvvəlcədən İsrafil Muqdilova CPS
tipli naviqasiya aparatı göndərmişlər. Sonuncu həmin
qurğu vasitəsi ilə silahlı
qaçaqmalçılarla əlaqə yaratmış, narkotik
vasitəni qəbul edərək, dənizin kənarında əvvəlcədən
qazıb hazırladığı yerdə gizlətmişdir.
Mayın 19-da Behruz Rəvan
Bud ona zəng edərək, narkotik vasitələr
üçün Bakıdan 2 nəfərin göndərildiyini
bildirmişdir.
Daxili İşlər
Nazirliyi əməkdaşlarının həyata keçirdikləri
əməliyyat zamanı transmilli mütəşəkkil cinayətkar
dəstənin üzvləri Elçin Məmmədov, Rəşad
Rzayev, Behruz Rəvan Bud və İsrafil Muqdilov həbs
edilmişlər.
Hər iki fakt üzrə
Cinayət Məcəlləsinin müvafiq maddələri ilə
cinayət işləri başlanılmış, istintaq
aparılır.
AzərTAc
Azərbaycan.- 2009.- 22 may.- S. 5.