Cənnət Qarabağa
yenə bahar gəlib. Yaşıl ormanlar, əlvan çətirli
bağça-bağlar üzə gülür. Quşların
civiltisi, suların şırıltısı, yarpaqların
pıçıltısı qəribə bahar simfoniyası
yaradır. Bu yerlərdə təbiətin qeyri-adi bir
nızamı var. Sanki hər şey musiqi üstə köklənib.
Min illər boyu burada durna gözlü bulaqlar nəğmə
ilə çağlayır, küləklər musiqi ilə əsir,
səhərlər musiqi ilə açılır, gecələr
ay da nəğmə ilə doğulur. Bu yerlərin
möcüzəli suyunu içib, məlhəm havasını
udub, müqəddəs torpağına qədəm basıb
necə nəğməkar olmayasan?! Dünya şöhrətli
bəstəkar Üzeyir bəyin heyrətamiz istedadının
mayasını başqa şeydə axtarmaq sadəlövhlük
olardı.
Qarabağda, bu
diyarın nəğməli ürəyi olan Ağcabəbidə
doğulan Üzeyir bəy musiqimizi sevə-sevə onu
bütün dünyaya tanıtdı. Qədirbilən
Qarabağ camaatı dahi nəğməkarı böyük məhəbbətlə
sevir, əziz xatirəsini həmişə uca tutur. Bu hörmət
və ehtiramın məntiqi ifadəsidir ki, Ağcabədi
şəhərinin mərkəzində 2 hektar sahəni əhatə
edən böyük bir ərazidə salınmış
gözəl və yaraşıqlı parka Ü.Hacıbəyovun
adı verilmişdir. Park son dərəcə yüksək
zövqlə qurulmuş, hər şey zərgər dəqiqliyilə
nəzərə alınmışdır. Milli-mənəvi dəyərlərimizin
ən böyük hamisi, Heydər Əliyev Fondunun prezidenti,
YUNESKO və İSESKO-nun xoşməramlı səfiri, Milli Məclisin
deputatı Mehriban xanım Əliyevanın təşəbbüsü
ilə burada xüsusi layihə əsasında tikilmiş
Qarabağ Muğam Mərkəzi Üzeyir Hacıbəyov
dünyasına misilsiz ehtiramın parlaq ifadəsi kimi
bütün bölgədə razılıqla, minnətdarlıqla
qarşılanmışdır.
Qarabağ Muğam Mərkəzinin
istifadəyə verilməsi bölgədə milli musiqimizin
inkişafında yeni intibah dövrünün
başlandığı anlamını verir. Bu fikir həqiqətdir.
Mərkəz çox qısa vaxtda musiqi beşiyinə
çevrilmişdir. Hazırda burada Ağcabədi, Ağdam,
Beyləqan, Kəlbəcər, Laçın, Oğuz və Bərdə
rayonlarından 96 nəfər tələbə muğam dərsi
alır. Yeniyetmələrlə bacarıqlı müəllimlər
məşğul olur. Ü.Hacıbəyov adına Qarabağ
Muğam Mərkəzinin direktoru Aydın Məmmədov deyir:
- Mənəvi dəyərlərimizin,
milli musiqimizin üzünə gün doğmuşdur. Muğam
sənətinə ikinci həyat verilmişdir. Təkcə biz
sənətkarlar yox, bütün xalqımız Mehriban
xanımın tarixi xidmətlərini yüksək qiymətləndirir.
Son illərədək əlinə qaval götürməyə
utanan gənclər indi xalq musiqisinə böyük maraq
göstərirlər. Başdan-başa yenidən qurulub gözəl
görkəm alan Ağcabədidəki Muğam Mərkəzi
şəhərin ümumi mənzərəsini çox
uyarlı bir şəkildə tamamlayır.
Park da, burada göz oxşayan
Muğam Mərkəzi də musiqisevərlər
üçün müqəddəs yerdir. Bir də,
Qarabağda musiqini kim sevmir?! Parkda bütün günü xalq
musiqisi səsləndirilir. Rayon ictimaiyyəti
qarşısında bir neçə dəfə hesabat konserti
vermişik. Birinci Beynəlxalq uşaq muğam festivalına
ciddi hazırlıq görürük. Yaradılmış
nümunəvi şərait, göstərilən qayğı
və diqqət bizə qol-qanad verir. Əminliklə deyirəm
ki, yeni-yeni istedadların aşkar edilib yetişməsində
Muğam Mərkəzi nəyə qadir olduğunu tezliklə
göstərəcəkdir.
Qarabağ Muğam Mərkəzi
milli musiqimizə ucaldılmış əzəmətli abidəyə
bənzəyir. Burada hər şey ürək açır,
göz oxşayır. Müasir tipli binanın 2 konsert zalı
fəaliyyət göstərir. Yay və qış
zallarının hər biri 150 nəfərlikdir. Burada 7 sinif, 2
qrim və 2 inzibati otaq vardır. Zallar və otaqlar müasir
avadanlıqla təchiz olunmuşdur.
Başı qarlı
dağları, bol məhsullu, bərəkətli düzləri,
qiymətli təbii sərvətləri ilə məşhur
olan Qarabağ həm də bizim mənəvi
dünyamızdır. Bu gün Muğam Mərkəzindən ərşə
qalxıb qanadlanan "Qarabağ şikəstəsi",
"Mənsuriyyə", "Heyratı" muğamları
yurdun ərənləri üçün sanki səfərbərlik
marşıdır. Bu ecazkar musiqidəki döyüş ruhu
yağı tapdağında, düşmən caynağında
qalan torpaqlarımızı azad etməyə
çağırır.
Lazım QULİYEV
Azərbaycan.- 2009.- 22 may.-
S. 7.