Ədliyyə orqanlarında işləmək istəyən namizədlər üçün test imtahanı keçirilmişdir

Dövlət qulluğunun xüsusi növü olan ədliyyə orqanlarında vakant ştat vahidlərinə qulluğa qəbulun şəffaf keçirilməsi üzrə tədbirlər davam etdirilir və son illər müsabiqə və müsahibə yolu ilə bütövlükdə 600-ə yaxın şəxs ədliyyə orqanlarına qulluğa qəbul edilmişdir.

Mayın 23-də Ədliyyə Nazirliyi Tələbə Qəbulu üzrə Dövlət Komissiyası (TQDK) ilə birlikdə Bakı Dövlət Universitetinin yeni tədris binasında ədliyyə orqanlarında işləmək istəyən namizədlər üçün test imtahanı keçirmişdir.

Nazirlik üzrə elan olunmuş müsabiqədə iştirak etmək üçün müraciət edən şəxslərin sənədləri qanunvericilikdə müəyyən edilmiş qaydada toplanmış və yoxlanılmışdır. Müsabiqəyə dövlət, özəl və xarici təhsil müəssisələrini bitirmiş 220 nəfər hüquqşünas sənəd təqdim etmişdir.

Ədliyyə Nazirliyinin Kadrlar İdarəsinin rəisi, müsabiqə komissiyasının sədr müavini Rauf Məhərrəmov bildirmişdir ki, bu, ədliyyə orqanlarına qulluğa qəbulla bağlı sayca 3-cü müsabiqədir.

Namizədlərin təxminən yarıdan çoxu ölkəmizin regionlarını təmsil edir və böyük əksəriyyəti gənclərdir. Müsabiqədə iştirak edənlər arasında ədliyyədə və məhkəmələrdə yardımçı vəzifələrdə çalışan, digər təşkilatlardan ədliyyə orqanlarına işə keçmək istəyən namizədlərlə yanaşı, ilk dəfə əmək fəaliyyətinə məhz ədliyyə orqanlarında başlamaq arzusunda olanlar da var. Namizədlərin əksəriyyətini Bakı Dövlət Universitetinin məzunları, təxminən hər dörd nəfərdən birini isə qadınlar təşkil edir.

Builki müsabiqədə iştirak edən namizədlərdən 67 nəfəri bundan əvvəl ədliyyə orqanlarına qulluğa qəbulla bağlı keçirilmiş müsabiqənin test imtahanı və ya söhbət mərhələsində müvəffəqiyyət qazana bilməmiş şəxslərdir.

Müsabiqədə iştirak edən namizədlərə kömək məqsədilə test imtahanının keçirilməsi ilə bağlı, həmçinin imtahan suallarının hazırlanmasında istifadə olunan qanunlar və digər sənədlər barədə müvafiq məlumatı özündə əks etdirən "Yaddaş kitabçası" hazırlanaraq onlara təqdim edilmiş və bütün aidiyyəti sənədlər kimi nazirliyin internet səhifəsində yerləşdirilmişdir.

Qaydalara əsasən, üç saat davam edən imtahanda namizədin hüquqi biliklərini, məntiqi nəticələr çıxarmaq qabiliyyətini və ümumi dünyagörüşünü müəyyən etmək üçün verilən test tapşırığı 100 sualdan ibarət olmuşdur.

Təqdim olunmuş sual kitabçasında 80 sual namizədin hüquq və ədliyyə fəaliyyətinə dair qanunvericilik sahəsi üzrə biliyini yoxlayır (suallar Ədliyyə Nazirliyi tərəfindən hazırlanmışdır), 20 sual isə namizədlərin məntiqi nəticə çıxarma qabiliyyətini müəyyən edir (suallar TQDK tərəfindən hazırlanmışdır). Test imtahanında 90 bal toplamaq mümkündür.

Namizədlərin balları hesablandıqda hüquq və ədliyyə fəaliyyəti ilə bağlı qanunvericilik sahəsinə aid test tapşırıqları üzrə hər düzgün cavab 1 bal, məntiqi nəticə çıxarma qabiliyyətini müəyyən edən test tapşırıqları üzrə hər düzgün cavab 0,5 balla qiymətləndirilmişdir. Nəticələr hesablandıqda yanlış cavablar düz cavabların nəticəsinə təsir göstərməmişdir.

Saat 13.00-da başa çatan imtahanın nəticələrinə görə imtahanda iştirak etmiş 204 namizəddən 82 nəfəri 55 və daha artıq bal toplayaraq müsabiqənin ikinci mərhələsinə - söhbətə buraxılmışdır.

Söhbətin nəticələri üzrə namizəd mümkün balın 60 faizini və daha çox bal topladıqda söhbətdən müvəffəqiyyətlə keçmiş hesab olunacaqdır.

Aşkarlıq şəraitində, şəffaf üsullarla, beynəlxalq standartlara uyğun keçirilən imtahanı 30-a yaxın yerli və beynəlxalq müşahidəçi, həmçinin kütləvi informasiya vasitələrinin nümayəndələri izləmişdir.

İmtahanın nəticələri Ədliyyə Nazirliyinin və TQDK-nın internet saytlarında yerləşdirilmişdir.

Azərbaycan.-2009.-24 may.-S.5.